ગોધરામાં તબીબોની હડતાળની અસર, 2 મૃતદેહ રઝળી પડયા

રાજ્યભરમાં હાલ સરકારી ઇન સર્વિસ તબીબોની હડતાળને પગલે દર્દીઓ તેમજ પરિજનો ભારે હાલાકીનો સામનો કરી રહ્યા છે. ત્યારે પંચમહાલ જિલ્લાની સૌથી મોટી ગણાતી ગોધરા સિવિલ હોસ્પિટલમાં પી એમ માટે લાવવામાં આવેલા 2 મૃતદેહો પી એમ વગર રઝળી પડ્યા હતા. ગોધરા તાલુકાના ગ્રામ્ય વિસ્તારમાં ગઈકાલે પ્રેમી પંખીડાએ આત્મહત્યા કરી હતી. ત્યાર બાદ મૃતદેહોને લઈને પરિજનો ગોધરા સિવિલ હોસ્પિટલમાં ગઈકાલે 6 વાગ્યાના સુમારે લાવવામાં આવ્યા હતા. ત્યાર બાદ આજે વહેલી સવારથી તમામ પોલીસ કાર્યવાહી પૂર્ણ થયા બાદ પરિજનો દ્વારા બન્ને મૃતદેહો ના પીએમ કરવા માટે ગોધરા સિવિલ હોસ્પિટલના ઇમરજન્સી વિભાગમાં હાજર તેમજ અન્ય તમામ સ્ટાફ ને અનેક વખત રજુઆત કર્યા બાદ પણ મૃતદેહોનું પોસ્ટમોર્ટમ કરવામાં આવ્યું ન હતું. હાજર તબીબએ હડતાળ હોવાનું જણાવી પી એમ કરવાની જ ના પાડી દઈને પરિજનો સાથે ઉદ્ધતાઈભર્યું વર્તન કરવામાં આવ્યું હતું.

12 કલાક ઉપરાંતનો સમય વીતવા છતાંપણ સિવિલ હોસ્પિટલ ગોધરાના સત્તાધીશો દ્વારા મોતનો મલાજો પણ ન જાળવ્યો હતો. સમગ્ર મામલે મીડિયા દ્વારા ઇમરજન્સી વિભાગમાં હાજર તબીબને પૂછવામાં આવતા તબીબ દ્વારા મીડિયા સાથે પણ ગેરવર્તણૂક કરી હતી.આરોગ્ય મંત્રી નિમિષા સુથાર દ્વારા તાત્કાલિક કાર્યવાહી કરવા માટે સિવિલ સત્તાધીશોને જણાવતા બન્ને મૃતદેહોનું પીએમ 20 કલાક બાદ કરવામાં આવ્યું હતું.