સંકટ સમયે ભારતે કરી મદદ, PM મોદી અમે તમારા આભારી છીએ: સનથ જયસુર્યાં

શ્રીલંકા આજે એક ગંભીર આર્થિક સંકટથી પસાર થઇ રહ્યું છે. અહીં પરિસ્થિતિ એટલી હદ સુધી ખરાબ થઇ ચુકી છે કે, લોકોને ભૂખ્યા પેટે રાત્રિમાં સુવુ પડી રહ્યું છે, આ ઉપરાંત અહીં લોકો પંપ પર પેટ્રોલ અને ડીઝલ ખરીબવા માટે 35 થી 40 કલાક સુધી લાઇનમાં ઉભા પોતાનો સમય આવવાની રાહ જોઇ રહ્યા છે. 

આવી સ્થિતિમાં શ્રીલંકાને ચીને પણ કોઇ મદદ કરી નથી. ત્યારે પડોશી ધર્મમાં માનતું ભારત આખરે તેની મદદે આગળ આવ્યું છે. ઘણા લોકો તેના વખાણ કરી રહ્યા છે. શ્રીલંકાના ક્રિકેટર સનથ જયસુર્યાંએ ભારતના વડાપ્રધાન નરેન્દ્ર મોદીના પગલાની પ્રશંસા કરી છે. સનથ જયસુર્યાંએ કહ્યું કે, પાડોશી તરીકે ભારત અમારો મોટો ભાઈ છે. ભારતે હંમેશા અમારી મદદ કરી છે. અમે ભારત સરકાર અને વડાપ્રધાન નરેન્દ્ર મોદીના આભારી છીએ. વર્તમાન પરિસ્થિતિને જોતા અમારા માટે જીવવું ખૂબ મુશ્કેલ દેખાઇ રહ્યું છે. 

મીડિયા સાથે વાત કરતા પૂર્વ ક્રિકેટર જયસૂર્યાંએ કહ્યું કે, લોકો હવે શ્રીલંકાની સરકાર સામે વિરોધ કરવા લાગ્યા છે. તેઓ સરકારને બતાવી રહ્યા છે કે, તેઓ પીડિત છે. જો સંબંધિત લોકો તેને યોગ્ય રીતે સંબોધશે નહીં, તો તે એક આફતમાં ફેરવાઈ જશે. અત્યારે તો તેની જવાબદારી વર્તમાન સરકારની રહેશે. શ્રીલંકાની વર્તમાન પરિસ્થિતિ પર શ્રીલંકાના પૂર્વ ક્રિકેટર સનથ જયસુર્યાંએ કહ્યું કે, દુર્ભાગ્યપૂર્ણ છે કે લોકો આ પરિસ્થિતિમાંથી પસાર થઈ રહ્યા છે. તેઓ આ રીતે ટકી શકતા નથી અને વિરોધ કરવા લાગ્યા છે. ગેસની અછત છે અને કલાકો સુધી વીજ પુરવઠો નથી.