Gandhinagar માં પડેલા પહેલા જ વરસાદે તંત્રની ખોલી પોલ, રસ્તાઓ ધોવાઈ ગયા

Gandhinagar Rain : ગાંધીનગરમાં મોડી રાત્રે થયેલા ધોધમાર વરસાદે શહેરની વ્યવસ્થાઓની કમજોરીઓને ઉજાગર કરી દીધી છે. ભારે વરસાદના કારણે શહેરના ઘણા વિસ્તારોમાં પાણી ભરાઈ ગયા. શહેરના અંડરપાસ પણ આ વરસાદના કારણે પાણી ભરાઇ ગયું હતું, જેના કારણે અંડરપાસને બંધ કરવાની ફરજ પડી. શહેરમાં વિકાસના નામે થયેલા આડેધડ ખોદકામે રસ્તાઓ પર ખાડાનું સામ્રાજ્ય ઊભું કર્યું છે. આ એક જ વરસાદે ગાંધીનગર મહાનગરપાલિકાની ચોમાસા પૂર્વેની તૈયારીઓની ખામીઓને સ્પષ્ટ કરી દીધી છે.

ભારે વરસાદના પગલે ગાંધીનગરના મુખ્ય અંડરપાસ પાણીમાં ગરકાવ થઈ ગયા. મહાત્મા મંદિર અંડરપાસ સંપૂર્ણપણે વરસાદી પાણીથી ભરાઈ ગયો, જ્યારે સેક્ટર 21 અને 22ને જોડતો અંડરપાસ પણ પાણીમાં ડૂબી ગયો. આ સ્થિતિને કારણે સ્થાનિક વહીવટી તંત્રે આ અંડરપાસ બંધ કરી, બેરીકેટ મૂકીને વાહનવ્યવહાર રોકવાની ફરજ પડી. પરિણામે, વાહનચાલકોને લાંબા ચક્કર કાપવા પડ્યા, જેનાથી શહેરના ટ્રાફિક પર ભારે અસર પડી. આ સમસ્યા દર ચોમાસે ઉદ્ભવે છે, પરંતુ મહાનગરપાલિકા દ્વારા હજુ સુધી કોઈ કાયમી ઉકેલ લાવવામાં આવ્યો નથી, જેના કારણે નાગરિકોમાં રોષ ફેલાયો છે.