Colombia: રાષ્ટ્રપતિ પદના ઉમેદવાર મિગુએલ ઉરીબે પર રેલી દરમિયાન ગોળીબાર, આરોપીની ધરપકડ

• દક્ષિણ અમેરિકન ખંડમાં આવેલા કોલંબિયામાં ચૂંટણી હિંસા જોવા મળી
• ચૂંટણી પ્રચાર દરમિયાન કોઈએ મિગુએલ પર ગોળીબાર કર્યો હતો
• ઉરીબેની સ્થિતિને ધ્યાનમાં રાખીને શહેરભરની હોસ્પિટલોને એલર્ટ પર

 Colombia: દક્ષિણ અમેરિકન ખંડમાં આવેલા કોલંબિયામાં ચૂંટણી હિંસા જોવા મળી હતી. શનિવારે, રાજધાની બોગોટામાં ચૂંટણી પ્રચાર દરમિયાન વિપક્ષી કન્ઝર્વેટિવ ડેમોક્રેટિક સેન્ટર પાર્ટીના સેનેટર અને આગામી 2026 ની ચૂંટણી માટે રાષ્ટ્રપતિ પદના ઉમેદવાર મિગુએલ ઉરીબે તુર્બે પર હુમલો કરવામાં આવ્યો હતો. ચૂંટણી પ્રચાર દરમિયાન કોઈએ મિગુએલ પર ગોળીબાર કર્યો હતો. જેમાં તેઓ ગંભીર રીતે ઘાયલ થયા હતા. મિગુએલ ઘાયલ થતાં જ તેમના સમર્થકો અને પોલીસે તેમને ઉપાડીને એમ્બ્યુલન્સમાં બેસાડ્યા અને પછી તેમને હોસ્પિટલમાં દાખલ કર્યા.

ઉરીબેની સ્થિતિને ધ્યાનમાં રાખીને શહેરભરની હોસ્પિટલોને એલર્ટ પર

કોલંબિયામાં 2026માં રાષ્ટ્રપતિની ચૂંટણીઓ યોજાવાની છે. ઉરીબે રાજધાની બોગોટામાં એક રેલીને સંબોધિત કરી રહ્યા હતા. મિગુએલ ઉરીબેને રાષ્ટ્રપતિ પદ માટે અગ્રણી દાવેદાર માનવામાં આવે છે. 39 વર્ષીય ઉરીબે વિપક્ષી સેન્ટ્રો ડેમોક્રેટિકો કન્ઝર્વેટિવ પાર્ટીના સભ્ય છે. પાર્ટીએ એક નિવેદન જાહેર કરીને કહ્યું કે હુમલાખોરે ઉરીબેને ભાષણ આપી રહ્યા હતા ત્યારે તેમના માથા અને પીઠમાં ગોળી મારવામાં આવી હતી. બોગોટાના મેયર કાર્લોસ ગાલાને જણાવ્યું હતું કે હુમલો શહેરના ફોન્ટીબોન વિસ્તારમાં થયો હતો. ઉરીબેની સ્થિતિને ધ્યાનમાં રાખીને શહેરભરની હોસ્પિટલોને એલર્ટ પર રાખવામાં આવી છે.

જોકે, પાર્ટીએ તેમની હાલત શું છે તે જણાવ્યું નથી

એમ્બ્યુલન્સમાં પડેલા મિગુએલનો એક વીડિયો સામે આવ્યો છે. જેમાં જોવા મળે છે કે તેમનું ઘણું લોહી વહી ગયું છે. જ્યારે તેમને એમ્બ્યુલન્સમાં બેસાડવામાં આવી રહ્યા હતા, ત્યારે તેમના શરીરમાંથી રસ્તા પર લોહી પડતું જોવા મળ્યું. લોકો ચીસો પાડતા જોવા મળ્યા. કોલંબિયાના સંરક્ષણ પ્રધાન પેડ્રો સાંચેઝે જણાવ્યું હતું કે એક શંકાસ્પદ વ્યક્તિની ધરપકડ કરવામાં આવી છે અને આ ઘટનામાં અન્ય લોકો પણ સામેલ છે કે કેમ તે તપાસ ચાલી રહી છે. રાષ્ટ્રપતિ કાર્યાલયે હિંસાની નિંદા કરી છે. ડેમોક્રેટિક સેન્ટર પાર્ટીએ એક નિવેદન જારી કરીને કહ્યું છે કે મિગુએલને પાછળના ભાગમાં ગોળી વાગી છે. જોકે, પાર્ટીએ તેમની હાલત શું છે તે જણાવ્યું નથી.

અમેરિકાએ હુમલા અંગે શું કહ્યું?

ટ્રમ્પ વહીવટી સચિવ માર્કો રુબિયોએ સોશિયલ મીડિયા પ્લેટફોર્મ X (અગાઉ ટ્વિટર) પર જણાવ્યું હતું કે અમેરિકા સેનેટર મિગુએલ ઉરીબે પરના હત્યાના પ્રયાસની સખત નિંદા કરે છે. આ હુમલો લોકશાહી માટે સીધો ખતરો છે. તેમજ મિગુએલ ઉરીબે તુર્બે કોલંબિયાના જાણીતા વ્યક્તિત્વ છે, જે એક અગ્રણી રાજકીય પરિવારમાંથી આવે છે. તેમના પિતા મિગુએલ ઉરીબે એક ઉદ્યોગપતિ અને યુનિયન નેતા હતા. તેમની માતા ડાયના તુર્બે 90 ના દાયકાની પ્રખ્યાત પત્રકાર હતી. તેમનું 1990 માં પ્રખ્યાત ડ્રગ કાર્ટેલ નેતા પાબ્લો એસ્કોબારના આદેશ પર એક સશસ્ત્ર જૂથ દ્વારા અપહરણ કરવામાં આવ્યું હતું. જોકે, બચાવ કામગીરી દરમિયાન તેમનું મોત થયું હતું.

આ પણ વાંચો: Bhojpuri Cinema : ભોજપુરી ગીત 'ચુમ્મા દે દે' એ ઇન્ટરનેટ પર ધૂમ મચાવી