રશિયાની મદદથી ઈરાન 8 નવા પરમાણુ પ્લાન્ટ બનાવશે, બંને દેશો વચ્ચે થયો કરાર

• Iran Russia Nuclear Plant Deal: ઇરાન બનાવશે પરમાણુ પ્લાન્ટ
• આ પ્લાન્ટ બનાવવા માટે રશિયા-ઇરાન વચ્ચે થયો કરાર
• ઇરાનના AEOI ના વડા મોહમ્મદ ઇસ્લામીએ આની કરી જાહેરાત

ઇરાન અને રશિયા વચ્ચે પરમાણુ પ્લાન્ટ બનાવવાના મામલે મોટો કરાર થયો છે. રશિયાની મદદથી ઇરાન આઠ જેટલા પરમાણુ પ્લાન્ટ બનાવશે. ઈરાનના પરમાણુ ઊર્જા સંગઠન (AEOI) ના વડા મોહમ્મદ ઇસ્લામીએ જાહેરાત કરી છે કે સ્વચ્છ અને ટકાઉ ઊર્જા ઉત્પાદન વધારવાના પ્રયાસોના ભાગ રૂપે ઈરાન રશિયન સહાયથી આઠ નવા પરમાણુ ઊર્જા પ્લાન્ટ બનાવશે. આ મહત્ત્વપૂર્ણ પ્રોજેક્ટ માટે બંને દેશો વચ્ચે એક કરાર પણ થયો છે. ઈરાની સમાચાર આઉટલેટ તસ્નીમે AEOI વડાને ટાંકીને જણાવ્યું હતું કે, આ કરાર હેઠળ બુશેહરમાં ચાર પરમાણુ ઊર્જા પ્લાન્ટ અને ઉત્તર તથા દક્ષિણ કિનારા પર અન્ય ચાર પરમાણુ ઊર્જા પ્લાન્ટનું સંયુક્ત બાંધકામ કરવામાં આવશે. સરકારે હાલમાં આ નવા પ્લાન્ટ્સના ચોક્કસ સ્થાનો જાહેર કર્યા નથી, જેની જાહેરાત બાદમાં કરવામાં આવશે.

Iran Russia Nuclear Plant Deal:   AEOI ના વડા એ આની કરી જાહેરાત

AEOI વડા મોહમ્મદ ઇસ્લામીએ દાવો કર્યો હતો કે આ પ્લાન્ટ્સ "સ્વચ્છ પરમાણુ ઊર્જા"નો ટકાઉ પુરવઠો સુનિશ્ચિત કરશે અને ઈરાનને તેના પરમાણુ ઊર્જા ઉત્પાદનમાં કુલ 20,000 મેગાવોટનો વધારો કરવામાં મદદ કરશે. રશિયન રાજ્ય મીડિયા TASS એ પણ મોહમ્મદ ઇસ્લામીને ટાંકીને કહ્યું કે ઈરાનના ઉત્તરીય પ્રાંત ગોલેસ્તાનના કિનારે પરમાણુ ઊર્જા પ્લાન્ટનું બાંધકામ શરૂ થઈ ગયું છે, અને ખુઝેસ્તાન પ્રાંતમાં પરમાણુ ઊર્જા પ્લાન્ટનું બાંધકામ પણ પૂર્ણ કરવાની યોજના છે.

ઈરાનના રાષ્ટ્રપતિએ પરમાણુ કાર્યક્રમને લઇને કરી આ વાત

ઈરાનના રાષ્ટ્રપતિ મસૂદ પેઝેશ્કિયાને આ વિકાસની વચ્ચે દેશના પરમાણુ કાર્યક્રમ અંગેના પોતાના વલણને સ્પષ્ટ કર્યું છે. તેમણે ગઈકાલે જ "શાંતિપૂર્ણ પરમાણુ કાર્યક્રમ" અને "પરમાણુ શસ્ત્રોનો વિકાસ ન કરવા" પ્રત્યે તેમના દેશની પ્રતિબદ્ધતાનો પુનરોચ્ચાર કર્યો હતો, જે આ નવા કરારને સંરક્ષણ નહીં પણ ઊર્જા ક્ષેત્રે સહયોગ તરીકે રજૂ કરે છે.

આ પણ વાંચો:    નેપાળ હિમાલયમાં મોટી દુર્ઘટના: યાલુંગ રી પર હિમપ્રપાતથી 7 પર્વતારોહકોના મોત, 4 લોકો લાપતા