સોશિયલ મીડિયા થકી ગેંગ બનાવવાનો રાખતા હતા મનસૂબા, જાણો કોણ છે

ગુજરાત એટીએસની ગિરફતમાં હથિયાર સાથે આવેલા આરોપીઓમાં મુખ્ય આરોપી દેવેન્દ્ર બોરિચા અને ચાંપરાજ ખાખરે સોશિયલ મીડિયામાં પોતાના ગ્રૂપ બનાવ્યા હતા. આ ગ્રુપમાં હથિયાર સાથેના ફોટા, દારૂ પીતા હોય તેવા વિડીયો અને પોતે કરેલા ગુનાઓની એફ. આઈ.આર ની કોપીઓ પણ અપલોડ કરતા હતા. પોતે આચરેલા ગુનાના છપાયેલા સમાચારના ફોટા પણ અપલોડ કરતા હતા. ઉપરાંત જે લોકોએ તેમની પાસેથી હથિયારની ખરીદી કરી હોય તેવા લોકોને પણ  ગેંગના સભ્યો બનાવી લેતા હતા અને પોતાના સોશિયલ મિડીયા એકાઉન્ટના આઈ. ડી અને પાસવર્ડ પણ આપતા હતા જેથી તે લોકો પણ હથિયાર સાથેના ફોટા કે વિડીયો અપલોડ કરતા રહે.  સમાજમાં તે લોકોની ધાક બેસતી જાય.

Advertisement

ખંડણી,લૂંટ, મારામારી અને આર્મ્સ એક્ટ જેવા ગંભીર ગુનાઓ આ બંને આરોપીઓ દેવેન્દ્ર બોરિચા અને ચાંપરાજ ખાખર પર નોંધાયેલા છે. ઉલ્લેખનીય છે કે હાલ 24 જેટલા આરોપીઓ ગુજરાત એટીએસની ગિરફતમાં છે ત્યારે ગુજરાત એટીએસ હાલ આ આરોપીઓ કારતૂસ ક્યાંથી લાવવાના હતા અને બીજા કેટલા લોકો સંડોવાયેલા છે તેને લઈને તપાસ આગળ ધપાવી છે.

એક જમાનો હતો જ્યારે અમદાવાદ શહેરમાં ગેંગ એક્ટિવ રહેતી હતી પરંતુ છેલ્લા કેટલાક વર્ષોથી અને તેમાંય વિશાલ ગોસ્વામીની ગેંગની ધરપકડ થયા ત્યારબાદ હવે ગુજરાતમાં ગેંગવોર નામનો શબ્દ સાંભળવા આવ્યો નથી. કદાચ હજુ બીજા બે ત્રણ વર્ષ આ શબ્દ સાંભળવામાં પણ નહિ આવે. તેનું કારણ છે કે ગુજરાત એટીએસે 24 આરોપીઓની 54 હથિયાર સાથે ધરપકડ કરી લીધી છે જેથી ઊભી થતી એક ગેંગ નહિ પરંતુ કેટલીય ગેંગની કમર ગુજરાત એટીએસે તોડી નાખી છે. મહત્વનું છે કે ગુજરાત એટીએસ જે 24 આરોપીઓ પકડ્યા છે તેમાંથી મુખ્ય બે આરોપીઓ પોતાની ગેંગ સમગ્ર ગુજરાતમાં બનાવવા માંગતા અને આવનાર સમયમાં ગુજરાતને રક્ત રંજિત કરવાનો ઇરાદો ધરવાતા હતા.