ઓવૈસીએ હિજાબ વિવાદ પર આપી પ્રતિક્રિયા : તો શું હું મારી દાઢી કપાવી દઉં?

છેલ્લા ઘણા દિવસોથી હિજાબને લઇને ખૂબ વિવાદ ચાલી રહ્યો છે. પછી તે ઈરાનમાં હોય કે ભારતમાં. જીહા, આપણા દેશ ભારતમાં પણ આ મુદ્દે ખૂબ જ ચર્ચાઓ થઇ રહી છે. ત્યારે હવે ઓલ ઈન્ડિયા મજલિસ-એ-ઈત્તેહાદુલ મુસલમીન (AIMIM)ના વડા અને હૈદરાબાદના સાંસદ અસદુદ્દીન ઓવૈસીએ હિજાબ વિવાદ પર પ્રતિક્રિયા આપી છે. તેમણે કહ્યું કે, જેને બિકીની પહેરવી હોય તે પહેરો. તમે શા માટે ઈચ્છો છો કે મારી દીકરીઓ તેમનો હિજાબ ઉતારે અને હું મારી દાઢી કપાવું?

ઓવૈસીએ કહ્યું, શું હિજાબ મુસ્લિમોનું પછાતપણું દર્શાવે છે? તેમને પૂછવામાં આવ્યું કે શું મુસ્લિમ મહિલાઓ દેશના વિકાસમાં યોગદાન નથી આપી રહી? હિજાબ પ્રતિબંધ પર વિભાજિત ચુકાદા પછી, ઓવૈસીએ કહ્યું કે જો મુસ્લિમ મહિલાઓ તેમના માથાને ઢાંકવા માંગે છે, તો તેનો અર્થ એ નથી કે તેઓ તેમની બુદ્ધિને ઢાંકી રહી છે. હૈદરાબાદના સાંસદે કહ્યું કે, તેઓ કહે છે કે અમે અમારી છોકરીઓને ડરાવીએ છીએ. આજની દુનિયામાં કોને ડર લાગે છે? કર્ણાટકમાં હિજાબ પ્રતિબંધના વિવાદનો ઉલ્લેખ કરતા ઓવૈસીએ કહ્યું, “જ્યારે હિન્દુ, શીખ અને ખ્રિસ્તી વિદ્યાર્થીને તેમના ધાર્મિક વસ્ત્રો પહેરીને વર્ગમાં પ્રવેશવાની મંજૂરી આપવામાં આવે છે અને મુસ્લિમને રોકવામાં આવે છે, ત્યારે તેઓ મુસ્લિમ વિદ્યાર્થીઓ વિશે શું વિચારે છે? દેખીતી રીતે, તેઓ વિચારશે કે મુસ્લિમો આપણાથી નીચે છે."

ઉલ્લેખનીય છે કે, અસદુદ્દીન ઓવૈસીએ સ્પષ્ટ કહ્યું છે કે હિજાબને ભાજપે મોટો મુદ્દો બનાવ્યો છે. હૈદરાબાદના સાંસદે કહ્યું કે, મારા હિજાબ પર હાઈકોર્ટનો નિર્ણય કાયદાના મામલે ખરાબ હતો અને કુરાનની વાતોને ખોટી રીતે વાંચી છે. આ સાથે તેમણે કહ્યું કે, કર્ણાટકની છોકરીઓ હિજાબ પહેરે છે કારણ કે અલ્લાહે કુરાનમાં કહ્યું છે. ભાજપે તેને જરૂરિયાતનો મુદ્દો બનાવ્યો છે.

આ પણ વાંચો - અસદુદ્દીન ઓવૈસીની જાહેરાત,' બચ્ચે દો હી અચ્છે ' કાયદાનું સમર્થન નહીં કરે; આપ્યું આ કારણ