ડભોઇમાં પરિણીતાને રંજાડતો રોમિયો જેલના સળિયા પાછળ ધકેલાયો

વડોદરા (Vadodara) જીલ્લાના ડભોઇમાં પરિણીત યુવતીને પરેશાન કરતા રોમિયોને ડભોઇ પોલીસે ઝડપી લીધો છે.

પ્રાપ્ત માહિતી મુજબ ડભોઇમાં રહેતી યુવતીના થોડા સમય પહેલા લગ્ન વડોદરા થયા હતા અને ત્યારબાદ કોઇ કારણોસર તે રહેવા માટે પિયર ડભોઇ આવી હતી. દરમિયાન, તેની જ સોસાયટીમાં રહેતા પૃથ્વીરાજસિંહ રામસિંહ ચૌહાણે તેને પરેશાન કરવાનું શરુ કર્યું હતું.  પૃથ્વીરાજસિંહ રામસિંહ ચૌહાણ કે ખાણખનીજ વિભાગમાં મસ્ટર ઉપર સર્વેયર‌ તરીકે ફરજ બજાવે છે. પૃથ્વીરાજસિંહ રામસિંહ ચૌહાણ પરિણીતા જ્યારે તે પોતાના પિતાને ઘરે રહેવા આવતી હતી ત્યારે તેની સામે બિભત્સ ઈશારા અને અશ્લિલ હરકતો કરતો અને હેરાન પરેશાન કરતો હતો. જેથી પરણીતા પિયરમાં આવે તો ઘરની બહાર પગ મુકતા ગભરાતી હતી.

આ શખ્સે પરિણીતાને ફોન પર ધમકી પણ આપી હતી કે તારુ લગ્ન જીવન ખરાબ કરી નાખીશ. વારંવારની ધમકીથી યુવતી ત્રાસી ગઇ હતી અને પોતાના પતિ અને માતા-પિતાને આ ઘટના અંગે વાત કરતા ઘરના સભ્યોએ પરિણીતાને હિંમત આપી હતી. જેથી ન્યાય મેળવવા આ શખ્સ વિરુદ્ધ ડભોઇ પોલીસ સ્ટેશનમાં ફરીયાદ નોંધાવી હતી. 

ડભોઇના પી.આઇ. એસ.જે. વાધેલાએ ખાણખનીજ વિભાગમાં સર્વેયર તરીકે કામ કરતાં આ શખ્સને ઝડપી પાડી કાયદેસરની કાર્યવાહી કરી હતી અને તેને જેલનાં સળીયા પાછળ ધકેલી વધુ તપાસ હાથ ધરી છે. 

આ પણ વાંચો--અંતરિક્ષમાં ISROને મોટી સફળતા, SSLV-D2 ઉપગ્રહ લોન્ચ કરાયો