• આજે ભારત-ઓસ્ટ્રેલિયા વચ્ચે સેમિફાઈનલ
• સચિન તેડુંલકર પણ ઓસ્ટ્રેલિયા સામે ચઢાવશે બાયો
• ભારત-ઓસ્ટ્રેલિયા મેચને લઇને ક્રિકેટ ચાહકોમાં અદ્ભૂત ઉત્સાહ

India vs Australia : Champions Trophy 2025ની પહેલી સેમિફાઇનલ મેચ આજે, 4 માર્ચે, ભારત અને ઓસ્ટ્રેલિયા (India vs Australi) વચ્ચે રમાવાની છે. આ મેચને લઈને ભારતીય ક્રિકેટ ચાહકોમાં અદ્ભુત ઉત્સાહ જોવા મળી રહ્યો છે. ટૂર્નામેન્ટમાં સતત 3 મેચ જીતીને ભારતીય ટીમે પોતાની તાકાતનો પરચો આપ્યો છે અને હવે તે ઓસ્ટ્રેલિયા જેવી મજબૂત ટીમ સામે ટક્કર આપવા માટે સજ્જ છે. ગયા વર્ષે T20 વર્લ્ડ કપ 2024નો ખિતાબ જીત્યા બાદ રોહિત શર્માના નેતૃત્વમાં ટીમ ઈન્ડિયા બીજી ICC ફાઇનલમાં પહોંચવાથી માત્ર એક જીત દૂર છે. જોકે, આ માટે ભારતે ઓસ્ટ્રેલિયાના શક્તિશાળી ટીમનો સામનો કરવો પડશે, જે કોઈ પણ રીતે સરળ નહીં હોય.

સચિન તેંડુલકર પણ ઓસ્ટ્રેલિયા સામે ચઢાવશે બાયો

આ રોમાંચક સેમિફાઇનલની સાથે જ એક બીજી રસપ્રદ વાત સામે આવી રહી છે. રોહિત શર્મા જ નહીં, પરંતુ ભારતના દિગ્ગજ ક્રિકેટર સચિન તેંડુલકર પણ ઓસ્ટ્રેલિયાની ટીમ સામે મેદાનમાં ઉતરવા જઈ રહ્યા છે. આ ઘટના ચેમ્પિયન્સ ટ્રોફીની મેચના બીજા દિવસે એટલે કે 5 માર્ચે બનવાની છે. સચિનની ટીમ ઓસ્ટ્રેલિયા માસ્ટર્સ સામે ટકરાશે, જે દિગ્ગજ ખેલાડીઓથી ભરેલી છે. હવે તમે વિચારતા હશો કે આ કઈ મેચની વાત થઈ રહી છે? તો ચાલો આની પાછળની સંપૂર્ણ વાત જાણીએ.

ઇન્ટરનેશનલ માસ્ટર્સ લીગ 2025નું આયોજન

હાલમાં ભારતમાં ઇન્ટરનેશનલ માસ્ટર્સ લીગ (IML) 2025નું આયોજન થઈ રહ્યું છે. આ ટુર્નામેન્ટમાં 6 ટીમો ભાગ લઈ રહી છે, જેમાં ભારત તરફથી ઇન્ડિયા માસ્ટર્સ અને ઓસ્ટ્રેલિયા તરફથી ઓસ્ટ્રેલિયા માસ્ટર્સ સામેલ છે. ઇન્ડિયા માસ્ટર્સ ટીમની કમાન સચિન તેંડુલકરના હાથમાં છે, જ્યારે ઓસ્ટ્રેલિયા માસ્ટર્સનું નેતૃત્વ શેન વોટસન કરી રહ્યા છે. આ લીગ 22 ફેબ્રુઆરીએ શરૂ થઈ હતી અને અત્યાર સુધી 8 મેચ રમાઈ ચૂકી છે. સચિનના નેતૃત્વમાં ઇન્ડિયા માસ્ટર્સે સતત ત્રણ મેચ જીતીને પોઈન્ટ ટેબલમાં ટોચનું સ્થાન મેળવ્યું છે અને તેના 6 પોઈન્ટ છે. બીજી તરફ, ઓસ્ટ્રેલિયા માસ્ટર્સ હજુ સુધી એક પણ જીત મેળવી શક્યું નથી.

ઇન્ડિયા માસ્ટર્સ vs ઓસ્ટ્રેલિયા માસ્ટર્સ: મેચની વિગતો

• આ રોમાંચક મુકાબલો ઇન્ડિયા માસ્ટર્સ અને ઓસ્ટ્રેલિયા માસ્ટર્સ વચ્ચે 9મી મેચ તરીકે રમાશે. આ મેચની વિગતો નીચે મુજબ છે:
• મેચ: ઇન્ડિયા માસ્ટર્સ vs ઓસ્ટ્રેલિયા માસ્ટર્સ, ઇન્ટરનેશનલ માસ્ટર્સ લીગ T20 2025
• તારીખ અને દિવસ: બુધવાર, 5 માર્ચ, 2025
• સમય: સાંજે 7:30 વાગ્યે (ભારતીય સમય)
• સ્થળ: બીસીએ સ્ટેડિયમ, વડોદરા
• ભારતમાં લાઈવ પ્રસારણ: કલર્સ સિનેપ્લેક્સ (SD અને HD), કલર્સ સિનેપ્લેક્સ સુપરહિટ્સ
• ઓનલાઈન સ્ટ્રીમિંગ: જિયો હોટસ્ટાર

બંને ટીમોની રચના

ઇન્ડિયા માસ્ટર્સ

આ ટીમમાં દિગ્ગજ ખેલાડીઓનો સમાવેશ થાય છે, જેનું નેતૃત્વ સચિન તેંડુલકર કરી રહ્યા છે. ટીમની યાદી આ પ્રમાણે છે: સચિન તેંડુલકર (કેપ્ટન), અંબાતી રાયડુ, ગુરકીરત સિંહ માન, સુરેશ રૈના, યુવરાજ સિંહ, ઇરફાન પઠાણ, સ્ટુઅર્ટ બિન્ની, યુસુફ પઠાણ, નમન ઓઝા (વિકેટકીપર), અભિમન્યુ મિથુન, ધવલ કુલકર્ણી, પવન નેગી, રાહુલ શર્મા, શાહબાઝ નદીમ, વિનય કુમાર.

ઓસ્ટ્રેલિયા માસ્ટર્સ

શેન વોટસનના નેતૃત્વમાં આ ટીમ પણ શક્તિશાળી ખેલાડીઓથી સજ્જ છે. ટીમની યાદી આ મુજબ છે: શેન વોટસન (કેપ્ટન), કેલમ ફર્ગ્યુસન, નાથન રિઅર્ડન, શોન માર્શ, બેન કટિંગ, ડેન ક્રિશ્ચિયન, બેન ડંક (વિકેટકીપર), પીટર નેવિલ (વિકેટકીપર), બેન હિલ્ફેનહોસ, બેન લાફલિન, બ્રાયસ મેકગેન, જેમ્સ પેટિન્સન, જેસન ક્રેઝા, નાથન કુલ્ટર-નાઇલ, ઝેવિયર ડોહર્ટી.

ઉત્સાહનું ડબલ ડોઝ

આ બે મેચો ભારતીય ક્રિકેટ ચાહકો માટે ડબલ રોમાંચ લઈને આવી રહી છે. એક તરફ રોહિત શર્માની ટીમ ચેમ્પિયન્સ ટ્રોફીની સેમિફાઇનલમાં ઓસ્ટ્રેલિયાને ટક્કર આપશે, જ્યારે બીજી તરફ સચિન તેંડુલકરની ટીમ IML 2025માં ઓસ્ટ્રેલિયા માસ્ટર્સ સામે લડશે. આ બંને મુકાબલાઓ ક્રિકેટ રસિયાઓ માટે યાદગાર બની રહેશે.

આ પણ વાંચો :   ફરી સર્જાયો 2015 વર્લ્ડ કપ જેવો સંયોગ! શું આ વખતે પણ ટીમ ઈન્ડિયા હારશે? જાણો કેમ શરૂ થઇ આ ચર્ચા