કાંકરિયા કાર્નિવલના સમયમાં ફેરફાર, તમે પણ જવાનો હોય તો રાખજો ધ્યાન

ચીન સહિત અન્ય દેશોમાં સતત વધી રહેલા કોરોના સંક્રમણને જોતા ભારત સહિત ગુજરાત સરકાર એલર્ટ થઈ ગઈ છે. આ વચ્ચે અમદાવાદમાં (Ahmedabad)25 ડિસેમ્બરથી કાંકરિયા કાર્નિવલનો (Kankaria Carnival)પ્રારંભ થયો છે. રવિવારે મુખ્યમંત્રીશ્રી  ભૂપેન્દ્ર ભાઈ પટેલના (Bhupendra Bhai Patel)હસ્તે ઉદ્ઘાટન કરવામાં આવ્યું હતું. કોરોના કાળના બે વર્ષ બાદ કાંકરિયા કાર્નિવલનો પ્રારંભ કરવામાં આવ્યો છે. પરંતુ કોરોના સંક્રમણને જોતા અમદાવાદ મ્યુનિસિપલ કોર્પોરેશન (AMC)એલર્ટ મોડ પર આવી ગયું છે. હવે કોર્પોરેશન દ્વારા કાંકરિયા કાર્નિવલના સમયમાં ફેરફાર કરવામાં આવ્યો છે. 

કાંકરિયા કાર્નિવલ અમદાવાદની ઓળખ બની ચુક્યો છે. આ કાર્નિવલમાં દર વર્ષે લાખો લોકો મુલાકાત લેતા હોય છે. આ વર્ષે એક ભારત શ્રેષ્ઠ ભારત વિષયની થીમ સાથે કાંકરિયા કાર્નિવલનો પ્રારંભ થયો છે. પરંતુ કોરોના સંક્રમણને જોતા અમદાવાદ મહાનગર પાલિકાએ કાંકરિયા કાર્નિવલના સમયમાં ફેરફાર કર્યો છે. હવે આ કાર્નિવલનો સમય સાંજે 6થી રાત્રે 9 કલાક સુધીનો રહેશે. નોંધનીય છે કે પહેલા કાંકરિયા કાર્નિવલનો સમય સાંજે 7થી રાત્રે 10 કલાક સુધીનો હતો. અમદાવાદ મહાનગર પાલિકાએ આપેલી માહિતી અનુસાર રાત્રે 8 કલાક પછી લોકોને કાંકરિયા કાર્નિવલમાં પ્રવેશ મળશે નહીં. વધુ લોકો કાર્નિવલમાં ભેગા ન થાય તે માટે નિર્ણય લેવામાં આવ્યો છે. 

આપણ  વાંચો - લાખો રૂપિયાની ઇ-સિગરેટ સાઇબર ક્રાઇમ બ્રાન્ચે કબ્જે કરી