વંદે ભારત એક્સપ્રેસ પર અજાણ્યા શખ્સોએ કર્યો હુમલો, ટ્રેનની બારીઓના તોડ્યા કાચ

વંદે ભારત એક્સપ્રેસ શરૂ થઇ ત્યારથી જ ચર્ચામાં રહી છે. વળી આ ટ્રેનને લઇને હવે એક સમાચાર મળી રહ્યા છે કે, બેંગલુરુમાં, કેટલાક લોકોએ હાઈ-સ્પીડ ટ્રેન વંદે ભારત એક્સપ્રેસ પર પથ્થરમારો કર્યો, જેના કારણે ટ્રેનની બારીઓને નુકસાન થયું છે. આ અંગે પશ્ચિમ રેલવે દ્વારા એક નિવેદન બહાર પાડવામાં આવ્યું છે. ટ્રેન કર્ણાટકના મૈસૂરથી તમિલનાડુની રાજધાની ચેન્નાઈ જઈ રહી હતી. રેલવેએ પોતાના નિવેદનમાં કહ્યું કે, 'આ ઘટનામાં કોઈને ઈજા થઈ નથી અને આ અંગે કેસ નોંધવામાં આવ્યો છે.'

બેંગલુરુમાં કેટલાક બદમાશોએ હાઈ-સ્પીડ ટ્રેન વંદે ભારત એક્સપ્રેસ પર પથ્થરમારો કર્યો હતો. આ હુમલાના કારણે ટ્રેનની બારીઓ ક્ષતિગ્રસ્ત થઇ છે. આ ઘટના કૃષ્ણરાજપુરમ અને બેંગલુરુ કેન્ટોનમેન્ટ રેલવે સ્ટેશન વચ્ચે બની હતી. હુમલામાં કોઈને ઈજા થઈ હોવાના અહેવાલ નથી. આ સંદર્ભમાં DMRCના એક વરિષ્ઠ અધિકારીએ જણાવ્યું હતું કે, "કેટલાક તોફાની તત્વોએ ટ્રેન નંબર 20608 મૈસુર-ચેન્નઈ વંદે ભારત એક્સપ્રેસ પર પથ્થરમારો કર્યો છે. જેના કારણે ટ્રેનના એક ડબ્બાની બે બારીઓ ક્ષતિગ્રસ્ત થઈ ગઈ છે. આ ઘટના આજે કૃષ્ણરાજપુરમ અને બેંગલુરુ કેન્ટોનમેન્ટ રેલ્વે સ્ટેશન વચ્ચે બની હતી. તાજેતરમાં વંદે ભારત એક્સપ્રેસ ટ્રેનો પર પથ્થરમારાની ઘટનાઓ સામે આવી છે. રેલ્વે પ્રોટેક્શન ફોર્સે દક્ષિણ પશ્ચિમ રેલવેના બેંગલુરુ ડિવિઝનમાં જાન્યુઆરીમાં ટ્રેનો પર પથ્થરમારાના 21 અને ફેબ્રુઆરીમાં 13 કેસ નોંધ્યા છે.