જ્ઞાનવાપી મસ્જિદનો સર્વે પૂર્ણ, આવતી કાલે સુપ્રીમ કોર્ટમાં સુનાવણી

વારાણસીના જ્ઞાનવાપી મસ્જિદમાં ચાલી રહેલા સર્વે સામેની અરજી પર આવતીકાલે સુપ્રીમ કોર્ટમાં સુનાવણી થશે. જસ્ટિસ ડીવાય ચંદ્રચુડ અને પીએસ નરસિમ્હાની બેંચ અંજુમન ઈનાઝાનિયા મસ્જિદની મેનેજમેન્ટ કમિટિ દ્વારા દાખલ કરવામાં આવેલી અરજી પર સુનાવણી કરશે. નીચલી અદાલત દ્વારા જાહેર કરવામાં આવેલા સર્વેના આદેશને 1991ના પ્લેસ ઓફ વર્શીપ એક્ટ વિરુદ્ધ જણાવવામાં આવ્યું છે. 

જ્યાં સુધી રિપોર્ટ કોર્ટમાં રજૂ કરવામાં ન આવે ત્યાં સુધી વજ્જુખાનાને હિન્દુ પક્ષ સાચવવા તૈયાર છે. ત્રીસ બાય ત્રીસ ફૂટના વજ્જુખાનાની બરાબર મધ્યમાં એક આકૃતિ મળી આવી છે, જેના વિશે હિન્દુ પક્ષનો દાવો છે કે તે એક શિવલિંગ છે. જ્યારે મુસ્લિમ પક્ષનું કહેવું છે કે તે એક ફુવારાનો ભાગ છે અને આ ફુવારો 10 વર્ષ પહેલા કાર્યરત હતો. વજ્જુખાનામાં પાણી ભરવામાં આવ્યું છે જેથી નમાઝ પઢનારાઓને કોઈ મુશ્કેલી ન પડે. વજ્જુખાના સાથે કોઈ છેડછાડ ન કરી શકે તે માટે CRPFના સુરક્ષા જવાનો આ જગ્યા પર હાજર છે.

જ્ઞાનવાપી મસ્જિદમાં છેલ્લા 3 દિવસથી સર્વે ચાલી રહ્યો છે. આજે ત્રીજા દિવસે તળાવમાંથી પાણી કાઢી તેનો સર્વે કરવામાં આવ્યો હતો. કહેવામાં આવી રહ્યું છે કે તળાવમાં વોટર રેઝિસ્ટન્ટ કેમેરા લગાવીને વીડિયોગ્રાફી કરવામાં આવી હતી. શનિવારથી શરુ થયેલો સર્વે આજે પુર્ણ થયો છે. સર્વે પૂર્ણ થતા વારાણસી જિલ્લા અને પોલીસ પ્રશાસને તમામ હિતધારકોનો આભાર માન્યો હતો. તેમણે કહ્યું કે કોર્ટના આદેશ પર આ ત્રણ દિવસીય સર્વે કરવામાં આવ્યો છે. આમાં તમામ પક્ષોએ સહકાર આપ્યો હતો. વહીવટીતંત્રે લોકોને આ મામલે માત્ર સત્તાવાર નિવેદનો પર વિશ્વાસ કરવાની અપીલ કરી છે.

વારાણસીની જ્ઞાનવાપી મસ્જિદમાં શિવલિંગ મળી આવવાના મુદ્દે હિન્દુ પક્ષ હવે કોર્ટમાં પહોંચ્યો છે. કોર્ટે આદેશ આપ્યો છે કે જ્યાંથી શિવલિંગ મળી આવ્યું છે તેને તાત્કાલિક અસરથી સીલ કરવામાં આવે. આ સાથે આ સ્થળે કોઈપણ વ્યક્તિના પ્રવેશ પ્રતિબંધ મુકવામાં આવ્યો છે.

જ્ઞાનવાપી કેસમાં હિન્દુ પક્ષે દાવો કર્યો હતો કે અમને સર્વે દરમિયાન શિવલિંગ મળી આવ્યું છે. આ સાથે તળાવમાંથી મહત્વના પુરાવા પણ મળ્યા હોવાનું કહેવાય છે. જો કે મુસ્લિમ પક્ષે આ તમામ બાબતોને નકારી કાઢી છે. હિન્દુ પક્ષે દાવો કર્યો હતો કે, નંદીના મુખની સામે મસ્જિદમાં 12 ફૂટ 8 ઇંચ વ્યાસનું શિવલિંગ જોવા મળ્યું હતું.