• જૂનાગઢ : પોલીસને દેવાયત ખવડની મળી ફોર્ચ્યુનર-ક્રેટા કાર, હવે થશે દૂધનું દૂધ પાણીનું પાણી
• દેવાયત ખવડની ગાડીઓ મળતા પોલીસને એક નવો જ રસ્તો મળી ગયો છે
• પોલીસે આગળની તપાસની ધમધમાટ ચાલું કરી દીધી છે
• દેવાયત સામે ફરિયાદ કરનારા નિવેદનોનું પણ થશે હવે દૂધનું દૂધ અને પાણીનું પાણી

જૂનાગઢ : ડાયરા કલાકાર દેવાયત ખવડ ફરી એકવાર ગંભીર વિવાદમાં સપડાયા છે. ધ્રુવરાજસિંહ ચૌહાણ (DhruvRajSingh Chauhan) નામના યુવક સાથે ઘર્ષણ અને મારામારીના કેસમાં તાલાલા પોલીસે ખવડ સહિત 15 લોકો સામે ફરિયાદ નોંધી છે. આ મામલે પોલીસે દેવાયત ખવડની ફોર્ચ્યુનર અને ક્રેટા બંને કારો ધણેજ ગામની સીમ વિસ્તારમાંથી પ્રાપ્ત કરી છે, અને તપાસ ઝડપથી આગળ વધી રહી છે.

આ કેસમાં ફરિયાદી ધ્રુવરાજસિંહ ચૌહાણે જણાવ્યું કે તે 50 કિમી પ્રતિ કલાકની ઝડપે કાર ચલાવી રહ્યો હતો, ત્યારે દેવાયત ખવડની ફોર્ચ્યુનર અને ક્રેટા કારોએ તેની કારને પાંચ વખત ટક્કર મારી હતી. ત્યારબાદ બંને કારોમાંથી ઉતરેલા 10થી 15 લોકોએ તેના પર હુમલો કર્યો હતો. ત્રણ લોકોએ લોખંડના પાઇપથી માર મારીને ધ્રુવરાજસિંહના પગમાં એક અને હાથમાં બે ફેક્ચર કર્યા હોવાનો દાવો કરાયો છે. હુમલાખોરોએ તેની સોનાની ચેન (15-17 તોલા) અને રોકડ રકમ (આશરે ₹42,000-₹43,000) પણ લૂંટી લીધી હતી. ધ્રુવરાજસિંહના જણાવ્યા મુજબ, દેવાયત ખવડે બંદુક બતાવીને કેસ ન કરવાની ધમકી પણ આપી હતી.

આ પણ વાંચો-પાટણ-સિદ્ધપુર વચ્ચે ગંભીર અકસ્માત : નેદ્રા રોડ પર લક્ઝરી બસ અને ઈકો કારની ટક્કર, એકનું ઘટનાસ્થળે મોત

ફરિયાદી ધ્રુવરાજ સિંહ ચૌહાણના નિવેદન પછી પોલીસ દેવાયત ખવડની ગાડીઓની શોધખોળ કરી રહી હતી. પરંતુ સફળતા મળી રહી નહતી. જોકે, અંતે પોલીસને સફળતા મળતા પોલીસે દેવાયત ખવડની બંને ગાડીઓને જપ્ત કરી છે.

જૂની અદાવતના કારણે હુમલો

આ હુમલો ફેબ્રુઆરીમાં થયેલી ડાયરા પ્રદર્શનની ચુકવણીને લઈને થયેલી જૂની અદાવતને કારણે થયો હોવાનો આક્ષેપ ધ્રુવરાજસિંહે કર્યો છે. તેના મુજબ, હુમલાખોરોએ તેની સોશિયલ મીડિયા પરની લોકેશન ટ્રેક કરીને આ ઘટનાને અંજામ આપ્યો હોવાની માહિતી સામે આવી રહી છે.

તાલાલા પોલીસે દેવાયત ખવડ સહિત 15 લોકો સામે ગુનો નોંધ્યો છે, જેમાં IPCની કલમ 307 (હત્યાનો પ્રયાસ), 323 (જાતીય હુમલો), 394 (લૂંટ), 506(2) (ગંભીર ધમકી), અને હથિયારો અને ગેરકાયદેસર ગેંગના આધારે ગુનો સામેલ છે. પોલીસે ઘટનાસ્થળથી ખવડની ફોર્ચ્યુનર અને ક્રેટા કારોનો કબજો લઈ લીધો છે, જે ધણેજ ગામની સીમ વિસ્તારમાંથી મળી આવી છે.

કારોની ફોરેન્સિક તપાસ

ધ્રુવરાજસિંહ જુનાગઢની ખાનગી હોસ્પિટલમાં સારવાર લઈ રહ્યો છે, અને તેની સ્થિતિ સ્થિર છે. પોલીસે તપાસ શરૂ કરી દીધી છે, જેમાં કારોની ફોરેન્સિક તપાસ અને બીજા આરોપીઓની શોધખોળ સામેલ છે. દેવાયત ખવડ હાલ સુધી પોલીસની પહોંચથી દૂર છે, પરંતુ તેની ધરપકડ માટે ટીમો તૈનાત કરવામાં આવી છે.

આ ઘટનાએ સ્થાનિક સમુદાયમાં ચર્ચાનો વિષય બન્યો છે. કેટલાક લોકો ખવડની સતત વિવાદમાં સામેલ થવાને લઈને નારાજ છે, જ્યારે કેટલાક તેને ખોટી ફસાવણી માની રહ્યા છે. લોકો પોલીસ પાસે ઝડપી અને નિષ્પક્ષ તપાસની આશા રાખી રહ્યાં છે.

આ પણ વાંચો-જામનગર: બાર એસોસિએશનના વકીલોની SP કચેરીએ રજૂઆત, નિર્મલસિંહ જાડેજા પર ખોટી ફરિયાદનો આક્ષેપ