શિવસેના સામે બળવો કરનાર મંત્રી એકનાથ શિંદેએ પહેલી પ્રતિક્રિયા આપી છે. તેમણે કહ્યું કે અમે બાળાસાહેબના મજબૂત શિવસૈનિક છીએ, બાળાસાહેબે અમને હિન્દુત્વ શીખવ્યું છે. બાળાસાહેબના વિચારો અને ધરમવીર આનંદ દિઘે સાહેબના ઉપદેશો અંગે અમે ક્યારેય છેતરપિંડી કરી નથી અને ક્યારેય સત્તા માટે છેતરપિંડી કરીશું નહીં.

મહારાષ્ટ્રમાં રાજકીય સંકટ સર્જાયું છે અને મંત્રી એકનાથ શિંદે તેમના સમર્થક ધારાસભ્યો સાથે સુરત પહોંચ્યા છે અને તમામ ધારાસભ્યો હોટેલમાં રોકાયા છે. દરમિયાન તેમણે ટ્વિટ કર્યું હતું કે અમે બાળા સાહેબના મજબૂત શિવસૈનિક છીએ, બાળાસાહેબે અમને હિન્દુત્વ શીખવ્યું છે. બાળાસાહેબના વિચારો અને ધરમવીર આનંદ દિઘે સાહેબના ઉપદેશો અંગે અમે ક્યારેય છેતરપિંડી કરી નથી અને ક્યારેય સત્તા માટે છેતરપિંડી કરીશું નહીં.

દરમિયાન,શિવસેનાએ એકનાથ શિંદેને ધારાસભ્ય દળના નેતાપદ પરથી હટાવવાનો નિર્ણય કર્યો છે. સીવડીના ધારાસભ્ય અજય ચૌધરી શિવસેના ધારાસભ્ય દળના નવા નેતા હશે.

મહારાષ્ટ્ર વિધાન પરિષદની ચૂંટણીમાં સત્તાધારી મહા વિકાસ આઘાડી (MVA) ને મળેલા આંચકા પછી, મહારાષ્ટ્રના મંત્રી એકનાથ શિંદે અને શિવસેનાના અન્ય કેટલાક ધારાસભ્યો ગુજરાતના સુરત શહેરની એક હોટલમાં પડાવ નાખી રહ્યા છે. સૂત્રોએ જણાવ્યું હતું કે પાર્ટીના નેતૃત્વથી નારાજ કેટલાક ધારાસભ્યો સોમવારે રાત્રે સુરત પહોંચ્યા હતા અને અહીંની લે મેરીડિયન હોટલમાં રોકાયા છે. હોટલની બહાર ભારે સુરક્ષા દળ તૈનાત કરવામાં આવ્યું છે.

મહારાષ્ટ્ર વિધાન પરિષદની 10 બેઠકો માટે સોમવારે યોજાયેલી ચૂંટણીમાં ભારતીય જનતા પાર્ટી (BJP) એ તમામ પાંચ બેઠકો પર જીત મેળવી હતી જેના પર તેણે ઉમેદવારો ઉભા રાખ્યા હતા. શિવસેના અને રાષ્ટ્રવાદી કોંગ્રેસ પાર્ટી (NCP)ને બે-બે બેઠકો મળી હતી જ્યારે કોંગ્રેસને માત્ર એક બેઠકથી સંતોષ માનવો પડ્યો હતો.

રાજ્યસભાની ચૂંટણી પછી, મહારાષ્ટ્રમાં ભાજપ તરફથી મહારાષ્ટ્રમાં સત્તાધારી ગઠબંધન મહા વિકાસ અઘાડી (MVA) માટે આ બીજો મોટો આંચકો છે. MVAમાં શિવસેના, રાષ્ટ્રવાદી કોંગ્રેસ પાર્ટી (NCP) અને કોંગ્રેસનો સમાવેશ થાય છે.