• રાજ્યમાં 8 કલાકમાં 123 તાલુકામાં વરસાદ
• જૂનાગઢના મેંદરડામાં 13 ઇંચ વરસાદ વરસ્યો
• કેશોદ અને વંથલીમાં 10 ઇંચથી વધુ વરસાદ
• પોરબંદરમાં સાડા 8 ઇંચ વરસાદ વરસ્યો
• માણાવદર, ગણદેવીમાં 7 ઇંચથી વધુ વરસાદ
• કુતિયાણા, કપરાડામાં 6 ઇંચથી વધુ વરસાદ
• રાણાવાવ, મહુવા, કાલાવડમાં 5 ઇંચ વરસાદ
• તાલાલા, ખેરગામ, માંગરોળમાં 4 ઇંચથી વધુ વરસાદ
• 11 તાલુકાઓમાં 4 ઇંચ વરસાદ ખાબક્યો
• અન્ય તાલુકામાં અડધા ઇંચથી સાડા 3 ઇંચ વરસાદ
• સવારે 6 થી બપોરે 2 વાગ્યા સુધીનો વરસાદ

અમદાવાદ : ગુજરાતમાં એકસાથે પાંચ વરસાદી સિસ્ટમ સક્રિય થવાને કારણે રાજ્યના દરિયાઈ પટ્ટીના જિલ્લાઓમાં સાંબેલાધાર વરસાદ વરસી રહ્યો છે. જૂનાગઢ, ગીર સોમનાથ, અમરેલી, રાજકોટ, દેવભૂમિ દ્વારકા, ભાવનગર, વલસાડ, નવસારી, અને સુરત સહિતના જિલ્લાઓમાં સવારથી જ મેઘરાજાએ મંડાણ કર્યું છે. દરિયો તોફાની બનતાં તમામ બંદરો પર નંબર 3નું ભયસૂચક સિગ્નલ લગાવવામાં આવ્યું છે, અને માછીમારોને દરિયો ન ખેડવા માટે ચેતવણી જારી કરવામાં આવી છે. હવામાન વિભાગે 26 ઓગસ્ટ સુધી ભારેથી અતિભારે વરસાદની આગાહી કરી છે, જેના કારણે રાજ્યના વહીવટી તંત્ર અને રાહત એજન્સીઓ એલર્ટ મોડમાં છે.

જૂનાગઢ અને ગીર સોમનાથમાં ભારે વરસાદનો કહેર

જૂનાગઢ અને ગીર સોમનાથમાં ભારે વરસાદનો કહેરજૂનાગઢ જિલ્લામાં સવારથી મેઘરાજાએ રૌદ્ર સ્વરૂપ ધારણ કર્યું છે. મેંદરડા તાલુકામાં 13 ઈંચથી વધુ વરસાદ નોંધાયો, જ્યારે કેશોદ અને વંથલીમાં 10-10 ઈંચથી વધુ વરસાદ ખાબકતાં ગ્રામ્ય વિસ્તારોની હાલત કફોડી બની છે. ગીર સોમનાથના તાલાલા પંથકમાં પણ ધોધમાર વરસાદે હાહાકાર મચાવ્યો છે. અનીડા (ગીર) ગામની સરસ્વતી નદી બે કાંઠે વહેતાં આજુબાજુના ખેતરો જળમગ્ન બન્યા. તાલાલા-પ્રાંચી રોડ બ્લોક થયો અને હાઈવે પર પાણી ફરી વળતાં વાહન વ્યવહાર ખોરવાયો છે. ગ્રામ્ય વિસ્તારોમાં લોકો ફસાયા હોવાથી ફાયર બ્રિગેડ અને NDRFની ટીમોએ રેસ્ક્યૂ કામગીરી હાથ ધરી છે.

નવસારી અને પોરબંદરમાં જળબંબાકાર, શાળામાં 46 વિદ્યાર્થીઓ ફસાયા

નવસારીના વિજલપોર વિસ્તારમાં સતત વરસાદે લોકોની મુશ્કેલીઓ વધારી છે. વિઠ્ઠલ મંદિર નજીક ગણપતિનો પંડાલ વરસાદી પાણીની ચપેટમાં આવ્યો જેના કારણે ભક્તોને દર્શન માટે મુશ્કેલીનો સામનો કરવો પડ્યો. ઘણા ઘરોમાં વરસાદી પાણી ઘૂસી જતાં લોકોનું જનજીવન અસ્તવ્યસ્ત બન્યું છે. પોરબંદરમાં 10 ઈંચ જેટલો ભારે વરસાદ ખાબક્યો જેના કારણે ઉદ્યોગનગર ફાટક નજીકના પારસ નગર વિસ્તારમાં અનેક મકાનોમાં પાણી ઘૂસી ગયું. ઘરવખરી અને માલસામાન પલળી જતાં લોકોને ભારે મુશ્કેલીનો સામનો કરવો પડ્યો. રાણાવાવ નજીક ભોરાસર ગામની શાળામાં 46 વિદ્યાર્થીઓ ફસાયા હતા, જેમને બચાવવા શાળા સંચાલકે વહીવટી તંત્રની મદદ માગી હતી.

રેડ એલર્ટ અને હવામાન વિભાગની ચેતવણી

હવામાન વિભાગે બપોરે 1થી 4 વાગ્યા દરમિયાન સૌરાષ્ટ્ર અને દક્ષિણ ગુજરાતના 12 જિલ્લાઓ—વલસાડ, નવસારી, સુરત, ભરૂચ, ભાવનગર, અમરેલી, ગીર સોમનાથ, જૂનાગઢ, પોરબંદર, જામનગર, દેવભૂમિ દ્વારકા, અને રાજકોટ—માટે રેડ એલર્ટ જારી કર્યું છે, જેમાં અતિભારે વરસાદની આગાહી કરવામાં આવી છે. આ ઉપરાંત, 26 ઓગસ્ટ સુધી રાજ્યમાં ભારેથી અતિભારે વરસાદનું અનુમાન છે. રાજ્યના 206 નદી-તળાવોમાંથી 61 હાઈ એલર્ટ પર, 27 એલર્ટ પર, અને 21 વોર્નિંગ લેવલ પર છે, જેના કારણે નીચાણવાળા વિસ્તારોમાં પૂરનું જોખમ વધ્યું છે.

રેસ્ક્યૂ અને રાહત કામગીરી

ભારે વરસાદને પગલે રાજ્ય વહીવટી તંત્રે રાહત અને બચાવ કામગીરી તેજ કરી છે. 12 NDRF અને 20 SDRF ટીમોને અલગ-અલગ જિલ્લાઓમાં તૈનાત કરવામાં આવી છે. જૂનાગઢ, ગીર સોમનાથ, અને પોરબંદરમાં ફસાયેલા લોકોને બચાવવા માટે ફાયર બ્રિગેડ અને NDRFની ટીમો કામે લાગી છે. ગીર વિસ્તારમાં લાચ્છડી ડેમ ઓવરફ્લો થતાં નીચાણવાળા ગામોમાં એલર્ટ જારી કરવામાં આવ્યું છે. દરિયામાં બે માછીમારી બોટ (જફરાબાદની જય શ્રી અને ગીર સોમનાથની મુરલીધર) ડૂબી જતાં 18 માછીમારોમાંથી 10ને બચાવી લેવાયા છે, જ્યારે 8 માછીમારો માટે રેસ્ક્યૂ ઓપરેશન ચાલુ છે.

આ ભારે વરસાદે ખેતી, વાહન વ્યવહાર, અને રોજિંદા જનજીવનને મોટી અસર કરી છે. ખેતરો જળમગ્ન થયા છે, અને નીચાણવાળા વિસ્તારોમાં પાણી ભરાવાને કારણે લોકોની મુશ્કેલીઓ વધી છે. નવસારી અને પોરબંદરમાં ઘરોમાં પાણી ઘૂસી જતાં લોકોનો માલસામાન બગડ્યો છે. હવામાન વિભાગે ચેતવણી આપી છે કે આગામી દિવસોમાં વરસાદની તીવ્રતા વધી શકે છે, જેના કારણે વહીવટી તંત્રે નીચાણવાળા વિસ્તારોમાંથી લોકોને સલામત સ્થળે ખસેડવાની કામગીરી શરૂ કરી છે.

હવામાન વિભાગની આગાહી અનુસાર, 26 ઓગસ્ટ સુધી રાજ્યના દરિયાઈ પટ્ટીના જિલ્લાઓમાં ભારે વરસાદ ચાલુ રહેશે. રાજ્ય સરકારે જિલ્લા કલેક્ટરોને નાગરિકો અને પશુઓની સલામતી માટે તાત્કાલિક પગલાં લેવા આદેશ આપ્યા છે. NDRF અને SDRFની ટીમો સતત રેસ્ક્યૂ અને રાહત કામગીરીમાં લાગેલી છે. નાગરિકોને નીચાણવાળા વિસ્તારોમાંથી દૂર રહેવા અને સરકારી સૂચનાઓનું પાલન કરવા અપીલ કરવામાં આવી છે.

આ પણ વાંચો- સેવન્થ ડે સ્કૂલ હત્યા કેસ : મૃતક વિદ્યાર્થીની અંતિમવિધિ; ભરેલા અગ્નિ જેવી સ્થિતિ, ક્રાઈમ બ્રાન્ચ એલર્ટ