ક્રિસ રોકને થપ્પડ મારવું વિલ સ્મિથને ભારે પડ્યું, 10 વર્ષ માટે ઓસ્કારથી Ban

હોલિવૂડ એક્ટર વિલ સ્મિથની મુશ્કેલીઓ દિવસેને દિવસે વધી રહી છે. એકેડેમી ઓફ મોશન પિક્ચર આર્ટ્સ દ્વારા ઓસ્કાર એવોર્ડ સમારોહમાં હોસ્ટ ક્રિસ રોકને થપ્પડ મારવા બદલ અભિનેતા વિલ સ્મિથ પર 10 વર્ષ માટે ઓસ્કાર અથવા અન્ય કોઈપણ એકેડેમી ફંક્શનમાં હાજરી આપવા પર પ્રતિબંધ મૂકવામાં આવ્યો છે. સ્મિથની હરકત પર એકેડમીના બોર્ડ ઓફ ગવર્નર્સની બેઠક બાદ આ નિર્ણય લેવામાં આવ્યો છે.

જોકે, અત્યારે એ સ્પષ્ટ નથી કે ભવિષ્યમાં તે આ પુરસ્કારો માટે નોમિનેટ થશે કે કેમ. એક નિવેદનમાં, એકેડેમીએ જણાવ્યું હતું કે, "અમારા સમુદાયના ઘણા લોકો માટે 94મો ઓસ્કાર એવોર્ડ સમારોહનું આયોજન કરવામાં આવ્યું હતું, જેમણે છેલ્લા એક વર્ષમાં અવિશ્વસનીય કામ કર્યું છે. જોકે, સ્મિથના અસ્વીકાર્ય અને ગેરવર્તણૂકે તે ક્ષણો બગાડી છે. બીજી તરફ, વિલ સ્મિથે પ્રતિબંધ પર કહ્યું, "હું એકેડમીના નિર્ણયનું સન્માન કરું છું." તેણે ગયા અઠવાડિયે જ એકેડેમીમાંથી રાજીનામું આપ્યું હતું. અગાઉની મીટિંગમાં, એકેડેમીએ જણાવ્યું હતું કે સ્મિથની હરકતો તેના આચારના ધોરણોનું ઉલ્લંઘન કરે છે, જે જણાવે છે કે "અયોગ્ય શારીરિક સંપર્ક, દુર્વ્યવહાર અથવા ધાકધમકી એ એકેડેમીની પ્રતિષ્ઠા વિરુદ્ધ છે". એકેડમીએ ક્રિસ રોકની માફી પણ માંગી હતી. સમારંભમાં સ્મિથને "કિંગ રિચર્ડ"માં તેના સશક્ત અભિનય માટે શ્રેષ્ઠ અભિનેતાનો એવોર્ડ આપવામાં આવ્યો હતો. તેણે એવોર્ડ પ્રાપ્ત કરતી વખતે એકેડેમી અને નોમિનીની માફી માંગી હતી, પરંતુ રોકનું નામ લીધું ન હતું.

ઉલ્લેખનીય છે કે, 27 માર્ચે લોસ એન્જલસના ડોલ્બી થિયેટરમાં 94મો ઓસ્કાર એવોર્ડ સમારોહનું આયોજન કરવામાં આવ્યું હતું. દરમિયાન, સ્ટેજ પર, કોમેડિયન ક્રિસ રોકે અભિનેતા વિલ સ્મિથની પત્ની જેડા પિંકેટની બીમારી વિશે મજાક કરી. વિલ મજાકથી નારાજ હતો. આટલું જ નહીં, તે પોતાની સીટ પરથી ઊભો થયો અને સ્ટેજ પર ગયો અને ક્રિસને જોરદાર થપ્પડ મારી. આ સાથે વિલે ક્રિસને ચેતવણી આપતા કહ્યું કે, મારી પત્નીનું નામ ક્યારેય તમારી જીભ પર ન લાવો. મહત્વનું છે કે, ક્રિસ રોકે વિલ સ્મિથની પત્ની અભિનેત્રી-સિંગર જેડા પિંકેટની ટાલની મજાક ઉડાવી હતી. પિંકેટ બીમારીના કારણે તેના વાળ કાપી નાખ્યા હતા. વાસ્તવમાં, તે એલોપેસીયા રોગ સામે લડી રહી છે, જેના કારણે તેના માથા પર ઘણી જગ્યાએ વાળ સંપૂર્ણપણે ગાયબ થઈ ગયા છે.