પાકિસ્તાનમાં પૂર વચ્ચે ખૈબર પખ્તુનખ્વામાં મોટો આતંકી હુમલો, 5 લોકોના મોત

કહેવામાં આવી રહ્યું છે કે, આતંકવાદીઓએ સ્વાત જિલ્લાના કબાલ તહસીલની શાંતિ સમિતિના સભ્ય અને ગ્રામ સંરક્ષણ પરિષદના અધ્યક્ષ ઈદ્રિસ ખાનના વાહનને નિશાન બનાવ્યું હતું. વિસ્ફોટમાં ઈદ્રીસ ખાન, તેમનો સુરક્ષા ગાર્ડ અને બે પોલીસ અધિકારીઓ માર્યા ગયા છે. આ હુમલાની અત્યાર સુધી કોઈ આતંકવાદી સંગઠને જવાબદારી લીધી નથી. હાલ પોલીસ આ કેસની તપાસમાં લાગેલી છે. ખૈબર પખ્તુનખ્વા પ્રાંતના મુખ્યમંત્રી મહેમૂદ ખાને આ ઘટનાની નિંદા કરી છે. તેમણે ઘટનાનો વિગતવાર અહેવાલ પણ માંગ્યો છે. 

મહત્વનું છે કે, ગયા વર્ષે ઓગસ્ટમાં કાબુલમાંથી અમેરિકી સુરક્ષા દળોની પીછેહઠ બાદથી તાલિબાને અફઘાનિસ્તાન પર કબજો જમાવ્યો હતો, ત્યારબાદ પાકિસ્તાનમાં લક્ષ્યાંકિત હુમલાઓમાં વધારો થયો છે. આ પહેલા પણ અફઘાનિસ્તાનની સરહદ પાસેના એક શહેરમાં ત્રણ બાળકો સહિત પાંચ લોકોના મોત થયા હતા અને લગભગ છ લોકો ઘાયલ થયા હતા. પેશાવરમાં જ 4 માર્ચ, 2022ના રોજ મસ્જિદ પર આત્મઘાતી હુમલો થયો હતો, જેમાં 57 લોકો માર્યા ગયા હતા અને 200 લોકો ઘાયલ થયા હતા. શુક્રવારની નમાજ દરમિયાન આ બ્લાસ્ટ થયો હતો.