Election Commission નો મેઘા પ્લાન, આગામી સપ્તાહથી દેશભરમાં શરૂ થઈ શકે છે SIR

• Election Commission નો મોટો પ્લાન : આગામી સપ્તાહથી SIR અભિયાનની શરૂઆત
• મતદાતા યાદી સુધારણા: 10-15 રાજ્યોમાં પહેલા તબક્કાનો પ્રારંભ
• બિહારમાં SIR પૂર્ણ, તમિલનાડુમાં આગામી સપ્તાહથી શરૂ
• 2026 ચૂંટણી પહેલા મતદાતા યાદીનું વિશેષ પુનરીક્ષણ
• મદ્રાસ હાઈકોર્ટમાં પંચની જાહેરાત : તમિલનાડુ SIR શરૂ

નવી દિલ્હી : ચૂંટણી પંચ ( Election Commission ) આગામી સપ્તાહથી મતદાતા યાદીના અખિલ ભારતીય વિશેષ ગહન પુનરીક્ષણ (SIR) અભિયાનના પ્રથમ તબક્કાની શરૂઆત કરી શકે છે. આ અભિયાનની શરૂઆત 10થી 15 રાજ્યોથી કરવામાં આવશે. આસામ, તમિલનાડુ, પુડુચેરી, કેરળ અને પશ્ચિમ બંગાળમાં 2026માં ચૂંટણીઓ યોજાનાર છે. આ તમામ રાજ્યો તે યાદીમાં સામેલ છે જ્યાં મતદાતા યાદીને સુધારવાનું કામ સૌથી પહેલા શરૂ થશે.

અધિકારીઓએ જણાવ્યું કે, પંચ SIRના પ્રથમ તબક્કાની જાહેરાત આગામી સપ્તાહના મધ્યમાં કરી શકે છે. જે રાજ્યોમાં સ્થાનિક ચૂંટણીઓ ચાલુ છે અથવા નજીકના ભવિષ્યમાં યોજાનાર છે, ત્યાં પંચ મતદાતા યાદીનું SIR કાર્ય નહીં કરે કારણ કે જમીની સ્તરની ચૂંટણી મશીનરી તેમાં વ્યસ્ત હશે. તેથી SIR પર ધ્યાન કેન્દ્રિત કરી શકશે નહીં. આવા રાજ્યોમાં SIR પાછલા તબક્કાઓમાં થશે.

બિહારમાં SIR પૂર્ણ થયું

બિહારમાં મતદાતા યાદીનું SIR કાર્ય પૂર્ણ થઈ ગયું છે, જ્યાં આશરે 7.42 કરોડ નામોવાળી અંતિમ યાદી 30 સપ્ટેમ્બરે પ્રકાશિત કરવામાં આવી હતી. બિહારમાં બે તબક્કામાં 6 નવેમ્બર અને 11 નવેમ્બરે મતદાન થશે અને મતગણતરી 14 નવેમ્બરે થશે. પંચે SIR અમલીકરણની રૂપરેખા નક્કી કરવા રાજ્યના મુખ્ય ચૂંટણી અધિકારીઓ (CEO) સાથે પહેલેથી જ બે બેઠકો કરી ચૂક્યું છે. અનેક મુખ્ય ચૂંટણી અધિકારીઓએ તેમના છેલ્લા SIR પછી પ્રકાશિત મતદાતા યાદીઓને તેમની વેબસાઇટ પર મૂકી દીધી છે.

દિલ્હીના મુખ્ય ચૂંટણી અધિકારીની વેબસાઇટ પર 2008ની મતદાતા યાદી છે, જ્યારે રાષ્ટ્રીય રાજધાનીમાં છેલ્લું ગહન પુનરીક્ષણ થયું હતું. ઉત્તરાખંડમાં છેલ્લું SIR 2006માં થયું હતું અને તે વર્ષની મતદાતા યાદી હવે રાજ્ય મુખ્ય ચૂંટણી અધિકારીની વેબસાઇટ પર ઉપલબ્ધ છે. રાજ્યોમાં છેલ્લા SIRનો ઉપયોગ ચૂંટણી પંચ એ જ રીતે કરશે જેમ તેણે બિહારની 2003ની મતદાતા યાદીનો ગહન પુનરીક્ષણ માટે ઉપયોગ કર્યો હતો. મોટા ભાગના રાજ્યોમાં મતદાતા યાદીનું છેલ્લું SIR 2002 અને 2004 વચ્ચેનું છે.

તમિલનાડુમાં આગામી સપ્તાહથી મતદાતા યાદીનું વિશેષ ગહન પુનરીક્ષણ

ચૂંટણી પંચે મદ્રાસ હાઈકોર્ટમાં જણાવ્યું કે તમિલનાડુમાં SIR આગામી સપ્તાહથી શરૂ થશે. આ માહિતી હાઈકોર્ટના ચીફ જસ્ટિસ મનીન્દ્ર મોહન શ્રીવાસ્તવ અને જસ્ટિસ જી અરુલ મુરુગનની ખંડપીઠ સમક્ષ આપવામાં આવી હતી.

અદાલત પૂર્વ અન્નાદ્રમુક વિધાયક બી સત્યનારાયણન દ્વારા દાખલ કરેલી અરજી પર સુનાવણી કરી રહી હતી, જેમાં ચૂંટણી પંચને ટી નગર ચૂંટણી વિસ્તારના 229 મતદાન કેન્દ્રોનું સંપૂર્ણ અને પારદર્શી પુનરીક્ષણ કરવાનો નિર્દેશ આપવાની માંગ કરવામાં આવી હતી. સત્યનારાયણનનો આરોપ છે કે ચેન્નઈના ટી નગર ચૂંટણી વિસ્તારમાં અધિકારીઓએ સત્તાધારી દ્રમુકની તરફેણમાં 13,000 અન્નાદ્રમુક સમર્થકોના નામ મતદાતા યાદીમાંથી દૂર કરી દીધા હતા.

તેમણે કહ્યું કે, તેઓ 2021ની વિધાનસભા ચૂંટણી માત્ર 137 મતોથી હારી ગયા હતા, જેનું કારણ મોટી સંખ્યામાં વાસ્તવિક મતદાતાઓના નામ મતદાતા યાદીમાંથી દૂર કરવામાં આવ્યા હતા. તેમણે અરજીમાં કહ્યું કે, ચૂંટણી પંચને નિર્દેશ આપવામાં આવે કે પાત્ર વ્યક્તિનું નામ વોટર લિસ્ટમાં સામેલ કરવાની ખાતરી કરે.

આ પણ વાંચો- Palanpur : અસામાજિક તત્વો બેફામ, બારડપુરા-લીમડી વિસ્તારમાં ખુલ્લી તલવારો સાથે બે જૂથો વચ્ચે અથડામણ