One Nation, One Election: રામનાથ કોવિંદની અધ્યક્ષતામાં આજે કમિટીની મહત્વની બેઠક

 ભારતમાં સરકાર પંચાયતથી લઈને સંસદ સુધીની ચૂંટણીઓ એકસાથે કરાવવાની દિશામાં સતત આગળ વધી રહી છે. હાલમાં જ આ માટે એક કમિટીની રચના કરવામાં આવી હતી, જેનું નેતૃત્વ દેશના પૂર્વ રાષ્ટ્રપતિ રામનાથ કોવિંદ ( Ramnath Kovind) કરશે. આ સમિતિમાં ગૃહમંત્રી અમિત શાહ (Amit Shah) અને કોંગ્રેસ સંસદીય દળના નેતા અધીર રંજન ચૌધરી સહિત સાત લોકોના નામ સામેલ છે. જોકે, અધીર રંજને તેમાં ભાગ લેવાનો ઈન્કાર કરી દીધો છે.

હવે સૂત્રોને ટાંકીને સમાચાર આવી રહ્યા છે કે આજે તેની પ્રથમ બેઠક રામનાથ કોવિંદની અધ્યક્ષતામાં તેમના નિવાસસ્થાને યોજાવા જઈ રહી છે.

કોંગ્રેસ સાંસદ રાહુલ ગાંધીએ પણ 'એક રાષ્ટ્ર, એક ચૂંટણી' અભિયાનની ટીકા કરી છે. રાહુલે તેને ભારતીય સંઘ અને તેના તમામ રાજ્યો પર હુમલો ગણાવ્યો છે. કેન્દ્ર સરકારના એક દેશ, એક ચૂંટણી અભિયાન પર રાહુલ ગાંધીએ રવિવારે ટ્વીટ કર્યું હતું કે, “ india એટલે કે ભારત રાજ્યોનો સંઘ છે. 'એક રાષ્ટ્ર, એક ચૂંટણી'નો વિચાર ભારતીય સંઘ અને તેના તમામ રાજ્યો પર હુમલો છે.

આ મુદ્દો વિપક્ષને પરેશાન કરી શકે છે. જો એક દેશ એક ચૂંટણીનો નિયમ લાગુ કરવામાં આવે તો લોકસભા અને વિધાનસભા ચૂંટણી બંને માટે પશ્ચિમ બંગાળમાં TMC, કોંગ્રેસ અને ડાબેરી પક્ષો વચ્ચે ગઠબંધન મુશ્કેલ બની શકે છે. તેમજ પંજાબ અને દિલ્હીમાં AAP અને કોંગ્રેસ વચ્ચે ટક્કર થવાની સંભાવના છે. તમને જણાવી દઈએ કે સમાજવાદી પાર્ટી મધ્યપ્રદેશ ચૂંટણીમાં કેટલીક સીટો માટે ઉમેદવારોના નામની જાહેરાત કરી ચૂકી છે.

રાષ્ટ્રપતિ રામનાથ કોવિંદની અધ્યક્ષતામાં રચાયેલી ઉચ્ચ સ્તરીય સમિતિ એક સાથે ચૂંટણી યોજવાની શક્યતાઓ ચકાસશે અને ભલામણો કરશે. આ સમિતિ બંધારણ, લોકપ્રતિનિધિત્વ અધિનિયમ અને અન્ય કોઈપણ કાયદા અને નિયમોની તપાસ કરશે અને એકસાથે ચૂંટણી યોજવાના હેતુ માટે જરૂરી હોય તેવા ચોક્કસ સુધારાની ભલામણ કરશે. કમિટી એ પણ તપાસ કરશે અને ભલામણ કરશે કે શું બંધારણમાં સુધારા માટે રાજ્યોના સમર્થનની જરૂર પડશે. સમિતિ  વિશ્લેષણ પણ કરશે અને એક સાથે ચૂંટણીની સ્થિતિમાં ત્રિશંકુ ગૃહ, અવિશ્વાસની દરખાસ્ત અથવા પક્ષપલટા અથવા આવી અન્ય કોઈ ઘટના જેવા સંભવિત ઉકેલો સૂચવશે.

ઉચ્ચ સ્તરીય સમિતિમાં લોકસભાના ભૂતપૂર્વ મહાસચિવ સુભાષ સી કશ્યપ, વરિષ્ઠ વકીલ હરીશ સાલ્વે અને ભૂતપૂર્વ ચીફ વિજિલન્સ કમિશનર સંજય કોઠારી પણ સભ્યો તરીકે હશે. કાયદા પ્રધાન અર્જુન રામ મેઘવાલ વિશેષ આમંત્રિત તરીકે સમિતિની બેઠકોમાં હાજરી આપશે, જ્યારે કાનૂની બાબતોના સચિવ નિતેન ચંદ્રા સમિતિના સચિવ હશે.

જણાવી દઈએ કે કેન્દ્ર સરકારે 18 થી 22 સપ્ટેમ્બર સુધી સંસદનું વિશેષ સત્ર બોલાવ્યું છે. સૂત્રોના જણાવ્યા અનુસાર આ દરમિયાન સરકાર એક દેશ એક ચૂંટણીને લઈને બિલ પણ લાવી શકે છે.

આ પણ વાંચો----SPG ડિરેક્ટર ARUN KUMAR SINHA નું નિધન, ગુરુગ્રામની હોસ્પિટલમાં લીધા અંતિમ શ્વાસ