• મની લોન્ડરિંગ કેસમાં રોબર્ટ વાડ્રા પર EDનો શિકંજો: બે કંપનીઓ દ્વારા 58 કરોડની ગેરકાયદે કમાણીનો આરોપ
• રોબર્ટ વાડ્રા પર EDની મોટી કાર્યવાહી: 58 કરોડની ગેરકાયદે કમાણીનો આરોપ
• શિકોહપુર જમીન કૌભાંડ: વાડ્રાને કોર્ટની નોટિસ, 28 ઓગસ્ટે સુનાવણી
• સ્કાય લાઈટ અને બ્લૂ બ્રીઝ દ્વારા 58 કરોડની હેરફેર: EDની ચાર્જશીટ

નવી દિલ્હી: પ્રવર્તન નિદેશાલય (ED)એ રવિવાર, 10 ઓગસ્ટ 2025ના રોજ રોબર્ટ વાડ્રા, જે કોંગ્રેસના સાંસદ પ્રિયંકા ગાંધીના પતિ છે, તેમની સામે મની લોન્ડરિંગ કેસમાં ચાર્જશીટ દાખલ કરી છે. EDએ આરોપ લગાવ્યો છે કે વાડ્રાએ બે કંપનીઓ – બ્લૂ બ્રીઝ ટ્રેડિંગ પ્રાઈવેટ લિમિટેડ (BBTPL) અને સ્કાય લાઈટ હોસ્પિટાલિટી પ્રાઈવેટ લિમિટેડ (SLHPL) – દ્વારા 58 કરોડ રૂપિયાની ગેરકાયદે કમાણી (Proceeds of Crime) મેળવી. આ રકમનો ઉપયોગ તેમણે કથિત રીતે અચલ સંપત્તિઓ ખરીદવા, રોકાણો કરવા, લોન આપવા અને તેમની વિવિધ ગ્રૂપ કંપનીઓની દેવાદારી ચૂકવવા માટે કર્યો હતો.

EDની ચાર્જશીટની મુખ્ય વિગતો

EDની ચાર્જશીટ અનુસાર, તપાસ દરમિયાન કથિત ગુનાહિત પ્રવૃત્તિઓથી મેળવેલી રકમનું ચોક્કસ આંકડાકીય મૂલ્યાંકન કરવામાં આવ્યું. આ તપાસમાં જાણવા મળ્યું કે રોબર્ટ વાડ્રાએ કુલ 58 કરોડ રૂપિયાની ગેરકાયદે રકમ મેળવી, જે બે માધ્યમો દ્વારા આવી હતી.

1. 5 કરોડ રૂપિયા: બ્લૂ બ્રીઝ ટ્રેડિંગ પ્રાઈવેટ લિમિટેડ (BBTPL)
2. 53 કરોડ રૂપિયા: સ્કાય લાઈટ હોસ્પિટાલિટી પ્રાઈવેટ લિમિટેડ (SLHPL)

આ રકમનો ઉપયોગ વાડ્રાએ અચલ સંપત્તિઓ ખરીદવા, વિવિધ ક્ષેત્રોમાં રોકાણો કરવા, લોન આપવા અને તેમની ગ્રૂપ કંપનીઓના બાકી દેવાં ચૂકવવા માટે કર્યો હતો. EDનો દાવો છે કે આ રકમ શેડ્યૂલ્ડ અપરાધ (Scheduled Offence) સાથે જોડાયેલી છે, જે પ્રિવેન્શન ઓફ મની લોન્ડરિંગ એક્ટ (PMLA) હેઠળ ગુનો ગણાય છે.

આ પણ વાંચો-પાક સેના પ્રમુખનો બે મહિનામાં બીજો અમેરિકા પ્રવાસ: ટોચના જનરલ્સ સાથે મુલાકાત

ગુરુગ્રામ શિકોહપુર જમીન સોદા કેસ

આ કેસ 2008ના ગુરુગ્રામના શિકોહપુર (હવે સેક્ટર 83, મનેસર)માં થયેલા એક જમીન સોદા સાથે જોડાયેલો છે. EDની તપાસમાં પણ અન્ય કેટલાક તથ્યો સામે આવ્યા હોવાનું કહેવામાં આવી રહ્યું છે. જે નીચે પ્રમાણે છે.

ફેબ્રુઆરી 2008માં વાડ્રાની કંપની સ્કાય લાઈટ હોસ્પિટાલિટી પ્રાઈવેટ લિમિટેડે ઓનકારેશ્વર પ્રોપર્ટીઝ પ્રાઈવેટ લિમિટેડ પાસેથી 3.5 એકર જમીન 7.5 કરોડ રૂપિયામાં ખરીદી હતી. જોકે, EDનો દાવો છે કે આ સોદો ખોટા દસ્તાવેજો અને નાણાકીય ગેરરીતિઓ પર આધારિત હતો અને વાસ્તવિક સોદો 15 કરોડ રૂપિયાનો હતો, પરંતુ ચેકની ચૂકવણી ક્યારેય રોકડમાં થઈ ન હતી.

આ જમીન બાદમાં સપ્ટેમ્બર 2012માં રિયલ એસ્ટેટ કંપની DLFને 58 કરોડ રૂપિયામાં વેચવામાં આવી, જેમાંથી 53 કરોડ રૂપિયા સ્કાય લાઈટ હોસ્પિટાલિટી અને 5 કરોડ રૂપિયા બ્લૂ બ્રીઝ ટ્રેડિંગ દ્વારા ટ્રાન્સફર થયા.

EDનો આરોપ છે કે આ જમીન વાડ્રાને લાંચ તરીકે આપવામાં આવી હતી, અને તેમણે તે વખતે હરિયાણાના મુખ્યમંત્રી ભૂપિન્દર સિંહ હુડ્ડા સાથેના પ્રભાવનો ઉપયોગ કરીને હાઉસિંગ લાયસન્સ મેળવ્યું હતું, જેનાથી જમીનનું મૂલ્ય અચાનક વધી ગયું.

કોર્ટની કાર્યવાહી

દિલ્હીની રાઉઝ એવન્યુ કોર્ટના વિશેષ PMLA જજ સુશાંત ચગોત્રાએ EDની ચાર્જશીટ પર સંજ્ઞાન લેતા પહેલા રોબર્ટ વાડ્રાને નોટિસ જારી કરી છે. કોર્ટે તેમને 28 ઓગસ્ટ, 2025ના રોજ હાજર થઈને પોતાનો પક્ષ રજૂ કરવા અને EDની દલીલો પર ચર્ચા કરવા તેડું મોકલ્યું છે. આ ચાર્જશીટમાં વાડ્રા ઉપરાંત 11 વ્યક્તિઓ અને કંપનીઓ, જેમાં સ્કાય લાઈટ હોસ્પિટાલિટી, ઓનકારેશ્વર પ્રોપર્ટીઝ, સત્યાનંદ યાજી અને કેવલ સિંહ વિર્કનો સમાવેશ થાય છે, તેમને આરોપી તરીકે નામ આપવામાં આવ્યા છે.

આ પણ વાંચો-ટેરિફ વોર વચ્ચે Rajnath Singh એ ડોનાલ્ડ ટ્રમ્પ પર કર્યા પરોક્ષ રીતે પ્રહાર, કહ્યું 'કેટલાક લોકો પોતાને બોસ માને છે'

EDની અન્ય કાર્યવાહી

EDએ આ કેસમાં 43 અચલ સંપત્તિઓ, જેનું મૂલ્ય આશરે 38.69 કરોડ રૂપિયા છે, તેને PMLA હેઠળ અસ્થાયી રૂપે જપ્ત કરી છે. આ સંપત્તિઓમાં રાજસ્થાનના બિકાનેરમાં જમીન, ગુરુગ્રામમાં ગુડ અર્થ સિટી સેન્ટરના યુનિટ્સ, મોહાલીમાં બેસ્ટેક બિઝનેસ ટાવરના યુનિટ્સ અને અમદાવાદમાં જય અંબે ટાઉનશિપના રેસિડેન્શિયલ યુનિટ્સનો સમાવેશ થાય છે. EDએ આ સંપત્તિઓની જપ્તી અને આરોપીઓ સામે PMLAની કલમ 4 હેઠળ મહત્તમ સાત વર્ષની જેલની સજાની માંગણી કરી છે.

રોબર્ટ વાડ્રાનો જવાબ

રોબર્ટ વાડ્રાએ આ આરોપોને “રાજકીય બદલો” (political witch-hunt) ગણાવીને નકારી કાઢ્યા છે. તેમણે જણાવ્યું છે કે આ કેસ તેમના અને તેમના પરિવાર જેમાં ભૂતપૂર્વ કોંગ્રેસ અધ્યક્ષ સોનિયા ગાંધી અને લોકસભાના વિપક્ષના નેતા રાહુલ ગાંધીનો સમાવેશ થાય છે, તેમને નિશાન બનાવવાનો પ્રયાસ છે. વાડ્રાએ EDની તપાસમાં સહકાર આપ્યો હોવાનો દાવો કર્યો છે અને પોતાને નિર્દોષ સાબિત થવાનો વિશ્વાસ વ્યક્ત કર્યો છે.

2012માં પ્રથમ વખત કેસ સામે આવ્યો હતો

આ કેસ સૌપ્રથમ 2012માં ત્યારે ચર્ચામાં આવ્યો જ્યારે હરિયાણાના વરિષ્ઠ IAS અધિકારી અશોક ખેમકાએ જે તે સમયે લેન્ડ કન્સોલિડેશન એન્ડ લેન્ડ રેકોર્ડ્સના ડિરેક્ટર જનરલ હતા. આ જમીન સોદાની મ્યુટેશન રદ કરી હતી. ખેમકાએ જણાવ્યું હતું કે આ સોદો રાજ્યના કન્સોલિડેશન એક્ટ અને સંબંધિત પ્રક્રિયાઓનું ઉલ્લંઘન કરે છે. આ પછી સપ્ટેમ્બર 2018માં ગુરુગ્રામ પોલીસે ભૂપિન્દર સિંહ હુડ્ડા, રોબર્ટ વાડ્રા, DLF અને ઓનકારેશ્વર પ્રોપર્ટીઝ સામે ચીટિંગ, ફોર્જરી, ગુનાહિત ષડયંત્ર અને પ્રિવેન્શન ઓફ કરપ્શન એક્ટ હેઠળ FIR નોંધી હતી. EDએ ડિસેમ્બર 2018માં આ FIRના આધારે મની લોન્ડરિંગ કેસ નોંધ્યો હતો.

આ પણ વાંચો-કર્ણાટકના CEOએ Rahul Gandhiને મોકલી નોટિસ: ડબલ વોટિંગના આરોપો અંગે જણાવ્યું સત્ય