PM MODI અમેરિકી સંસદને સંબોધીત કરી નેલ્સન મંડેલાની બરોબરી કરશે

વડાપ્રધાન નરેન્દ્ર મોદી ટૂંક સમયમાં અમેરિકાના પ્રવાસે જવાના છે. તમને જણાવી દઈએ કે પીએમ મોદી તેમની મુલાકાત દરમિયાન અમેરિકી સંસદના સંયુક્ત સત્રને પણ સંબોધિત કરશે. તેઓ આ સત્રને સંબોધિત કરી મહાન નેતા નેલ્સન મંડેલાની બરાબરી કરશે. યુએસ સંસદના સંયુક્ત સત્રમાં પીએમ મોદીના સંબોધનથી ભારતીય કોકસના સાંસદો ખૂબ જ ખુશ છે. ભારતીય-અમેરિકન ધારાશાસ્ત્રી અને ઈન્ડિયા કોકસના કો-ચેરમેન રો ખન્નાએ જણાવ્યું કે તે ઈન્ડિયા કોકસ જ છે જેણે હાઉસ ઓફ રિપ્રેઝન્ટેટિવ્સના સ્પીકર કેવિન મેકકાર્થીને પીએમ મોદીને ગૃહના સંયુક્ત સત્રને સંબોધિત કરવા માટે આમંત્રિત કરવાની અપીલ કરી હતી.

આ પહેલા 8 જૂન 2016ના રોજ વડાપ્રધાન નરેન્દ્ર મોદીએ તેમની અમેરિકા મુલાકાત દરમિયાન યુએસ હાઉસના સંયુક્ત સત્રને સંબોધિત કર્યું હતું. હવે તેઓ 22 જૂને તેમની આગામી મુલાકાત દરમિયાન બીજી વખત યુએસ હાઉસને સંબોધિત કરશે. આ સાથે પીએમ મોદી એવા કેટલાક મહાન નેતાઓની બરાબરી કરશે જેમણે યુએસ સંસદને બે કે તેથી વધુ વખત સંબોધન કર્યું છે. દક્ષિણ આફ્રિકાના ભૂતપૂર્વ રાષ્ટ્રપતિ અને રંગભેદ સામે લડનારા મહાન નેતા નેલ્સન મંડેલા અને ઈઝરાયેલના ભૂતપૂર્વ પીએમ યિત્ઝાક રાબિન પણ બે વાર યુએસ સંસદને સંબોધિત કરી ચૂક્યા છે.  વિન્સ્ટન ચર્ચિલ અને ઇઝરાયેલના વર્તમાન પીએમ બેન્જામિન નેતન્યાહૂએ યુએસ હાઉસને ત્રણ-ત્રણ વાર સંબોધન કર્યું છે.

આ સંદર્ભમાં પીએમ મોદી તેમની આગામી યુએસ મુલાકાતમાં તેમના પુરોગામી રાજીવ ગાંધી અને અટલ બિહારી વાજપેયી તેમજ મનમોહન સિંહ અને પીવી નરસિમ્હા રાવને પાછળ છોડી દેશે. આ નેતાઓએ યુએસ હાઉસના સંયુક્ત સત્રને એક-એક વાર સંબોધન કર્યું છે. રાજીવ ગાંધી ભારતના પ્રથમ વડાપ્રધાન હતા, જેમણે 1985માં પ્રથમ વખત યુએસ હાઉસને સંબોધિત કર્યું હતું. હવે તેમના આગામી પ્રવાસમાં પીએમ મોદી બીજી વખત યુએસ કોંગ્રેસને સંબોધિત કરશે.

અમેરિકાના ભારતીય મૂળના સાંસદ અને અન્ય ઘણા સાંસદો PM મોદીના ગૃહમાં સંબોધનને લઈને ખૂબ જ ઉત્સાહિત છે. પીએમ મોદીને મોકલવામાં આવેલા આમંત્રણ પત્રમાં લખ્યું છે કે યુએસ હાઉસના બંને ગૃહો વતી 22 જૂન 2023ના રોજ ગૃહના સંયુક્ત સત્રને સંબોધિત કરવું અમારા માટે સન્માનની વાત હશે. આમંત્રણ પર કેવિન મેકકાર્થી, સેનેટ લીડર ચક શૂમર, મિચ મેકકોનેલ, હકીમ જેફ્રીઝ દ્વારા પણ હસ્તાક્ષર કરવામાં આવ્યા છે. PM મોદીના ગૃહને સંબોધનને લઈને ઘણા અમેરિકન સાંસદો ઉત્સાહિત છે.

આ પણ વાંચો---કોંગ્રેસના કદાવર નેતાનું ચોંકાવી દે તેવું નિવેદન, 1.5 અરબની વસ્તીવાળા દેશના PM દરેક જગ્યાએ સન્માનના હકદાર