વન વિભાગનાં નવા વડા તરીકે વર્ષ 1990 બેન્ચનાં IFS અધિકારી DR. A. P. Singh ની નિમણૂક
DR. A. P. Singh એ M.Sc (પ્લાન્ટ સાયન્સ) કર્યું છે અને ગુજરાત રાજ્યમાં ઔષધીય છોડની વિવિધતા અને ફાર્માસ્યુટિકલ ઉદ્યોગોમાં પીએચ.ડી. કર્યું છે.
07:18 PM Dec 31, 2024 IST
|
Vipul Sen
વન વિભાગનાં નવા વડા તરીકે IFS અધિકારી DR. A. P. Singh ની નિમણૂક
IFS ડૉ. એ.પી. સિંહે વન વિભાગનાં વિવિધ ક્ષેત્રોમાં 35 વર્ષની સેવા પૂર્ણ કરી
તેમણે વિવિધ સંશોધન પત્ર, લેખ, ગુજરાતની આક્રમક એલિયન પ્રજાતિઓ પર પુસ્તક લખ્યું
વર્ષ 1990 બેચનાં IFS ડૉ. એ.પી. સિંહે (DR. A. P. Singh) વન વિભાગનાં વિવિધ ક્ષેત્રોમાં 35 વર્ષની સેવા પૂર્ણ કરી છે. હવે તેમને ગુજરાતનાં અગ્ર મુખ્ય વન સંરક્ષક અને ફોરેસ્ટ ફોર્સ વિભાગનાં વડા તરીકે નિયુક્ત કરવામાં આવ્યા છે. DR. A. P. Singh એ M.Sc (પ્લાન્ટ સાયન્સ) કર્યું છે અને ગુજરાત રાજ્યમાં ઔષધીય છોડની વિવિધતા અને ફાર્માસ્યુટિકલ ઉદ્યોગોમાં પીએચ.ડી. કર્યું છે.
વર્ષ 1992 માં IFS ડૉ. એ.પી. સિંહ (DR. A. P. Singh) ગુજરાત વન વિભાગમાં મદદનીશ વન સંરક્ષક (ACF) તરીકે જોડાયા હતા અને વર્ષ 1994 સુધી રાજપીપળા, ડાંગ અને દેવગઢ બારિયા ફોરેસ્ટ ડિવિઝનમાં સેવા આપી હતી. વર્ષ 1995 થી 1998 સુધી તેમણે સાબરકાંઠામાં સામાજિક વનીકરણ વિભાગમાં નાયબ વન સંરક્ષક (DCF) તરીકે કામ કર્યું હતું. ત્યારબાદ તેમણે વર્ષ 1998 થી 2000 સુધી રાજ્ય સિલ્વીકલ્ચરિસ્ટ તરીકે ડીસીએફ, સિલ્વીકલ્ચર, રાજપીપલા અને ત્યારબાદ વર્ષ 2000 થી 2003 સુધી ભરૂચ અને સુરત જિલ્લાઓને આવરી લઈ સીએફ, રાજપીપળા (પશ્ચિમ) ફોરેસ્ટ ડિવિઝનમાં તરીકે જવાબદારી સંભાળી.
આ પણ વાંચો - Surat: 31 ડિસેમ્બરને પગલે પોલીસની ભીંસ વધતા બુટલેગરે નવો કિમીયો અજમાવ્યો
ત્યાર બાદ IFS ડૉ. એ.પી. સિંહ ઇન્ડિયન સિસ્ટમ ઓફ મેડિસિન અને હોમિયોપેથીનાં ડિરેક્ટર તરીકે નિયુક્ત થયા અને વર્ષ 2003 થી 2008 દરમિયાન આરોગ્ય અને પરિવાર કલ્યાણ વિભાગ હેઠળ આયુર્વેદ, હોમિયોપેથીનાં ડિરેક્ટર તરીકે વિવિધ ક્ષમતાઓમાં સેવા આપી હતી. ગુજરાત મેડિસિનલ પ્લાન્ટ્સ બોર્ડનાં સભ્ય સચિવ; ગુજરાત આયુર્વેદિક વિકાસ મંડળના પ્રમુખ અને હોમિયોપેથિક કાઉન્સિલ ઓફ ગુજરાતનાં એડમિનિસ્ટ્રેટર તરીકે સેવા આપી. તેમણે ગુજરાતની ઔષધીય વનસ્પતિઓની વિવિધતાનાં વિકાસ અને સંરક્ષણ માટે કાર્યરત સ્વતંત્ર રાજ્ય ઔષધીય વનસ્પતિ બોર્ડની રચના કરી છે. વર્ષ 2008 થી 2011 સુધી, તેમણે અરણ્ય ભવનમાં JICA પ્રોજેક્ટમાં વન સંરક્ષક તરીકે કામ કર્યું અને ત્યારબાદ વર્ષ 2011 થી 2014 સુધી, તેમણે ગુજરાત જૈવવિવિધતા બોર્ડ, ગાંધીનગરનાં સભ્ય સચિવ તરીકે કામ કર્યું હતું.
ત્યારબાદ તેમને જુનાગઢમાં વન્યપ્રાણી વર્તુળમાં મુખ્ય વન સંરક્ષક તરીકે નિયુક્ત કરવામાં આવ્યા હતા, જ્યાં તેમણે વર્ષ 2015 થી 2018 સુધી ફરજ બજાવી હતી. તેમના કાર્યકાળ દરમિયાન વર્ષ 2015 માં 14 મી સિંહ ગણતરી હાથ ધરવામાં આવી હતી. ગીર અભયારણ્યની અધિસૂચના (ગોલ્ડન જ્યુબિલી) નાં 50 માં વર્ષની ઉજવણી પણ વર્ષભર કરવામાં આવી હતી.
આ પણ વાંચો - Gujarat: રાજ્યમાં વધુ 240 ASIને PSI તરીકે બઢતી, ચાલુ વર્ષે કુલ 6770 કર્મચારીઓને પ્રમોશન મળ્યું
વર્ષ 2018-2019 સુધી, તેમણે મુખ્ય વન સંરક્ષક, વર્કિંગ પ્લાન સર્કલ, સુરત તરીકે સેવા આપી હતી. ત્યારબાદ વર્ષ 2019 થી 2023 સુધી, તેમણે ગાંધીનગરમાં આવેલા અરણ્ય ભવનમાં મોનિટરિંગ અને મૂલ્યાંકન વિભાગમાં APCCF તરીકે અને વર્ષ 2023 થી અગ્ર મુખ્ય વન સંરક્ષક, સામાજિક વનીકરણ, ગુજરાત રાજ્ય તરીકે કામ કર્યું હતું. દરમિયાન, વન કવચ, હરિત વસુંધરા, કૃષિ વનીકરણ, હરિત વન પથ, શહેરી વનીકરણ જેવી વિવિધ નવી યોજનાઓ શરૂ કરવામાં આવી હતી અને અસરકારક રીતે અમલમાં મૂકવામાં આવી હતી. ઈન્ડિયા સ્ટેટ ઑફ ફોરેસ્ટ રિપોર્ટ, 2023 (ISFR, 2023) મુજબ, રાજ્યનું વૃક્ષ આવરણ વર્ષ 2021 ના 2.80% થી નોંધપાત્ર રીતે વધીને વર્ષ 2023 માં 3.38% થયું હતું.
નોંધનીય છે કે, IFS ડૉ. એ.પી. સિંહને વનસંવર્ધન, વન્યજીવન, સામાજિક વનીકરણ, ઔષધીય છોડ, જૈવવિવિધતા, બાહ્ય સહાયતા પ્રાપ્ત પ્રોજેક્ટ્સ વગેરેનો બહોળો અનુભવ છે. તેમણે સાબરકાંઠા જિલ્લાની કાર્યકારી યોજના પણ લખી છે અને પોરબંદર જિલ્લાની કાર્યકારી યોજના લખવા માટે માર્ગદર્શન આપ્યું છે અને ગીર રાષ્ટ્રીય ઉદ્યાન અને અભયારણ્ય મેનેજમેન્ટ પ્લાનની મધ્ય-ગાળાની સમીક્ષા કરી છે. તેમણે વિવિધ સંશોધન પત્રો અને લેખો તેમ જ ગુજરાતની આક્રમક એલિયન પ્રજાતિઓ પર પુસ્તક પણ લખ્યું છે.
આ પણ વાંચો - Surat માંથી વધુ 3 ઝોલાછાપ તબીબ સામે કાર્યવાહી, 2 ની ધરપકડ
Next Article