SCOની મંત્રી સ્તરની બેઠકમાં ચીન અને રશિયાના રક્ષા મંત્રીઓ ભાગ લેશે

અહેવાલ -રવિ પટેલ 

ચીનના સંરક્ષણ પ્રધાન લી શાંગફુ અને રશિયાના સંરક્ષણ પ્રધાન સર્ગેઈ શોઇગુ આવતા અઠવાડિયે ભારતમાં શાંઘાઈ કોઓપરેશન ઓર્ગેનાઈઝેશન (SCO)ની મહત્વપૂર્ણ બેઠકમાં ભાગ લેશે. SCO સંરક્ષણ મંત્રી સ્તરની બેઠક ભારતની અધ્યક્ષતામાં 27 અને 28 એપ્રિલે યોજાશે. જો કે આ બેઠકમાં પાકિસ્તાનના રક્ષા મંત્રી ખ્વાજા આસિફની ભાગીદારી અંગે હજુ સુધી પુષ્ટિ થઈ નથી. ખ્વાજા વીડિયો કોન્ફરન્સિંગ દ્વારા બેઠકમાં ભાગ લઈ શકે છે.

આ ઘટનાની જાણકારી ધરાવતા લોકોએ કહ્યું કે પાકિસ્તાન સિવાય, ચીન, રશિયા સહિત અન્ય SCO સભ્યોએ બેઠકમાં તેમના સંરક્ષણ પ્રધાનોની ભાગીદારીની પુષ્ટિ કરી છે. જોકે SCO સભ્યોએ હજુ સુધી સત્તાવાર જાહેરાત કરી નથી. જો લી ભારત આવશે તો ત્રણ વર્ષ પહેલા લદ્દાખમાં સરહદી તણાવ બાદ ચીનના સંરક્ષણ પ્રધાન દેશમાં પ્રથમ વખત હશે.

રક્ષા મંત્રીઓની બેઠક બાદ 4 અને 5 મેના રોજ ગોવામાં SCO સભ્યોના વિદેશ મંત્રીઓની બેઠક યોજાશે. તમને જણાવી દઈએ કે ભારત આ વર્ષે G-20ની સાથે SCOની પણ અધ્યક્ષતા કરી રહ્યું છે. પાકિસ્તાનના વિદેશ મંત્રી બિલાવલ ભુટ્ટો સહિત તમામ SCO સભ્ય દેશોના વિદેશ મંત્રીઓ આ બેઠકમાં ભાગ લેવાના છે. SCO વિદેશ મંત્રીઓની બેઠકમાં ભાગ લેવા માટે પાકિસ્તાને બિલાવલ ભુટ્ટોની ભારત મુલાકાતની પુષ્ટિ કરી દીધી છે.

બેઠકમાં પ્રાદેશિક સુરક્ષા સંબંધિત મુદ્દાઓ પર ચર્ચા થવાની અપેક્ષા
SCO સંરક્ષણ મંત્રી સ્તરની બેઠકમાં આતંકવાદના ખતરા અને અફઘાનિસ્તાનની સ્થિતિ સહિત પ્રાદેશિક સુરક્ષા સંબંધિત વિવિધ મુદ્દાઓ પર ચર્ચા થવાની અપેક્ષા છે. આ બેઠકની અધ્યક્ષતા રક્ષા મંત્રી રાજનાથ સિંહ કરશે. SCO સભ્ય દેશોમાં ભારત, રશિયા, ચીન, કિર્ગિસ્તાન, કઝાકિસ્તાન, તાજિકિસ્તાન, ઉઝબેકિસ્તાન અને પાકિસ્તાનનો સમાવેશ થાય છે.

આપણ  વાંચો-ચીનના ગુપ્ત પોલીસ સ્ટેશન શું છે, તેઓ કેવી રીતે કામ કરે છે, જાણો