• વૈભવ સૂર્યવંશીની તોફાની ઈનિંગ્સ, 90 બોલમાં ફટકાર્યા 190 રન!
• 14 વર્ષનો ક્રિકેટર વૈભવ બન્યો ચાહકોનો ફેવરિટ
• બેંગલુરુમાં એક પ્રેક્ટિસ મેચમાં 190 રનની ધમાકેદાર ઇનિંગ રમી
• ઇનિંગનો વીડિયો સોશિયલ મીડિયા પર ઝડપથી વાયરલ થયો

Vaibhav Suryavanshi's explosive innings : 14 વર્ષનો યુવા ક્રિકેટર વૈભવ સૂર્યવંશી ભારતીય ક્રિકેટનું ઉભરતું નામ બની રહ્યો છે. IPLમાં શાનદાર પ્રદર્શન બાદ, તે હવે પ્રેક્ટિસ મેચોમાં પણ પોતાની બેટિંગથી ચાહકોના દિલ જીતી રહ્યો છે. તાજેતરમાં બેંગલુરુમાં BCCI સેન્ટર ઓફ એક્સેલન્સ ખાતે ભારતીય અંડર-19 ટીમના કેમ્પ દરમિયાન રમાયેલી એક પ્રેક્ટિસ મેચમાં વૈભવે માત્ર 90 બોલમાં 190 રનની વિસ્ફોટક ઇનિંગ રમી હતી. આ ઇનિંગનો વીડિયો સોશિયલ મીડિયા પર ઝડપથી વાયરલ થયો છે, જેમાં વૈભવ બોલરોની જોરદાર ધોલાઈ કરતો જોવા મળે છે. તેના બેટમાંથી નીકળતા છગ્ગા અને ચોગ્ગાનો વરસાદ બોલરોને આશ્ચર્યમાં મૂકી દે છે. આ વીડિયો જોઈને ચાહકો અનુમાન લગાવી શકે છે કે વૈભવની આક્રમક બેટિંગ સામે બોલરોની શું હાલત થતી હશે!

વૈભવ સૂર્યવંશીની ધમાકેદાર ઇનિંગ્સ

ભારતીય ક્રિકેટના ઉભરતા યુવા બેટ્સમેન વૈભવ સૂર્યવંશીએ પોતાની બેટિંગથી બધાને ચકિત કરી દીધા છે. તાજેતરમાં યોજાયેલી પ્રેક્ટિસ મેચમાં તેણે માત્ર 90 બોલમાં વિસ્ફોટક 190 રન ફટકારીને દરેકનું ધ્યાન ખેંચ્યું છે. શરૂઆતથી જ આત્મવિશ્વાસથી ભરપૂર દેખાયેલા વૈભવે વિવિધ શોટ્સ દ્વારા બોલર્સને કોઈ તક આપી નહીં. તેની આ ઇનિંગ્સમાં છગ્ગા અને ચોગ્ગાઓનો વરસાદ જોવા મળ્યો હતો. તેની બેટિંગ જોતા ભારતીય ટીમ માટે તે આવનારા સમયમાં એક શાનદાર વિકલ્પ બની શકે છે. આપને જણાવી દઇએ કે, વૈભવ સૂર્યવંશીને ઇંગ્લેન્ડ પ્રવાસે જનારી ભારતીય અંડર-19 ટીમમાં સ્થાન મળ્યું છે. આ પ્રવાસ પહેલાં બેંગલુરુમાં રમાયેલી પ્રેક્ટિસ મેચમાં તેણે પોતાની બેટિંગનો જાદુ ફરી એકવાર બતાવ્યો, જેણે ચાહકોને ઉત્સાહથી ભરી દીધા. ઇંગ્લેન્ડ પ્રવાસ દરમિયાન ભારતીય અંડર-19 ટીમ ઇંગ્લેન્ડની અંડર-19 ટીમ સામે 50 ઓવરની એક પ્રેક્ટિસ મેચ રમશે, જે બાદ 5 મેચની ODI શ્રેણી રમાશે. આ ઉપરાંત, 2 મલ્ટી-ડે મેચો પણ રમાવાની છે. આ પ્રવાસ વૈભવ માટે પોતાની પ્રતિભા આંતરરાષ્ટ્રીય સ્તરે દર્શાવવાની શાનદાર તક છે.

IPLમાં શાનદાર પ્રદર્શન

IPL 2025ની સીઝનમાં વૈભવે પોતાની બેટિંગથી બધાને પ્રભાવિત કર્યા હતા. માત્ર 14 વર્ષની ઉંમરે તેણે 35 બોલમાં સદી ફટકારીને ઇતિહાસ રચ્યો હતો. આ સીઝનમાં તેણે 7 મેચમાં 252 રન બનાવ્યા, જે તેની અસાધારણ પ્રતિભાનો પુરાવો છે. વૈભવની આક્રમક શૈલી અને બેટિંગમાં આત્મવિશ્વાસ તેને ભારતીય ક્રિકેટનું ભવિષ્ય બનાવે છે.

ઇંગ્લેન્ડ પ્રવાસ માટે ભારતીય અંડર-19 ટીમ

ઇંગ્લેન્ડ પ્રવાસ માટે ભારતીય અંડર-19 ટીમ: આયુષ મ્હાત્રે (કેપ્ટન), વૈભવ સૂર્યવંશી, વિહાન મલ્હોત્રા, મૌલ્યરાજ સિંહ ચાવડા, રાહુલ કુમાર, અભિજ્ઞાન કુંડુ (વાઇસ-કેપ્ટન અને વિકેટકીપર), હરવંશ સિંહ (વિકેટકીપર), આરએસ એમ્બ્રીસ, કનિષ્ક ચૌહાણ, ખિલન પટેલ, હેનિલ પટેલ, યુધાજીત ગુહા, પ્રણવ રાઘવેન્દ્ર, મોહમ્મદ ઇનાન, આદિત્ય રાણા, અનમોલજીત સિંહ. આ ટીમમાં વૈભવનો સમાવેશ તેની પ્રતિભાને દર્શાવે છે.

ચાહકોનો ફેવરિટ બન્યો વૈભવ

વૈભવ સૂર્યવંશીની આક્રમક બેટિંગ અને નાની ઉંમરે મોટી સફળતાઓએ તેને ચાહકોનો ફેવરિટ બનાવ્યો છે. તેની 190 રનની ઇનિંગનો વાયરલ વીડિયો દર્શાવે છે કે તે બોલરો માટે કેટલો ખતરો બની શકે છે. ઇંગ્લેન્ડ પ્રવાસ તેની કારકિર્દી માટે એક મહત્ત્વપૂર્ણ પગલું છે, જ્યાં તે પોતાની બેટિંગથી વધુ ધમાલ મચાવવા તૈયાર છે. ભારતીય ક્રિકેટના ચાહકોને વૈભવ પાસેથી ભવિષ્યમાં વધુ મોટી ઇનિંગ્સની આશા છે, અને તે આશાઓ પર ખરો ઉતરે તેવી સંભાવનાઓ સ્પષ્ટપણે જોવા પણ મળી જ રહી છે.

આ પણ વાંચો :   RR vs CSK : મેચ પૂર્ણ થયા બાદ સૂર્યવંશીએ ધોનીના પકડી લીધા પગ, જુઓ આ હૃદયસ્પર્શી દ્રશ્ય