પંચમહાલના 4 પોલીસ અધિકારીને DGP's Commendation Disc એનાયત

DGP's Commendation Disc - 2020 માટે પંચમહાલ જિલ્લામાંથી પસંદગી પામેલા 4 પોલીસ અધિકારી - કર્મચારીઓને આજે ગુજરાત પોલીસ અકાદમી,કરાઈ ખાતે પોલીસના ઉચ્ચ અધિકારીઓ દ્વારા મેડલ એનાયત કરાશે જેથી પંચમહાલ જિલ્લા પોલીસ બેડામાં હર્ષની લાગણી પ્રવર્તી છે. અત્રે ઉલ્લેખનીય છે કે આ મેડલ રાજ્ય પોલીસ વિભાગમાં ફરજ બજાવતા અધિકારીઓ - કર્મચારીઓને તેમની સંપૂર્ણ ફરજ દરમિયાન કરવામાં આવતી વિશિષ્ટ કામગીરીઓને ધ્યાને લઈને આપવામાં આવે છે. જેમ કે પંચમહાલ જિલ્લા પોલીસ વડા હિમાંશુ સોલંકીએ તેઓની સુરત ખાતેની ફરજ દરમિયાન સુરત A ડિવિઝન વિસ્તારમાં પાટીદાર આંદોલન વખતે કાયદો અને વ્યવસ્થાની સ્થિતિ જાળવવા તેમજ ગાંધીનગર ખાતે ઇન્ટેલિજન્સ બ્યુરોમાં કરવામાં આવેલી વિશિષ્ટ કામગીરીને લઈને તેમની આ મેડલ માટે પસંગદી કરવામાં આવી છે. જ્યારે પંચમહાલ જિલ્લા એલસીબીમાં હાલમાં ફરજ બજાવતા રાજેન્દ્રસિંહ સિસોદીયાએ કડાણા , પાનમ ડેમમાથી પાણી છોડાતા શહેરા પોલીસ સ્ટેશનના નદી કાંઠાના ગામમા મત્સ્યગંધા બોટમા સતત ત્રણ દિવસ વરસતા વરસાદમાં પુરગ્રસ્ત વિસ્તારમા જાનમાલની ખુવારી અટકાવી માલ સામાન સલામત સ્થળે ખસેડવાની તેમજ જનમેદની ઉગારવાનુ કામ કર્યું છે. જયારે હાલોલ પોલીસમથક વિસ્તારમાં વિદેશી દારૂની ગાડીને પકડવા માટે પોતાની જાનની પરવા કર્યા વગર તે ગાડીનો પીછો ફિલ્મી ઢબે કરી તમામ મુદ્દામાલ સાથે આરોપીને પણ ઝડપી પાડ્યો હતો. હાલમાં પંચમહાલ જિલ્લા પેરોલ ફર્લો સ્ક્વોડમાં ફરજ બજાવતા નાદિરઅલી સૈયદએ વોન્ટેડ આરોપી તેમજ જેલમાંથી ભાગી ગયેલા આરોપીઓને ખૂબ જ ટૂંકા સમયમાં ઝડપી પાડ્યા હતા. તેઓએ 35 વર્ષ પહેલા નોંધાયેલા ગંભીર પ્રકારના હત્યા તેમજ બળાત્કારના ગુન્હા આરોપીઓને રાજ્ય તેમજ રાજ્ય બહારથી પકડી લાવવાની કામગીરી કરી હતી.