કેદારનાથ-બદ્રીનાથના પહાડો પર હિમવર્ષા, કેદારનાથ ધામ બરફની ચાદરમાં ઢંકાયું

• કેદારનાથ-બદ્રીનાથ હિમવર્ષા
• પહાડી વિસ્તારોમાં સફેદ બફની ચાદર
• કેદારનાથ મંદિર સંપૂર્ણપણે સફેદ ચાદરથી ઢંકાયું

Snowfall :ઉત્તરાખંડના ઘણા જિલ્લાઓમાં 8મી ડિસેમ્બરની બપોર બાદ વાતાવરણમાં પલટો આવ્યો હતો અને આકાશ વાદળછાયું થવા લાગ્યું હતું અને ભારે પવનને કારણે તાપમાનનો પારો નીચે ગયો હતો. આ શિયાળાની મોસમની પ્રથમ હિમવર્ષા ચકરાતા અને હરસિલમાં નોંધાઈ છે, જેના કારણે આ ભાગોમાં ઠંડી વધી ગઈ છે.જેમાં કેદારનાથ, બદ્રીનાથ સહિતના ઊંચાઈવાળા પહાડી વિસ્તારોમાં રવિવારે મોડી સાંજે હિમવર્ષા ચાલુ રહી હતી. દેહરાદૂન સ્થિત હવામાન કેન્દ્રના જણાવ્યા અનુસાર, કેદારનાથમાં મહત્તમ તાપમાન માઈનસ આઠ અને લઘુત્તમ તાપમાન માઈનસ 11 ડિગ્રી સેલ્સિયસ પર પહોંચી ગયું છે. હવામાન વિભાગના જણાવ્યા અનુસાર તાપમાનનો પારો વધુ નીચે જવાની શક્યતા છે.

ઉત્તરાખંડ અને હિમાચલ પ્રદેશના શહેરોમાં કેદારનાથ-બદ્રીનાથથી લઈને શિમલા સુધી સિઝનની પ્રથમ હિમવર્ષા જોવા મળી છે.

પહાડી વિસ્તારોમાં બધે જ બરફની સફેદ ચાદર જોવા મળે છે. રસ્તાઓથી માંડીને વૃક્ષો, છોડ અને મકાનો બધું જ સુંદર લાગે છે કારણ કે તે બરફથી ઢંકાયેલું છે.

કેદારનાથમાં હિમવર્ષાની તસવીર સામે આવી છે. જેમાં કેદારનાથ મંદિર સંપૂર્ણપણે બરફની સફેદ ચાદરથી ઢંકાયેલું છે. પહાડો પર થઈ રહેલી હિમવર્ષાની અસર મેદાની વિસ્તારોમાં પણ આગામી દિવસોમાં જોવા મળશે. ઠંડીમાં વધારો થતાં તાપમાનનો પારો વધુ નીચે જવાની શક્યતા છે.

ચમોલી, ઔલી, જોશીમઠ, બદ્રીનાથ સહિત ઘણા ઊંચાઈવાળા સ્થળોએ સિઝનની પ્રથમ હિમવર્ષાથી પર્વતો ગુંજી ઉઠ્યા છે. પ્રવાસીઓના ચહેરા પણ ચમકી ઉઠ્યા છે. ઉત્તરાખંડના પહાડી વિસ્તારોમાં હિમવર્ષા થઈ રહી છે અને મેદાની વિસ્તારોમાં હળવા વાદળો જોવા મળી રહ્યા છે. ઉધમ સિંહ નગર સહિત પહાડોના ઘણા વિસ્તારોમાં બે થી ચાર ઈંચ હિમવર્ષા નોંધાઈ છે.

કેદારનાથ ધામમાં ભારે હિમવર્ષા બાદ ધામમાં ચાલી રહેલ કામ પણ હાલ પુરતું બંધ કરી દેવામાં આવ્યું છે. વધુ ઊંચાઈએ હિમવર્ષાના કારણે નીચાણવાળા વિસ્તારોમાં ઠંડો પવન ફૂંકાવા સાથે તીવ્ર ઠંડીનો અહેસાસ થયો હતો.

હવામાન વિભાગે હિમાચલ પ્રદેશ અને ઉત્તરાખંડમાં હિમવર્ષા બાદ રસ્તાઓ બરફથી ઢંકાઈ જવાની આગાહી કરી છે. વાહનો પર બરફનો જાડો પડ પણ દેખાય છે.

આ સાથે હળવા ઝરમર વરસાદ પણ જોવા મળ્યો હતો. જિલ્લાના અનેક વિસ્તારોમાં હળવા વાદળો અને ઝરમર વરસાદ જોવા મળ્યો હતો. હિમવર્ષા બાદ ગંગોત્રી ધામમાં બરફનો જાડો પડ દેખાય છે.સિમલામાં સિઝનની પ્રથમ હિમવર્ષા પણ જોવા મળી હતી. શિમલામાં હિમવર્ષા દરમિયાન તાપમાનમાં ઘટાડો નોંધાયો હતો. આ સમયગાળા દરમિયાન 2-3 ડિગ્રીનો ઘટાડો નોંધાયો છે.