સ્વચ્છતા સર્વેક્ષણ 2025માં અમદાવાદનો ડંકો, પરંતુ AMC બિલ્ડિંગમાં ગંદકીનો ઢગલો!

• સ્વચ્છતા સર્વેક્ષણ 2025માં અમદાવાદનો ડંકો, પરંતુ AMC બિલ્ડિંગમાં ગંદકીનો ઢગલો!
• સ્વચ્છતા સર્વેક્ષણમાં અમદાવાદને મળ્યો એવોર્ડ
• બીજી તરફ AMCમાં દિવા તળે અંધારું જેવી સ્થિતિ!
• AMC બિલ્ડિંગના ભોંયરામાં ગંદકી અને ભંગાર

અમદાવાદ: શહેર સ્વચ્છતામાં નંબર-1, પરંતુ AMCના ભોંયરામાં અસ્વચ્છતાનો આડંબરસ્વચ્છ ભારત મિશન હેઠળ યોજાયેલા સ્વચ્છતા સર્વેક્ષણ 2025માં અમદાવાદે દેશના સૌથી સ્વચ્છ શહેર તરીકે પ્રથમ સ્થાન હાંસલ કરી ગૌરવ વધાર્યું છે. જોકે, આ ગૌરવની વચ્ચે અમદાવાદ મ્યુનિસિપલ કોર્પોરેશન (AMC)ની મુખ્ય ઇમારતમાં જ ‘દિવા તળે અંધારું’ જેવી સ્થિતિ જોવા મળી છે. AMCના ભોંયરામાં ગંદકી, ભંગાર, અને તૂટેલા ફર્નિચરનો ઢગલો જોવા મળ્યો છે, જે શહેરની સ્વચ્છતાની સફળતા પર સવાલો ઉભા કરે છે.

AMC બિલ્ડિંગના ભોંયરામાં ગંદકીનો ખડકલો

AMCની મુખ્ય ઇમારતના ભોંયરામાં રેકર્ડ રૂમ અને CCRS (સેન્ટ્રલાઈઝ્ડ કમ્પ્લેન્ટ રિડ્રેસલ સિસ્ટમ) કંટ્રોલ રૂમની આસપાસની સ્થિતિ દયનીય જોવા મળી છે. તપાસમાં જાણવા મળ્યું છે કે ભોંયરામાં તૂટેલા ફર્નિચરના ટુકડા, જૂના દસ્તાવેજો, અને કચરાનો ઢગલો થયેલો જોવા મળ્યો છે. આ ગંદકીએ રેકર્ડ રૂમની સ્થિતિને વધુ ખરાબ કરી છે.

અગત્યની ફાઇલો અને પ્લાનનો નાશ: AMCની જૂની ઇમારતોના નકશા અને મહત્ત્વની ફાઇલો કચરાની વચ્ચે ફેંકાયેલી મળી, જેનાથી ઐતિહાસિક અને વહીવટી દસ્તાવેજોને નુકસાન થવાની શક્યતા દેખાઈ રહી છે. ગંદકીના કારણે ભોંયરામાં મચ્છરોનો ઉપદ્રવ વધ્યો છે, જે કર્મચારીઓના આરોગ્ય માટે જોખમી બની શકે છે.

CCRS કંટ્રોલ રૂમની દયનીય હાલત

ગ્રાહક ફરિયાદોના નિવારણ માટે બનાવવામાં આવેલા CCRS કંટ્રોલ રૂમની આસપાસની અસ્વચ્છતા AMCની કાર્યક્ષમતા પર સવાલો ઉભા કરે છે. ઉલ્લેખનિય છે કે, એએમસી પોતાની જ મહત્વપૂર્ણ ફાઈલોને સાચવી શકતી નથી તો અમદાવાદીઓની પ્રોપર્ટીઓની મહત્વપૂર્ણ ફાઈલોને કેવી રીતે સાચવશે?

AMC સ્ટેન્ડિંગ કમિટી ચેરમેનનો લૂલો બચાવ

આ મુદ્દે AMCના સ્ટેન્ડિંગ કમિટી ચેરમેન દેવાંગ દાણીએ બચાવ કરતાં જણાવ્યું કે, “AMC ડિજિટલાઇઝેશન તરફ ઝડપથી આગળ વધી રહ્યું છે, જેના કારણે જૂના રેકોર્ડ્સનું વ્યવસ્થાપન થઈ રહ્યું છે. CCRS કંટ્રોલ રૂમને હાલમાં પાલડી ખાતે શિફ્ટ કરવામાં આવ્યો છે, અને આગામી સમયમાં જૂની ઇમારતોનું નવીનીકરણ કરવામાં આવશે.” જોકે, તેમણે ભોંયરાની ગંદકી અને મચ્છરોના ઉપદ્રવ અંગે ચોક્કસ જવાબ આપ્યો નથી, જેનાથી AMCની આંતરિક સ્વચ્છતા વ્યવસ્થા પર સવાલો ઉભા થયા છે.

સ્વચ્છતા સર્વેક્ષણ 2025ની સફળતા

સ્વચ્છ ભારત મિશન હેઠળ યોજાયેલા સ્વચ્છતા સર્વેક્ષણ 2025માં અમદાવાદે દેશભરમાં પ્રથમ સ્થાન હાંસલ કર્યું છે. આ સફળતા માટે AMCના નવીન પગલાં જેમ કે ડોર-ટૂ-ડોર કચરા સંગ્રહ, રિસાયક્લિંગ યુનિટ્સ, અને જનજાગૃતિ અભિયાનોનો મોટો ફાળો રહ્યો છે. કેન્દ્રીય ગૃહ મંત્રી અમિત શાહે પણ AMC અને શહેરના નાગરિકોને આ સિદ્ધિ બદલ શુભેચ્છા પાઠવી હતી. જોકે, AMCની મુખ્ય ઇમારતમાં ગંદકીનો આ ખુલાસો આ સફળતા પર કલંકરૂપ સાબિત થઈ રહ્યો છે.

અમદાવાદે સ્વચ્છતા સર્વેક્ષણ 2025માં પ્રથમ સ્થાન મેળવી ગૌરવ વધાર્યું, પરંતુ AMCની મુખ્ય ઇમારતમાં ગંદકીનો ખુલાસો આ સફળતાને ઝાંખી કરે છે. AMCએ પોતાની આંતરિક સ્વચ્છતા સુધારીને શહેરની સ્વચ્છતાના દાવાને સાચા અર્થમાં સાર્થક કરવું જોઈએ.

આ પણ વાંચો- Gujarat News: અરવિંદ કેજરીવાલ ગુજરાત પ્રવાસે આવશે, સાબર ડેરીના પશુપાલકો સાથે મુલાકાત કરશે