જેન્ટલમેન ગેમ થઇ બદનામ, યુસુફ પઠાણને ઓસ્ટ્રેલિયાના આ ખેલાડીએ માર્યો ધક્કો, જુઓ Video

લેજેન્ડ્સ લીગ ક્રિકેટમાં રવિવારે જોધપુરના બરકતુલ્લા ખાન સ્ટેડિયમમાં ભીલવાડા કિંગ્સ અને ઈન્ડિયા કેપિટલ્સ વચ્ચે મેચ રમાઈ હતી. તે ક્વોલિફાયર મેચ હતી. આ દરમિયાન મિશેલ જોનસન અને યુસુફ પઠાન વચ્ચે ઉગ્ર બોલાચાલી થઈ હતી. મેચની 19મી ઓવરના છેલ્લા બોલ પર મિશેલ જોનસને યુસુફ પઠાનને આઉટ કર્યો હતો, પરંતુ તે પહેલા પઠાને જોનસનને ખૂબ ધોલાઇ કરી હતી. તેણે પહેલા ત્રણ બોલમાં સિક્સર, ફોર અને પછી સિક્સર ફટકારી હતી. જોકે, મિશેલ જોનસનને છેલ્લા બોલ પર સફળતા મળી અને યુસુફ પઠાન ડીપ મિડ-વિકેટ વિસ્તારમાં કેચ આઉટ થયો. વિકેટ મળ્યા બાદ એવું લાગી રહ્યું હતું કે જોનસન પઠાનને કંઈક કહી રહ્યો હતો. જ્યારે પઠાનના કાનમાં કેટલાક શબ્દો પડ્યા તો તે પોતાનો વિરોધ વ્યક્ત કરવા માટે મિશેલ જોનસન પાસે ગયો અને આ વાત વધી. થોડી જ વારમાં બંને ભૂતપૂર્વ દિગ્ગજો સામસામે આવી ગયા. એવું લાગતું હતું કે તેઓ એકબીજા સાથે લડશે. જ્યારે પઠાન જોનસનની ખૂબ નજીક આવ્યો ત્યારે જોનસને તેને ધક્કો પણ માર્યો હતો. આ પછી પણ યુસુફ પઠાન પીછેહઠ ન કરી અને પોતાનો વિરોધ નોંધાવતો રહ્યો. આ પછી મામલો વધુ ગંભીર થતો જણાતા મહિલા અમ્પાયરને વચ્ચે આવવું પડ્યું અને બંનેને એકબીજાથી દૂર લઈ ગયા.

ઉલ્લેખનીય છે કે, મેચની વાત કરીએ તો તેની ટીમ ભીલવાડા કિંગ્સ તરફથી રમતા યુસુફ પઠાણે 24 બોલમાં 48 રનની શાનદાર ઇનિંગ રમી હતી, જોકે તે પોતાની અડધી સદી પૂરી કરી શક્યો નહોતો. જ્યારે મિશેલ જોનસને ચાર ઓવરમાં કુલ 51 રન આપ્યા અને બે વિકેટ લેવામાં સફળ રહ્યો. ભીલવાડા કિંગ્સે 20 ઓવરમાં પાંચ વિકેટે 226 રન બનાવ્યા હતા, પરંતુ ઈન્ડિયા કેપિટલ્સે ત્રણ બોલ બાકી રહેતા છ રનમાં લક્ષ્યનો પીછો કર્યો હતો અને મેચ ચાર વિકેટે જીતી લીધી હતી. ઈન્ડિયા કેપિટલ્સ તરફથી રોસ ટેલરે 39 બોલમાં 84 રનની શાનદાર ઈનિંગ રમી હતી જ્યારે એશ્લે નર્સે 28 બોલમાં 60 રન બનાવ્યા હતા.