મહારાષ્ટ્રની રાજનીતિમાં આવી શકે છે નવો વળાંક, શિંદે બની શકે છે ડેપ્યુટી CM

મહારાષ્ટ્રમાં શિવસેના-એનસીપી અને કોંગ્રેસની ગઠબંધન સરકાર પડી ગઈ છે. ગઇ કાલે એટલે કે બુધવારે ઉદ્ધવ ઠાકરેએ મુખ્યમંત્રી પદ પરથી રાજીનામું આપી દીધું હતું. ત્યારે જ સ્પષ્ટ થઇ ગયું હતું કે, જે છેલ્લા કેટલાક દિવસોથી ચર્ચામાં હતું તે થયું એટલે કે ઉદ્ધવ ઠાકરેની સરકાર પડી ગઇ. 

હવે એવી અટકળો લગાવવામાં આવી રહી છે કે, ભાજપ રાજ્યમાં સરકાર બનાવી શકે છે. ભાજપ આ માટે શિવસેનાના બળવાખોર ધારાસભ્યોની મદદ લઈ શકે છે. ગઈકાલે રાત્રે ઉદ્ધવ ઠાકરેએ મુખ્યમંત્રી પદેથી રાજીનામું આપી દીધું હતું, ત્યારબાદ ભાજપ સક્રિય થઈ ગયું છે. કેટલીક તસવીરો સામે આવી છે જેમાં લોકો દેવેન્દ્ર ફડણવીસને મીઠાઈ ખવડાવતા જોવા મળી રહ્યા છે. આ બાબતના જાણકાર લોકોએ કહ્યું કે ભાજપ અને શિંદે જૂથ (જે ગોવામાં છે) સરકારની રચના સંબંધિત ઘણી બેઠકો યોજવાના છે. ભાજપના એક નેતાએ જણાવ્યું હતું કે દાવો ક્યારે કરવો તે અંગે કોઈ અંતિમ નિર્ણય લેવામાં આવ્યો નથી અને તે શિંદે કેમ્પ સાથે સત્તા-શેરિંગ કરારને અંતિમ સ્વરૂપ આપ્યા પછી કેન્દ્રીય નેતૃત્વની અંતિમ મંજૂરી પર આધાર રાખે છે. તેમણે કહ્યું કે, "વિધાનસભ્ય પક્ષની બેઠક, નેતાની ચૂંટણી એ માત્ર ઔપચારિકતા છે, જે કોઈપણ સમયે થઈ શકે છે. વિપક્ષના નેતા [ફડણવીસ] વિધાનસભામાં પક્ષનું નેતૃત્વ કરે છે, તેથી નેતાને ફરીથી ચૂંટવાની કોઈ ઔપચારિક જરૂર રહેશે નહીં."

આ પણ વાંચો - મહારાષ્ટ્રમાં ફ્લોર ટેસ્ટ પહેલા મુખ્યમંત્રી ઉદ્ધવ ઠાકરેનું રાજીનામું, ફેસબૂકના માધ્યમથી જાહેરાત