કાનપુર હિંસાના મુખ્ય સૂત્રધાર ઝફર હયાત આવ્યો પોલીસ સકંજામાં, 500થી વધુ લોકો સામે કાર્યવાહી

કાનપુરમાં શુક્રવારની નમાજ દરમિયાન ફાટી નીકળેલી હિંસા મામલે પોલીસને મોટી સફળતા મળી છે. પોલીસે મુખ્ય આરોપી અને માસ્ટરમાઇન્ડ ઝફર હયાતની ધરપકડ કરી છે. ઝફર પર આરોપ છે કે તેણે હિંસા પહેલા ઉશ્કેરણીજનક પોસ્ટર લગાવ્યા હતા. આ કેસમાં પોલીસે અત્યાર સુધીમાં 35થી વધુ લોકોની ધરપકડ કરી છે, સાથે જ 500થી વધુ લોકોના નામ પણ સામે આવ્યા છે. આ મામલામાં ત્રણ FIR નોંધવામાં આવી છે.

એવું કહેવામાં આવ્યું છે કે ઝફર હયાતે પીએમ મોદી અને રાષ્ટ્રપતિ કોવિંદની મુલાકાતને લઈને બંધની અપીલ કરી હતી, તેની સાથે પોસ્ટર પણ લગાવવામાં આવ્યા હતા. જે બાદ લોકોની ભીડ એકઠી થઈ ગઈ અને હિંસા ફેલાઈ ગઈ. જો કે પરિવારે તમામ આરોપોને નકારી કાઢ્યા છે. પરિવારે જણાવ્યું કે પોલીસની હાજરીમાં હયાતે પોતાનું નિવેદન પાછું ખેંચવાની જાહેરાત કરી હતી. જે બંધની અપીલ કરવામાં આવી હતી તે પાછી ખેંચી લેવામાં આવી હતી. પરિવારનું કહેવું છે કે ઝફર હયાતને ફસાવી દેવામાં આવ્યો છે. પોલીસે તેમની જવાબદારી યોગ્ય રીતે નિભાવી નથી.

હિંસા કેવી રીતે શરૂ થઈ?

આ મામલે પોલીસે જણાવ્યું હતું કે, તાજેતરમાં ટીવી પર એક કાર્યક્રમમાં ચર્ચા દરમિયાન ભારતીય જનતા પાર્ટી (BJP)ના પ્રવક્તા નુપુર શર્મા વતી શુક્રવારે પયગંબર મોહમ્મદ વિરુદ્ધ કથિત રીતે કરવામાં આવેલી વાંધાજનક ટિપ્પણીના વિરોધમાં અથડામણ થઈ હતી. પરેડ, નાઈ સડક અને યતિમખાના વિસ્તારોમાં જ્યારે એક સમુદાયના સભ્યોએ શુક્રવારની નમાજ પછી બળજબરીથી દુકાનો બંધ કરવાનો પ્રયાસ કર્યો. આ અથડામણમાં પોલીસ કર્મચારીઓ સહિત ઓછામાં ઓછા 40 લોકો ઘાયલ થયા છે.