• મસૂદ અઝહરનો નવો વીડિયો જાહેર
• 20 વર્ષ બાદ, જૈશ-એ-મોહમ્મદના ચીફ મસૂદ અઝહરે ભાષણ આપ્યું
• જૈશ-એ-મોહમ્મદનો ધમકી ભર્યો વીડિયો વાયરલ
• પાકિસ્તાનના આતંકી ચહેરાનો પર્દાફાશ
• મસૂદના 20 વર્ષ બાદ ભાષણથી ખળભળાટ
• ભારત અને ઈઝરાયલ વિરુદ્ધ ઝેર ઓકતું પાકિસ્તાન

Masood Azhar : પાકિસ્તાન, જે પોતાની આતંકવાદી પ્રવૃત્તિઓ માટે દુનિયાભરમાં કુખ્યાત છે, તેની હકીકત ફરી એકવાર સામે આવી છે. 20 વર્ષના અંતરાલ બાદ, જૈશ-એ-મોહમ્મદના ચીફ મસૂદ અઝહરે પહેલીવાર ખુલ્લેઆમ ભાષણ આપ્યું હતું. આ ભાષણમાં તેણે ભારતના વડાપ્રધાન નરેન્દ્ર મોદી અને ઇઝરાયલના વડાપ્રધાન બેન્જામિન નેતન્યાહુ વિરુદ્ધ ઝેર ઓક્યું હતું અને બંને દેશો સામે જેહાદી અભિયાન શરૂ કરવાની પ્રતિજ્ઞા લીધી હતી. આ ભાષણનો વીડિયો જૈશ-એ-મોહમ્મદના ડિજિટલ પ્લેટફોર્મ પર શેર કરવામાં આવ્યો હતો, જે ફરીથી પાડોશી દેશ પાકિસ્તાનના આતંકવાદી નીતિનો પર્દાફાશ કરે છે.

મસૂદ અઝહરનો વીડિયો અને તેની સચોટ માહિતી

અહેવાલ અનુસાર, મસૂદ અઝહર અને અન્ય આતંકવાદીઓના જુના વીડિયો સમયાંતરે પોસ્ટ કરવામાં આવે છે. પરંતુ આ વીડિયો નવો છે, કારણ કે તેમાં ઇઝરાયલ-ગાઝા યુદ્ધનો ઉલ્લેખ છે, જે આ વીડિયો હાલના સમયનો હોવાનો પુરાવો આપે છે. એક ભારતીય ગુપ્તચર અધિકારીએ જણાવ્યું હતું કે, આ ભાષણ સંભવતઃ ગયા મહિનાના અંતમાં પાકિસ્તાનના બહાવલપુર પાસે આવેલા ઉમ્મ-ઉલ-કુરા મદરેસા અને મસ્જિદ સંકુલમાં થયું હતું. આ સંકુલ 1000 એકર વિસ્તારને આવરી લે છે અને તેમાં વહીવટી બિલ્ડિંગ અને રહેણાંક બ્લોક્સનો સમાવેશ થાય છે.

જૈશ-એ-મોહમ્મદના પ્લેટફોર્મ અને પાકિસ્તાનની નીતિઓ

જૈશ-એ-મોહમ્મદે દુનિયાભરમાં પોતાનો પ્રચાર ફેલાવવા માટે ડિજિટલ પ્લેટફોર્મનો ઉપયોગ કર્યો છે. આ પ્લેટફોર્મ પર મસૂદ અઝહરના વીડિયો શેર કરીને તેની આતંકવાદી વિચારધારાને ફેલાવવાનો પ્રયત્ન કરવામાં આવ્યો છે. 2019માં, પાકિસ્તાની સત્તાવાળાઓએ દાવો કર્યો હતો કે તેમણે આ મદરેસા અને મસ્જિદના સંકુલને તેમના કબ્જામાં લઈ લીધું છે, પરંતુ સ્થાનિક રહેવાસીઓએ આ દાવાને ખોટો ઠરાવ્યો. આ ઈમારત પર જૈશ-એ-મોહમ્મદના સશસ્ત્ર રક્ષકો તૈનાત છે, જે સ્પષ્ટ કરે છે કે પાકિસ્તાન હજુ પણ આ સંગઠનને બેકડોર સપોર્ટ પૂરો પાડી રહ્યું છે.

ભારત અને ઈઝરાયલ પર મસૂદના હુમલાખોર નિવેદનો

મસૂદ અઝહરે તેના ભાષણ દરમિયાન આરોપ મૂક્યો કે કાશ્મીર અને પેલેસ્ટાઈન જેવી મુસ્લિમ ભૂમિઓમાં મોટો પરાજય ડરપોક શાસકોના કારણે થયો છે. તે મુજબ, અમેરિકાની દુનિયાભરમાં રાજ કરવાની હકીકત બદલાશે નહીં. ભારતીય વડાપ્રધાન મોદી અને ઇઝરાયલના વડાપ્રધાન નેતન્યાહુ પર ઝેર ઓકતા મસૂદે કહ્યું, “મને શરમ આવે છે કે મોદી જેવો નબળો વ્યક્તિ આપણને પડકારે છે અથવા નેતન્યાહુ જેવો ઉંદર આપણને પડકારે છે." મસૂદે વધુમાં કહ્યું કે, "કોઈ એવા 300 લોકો પણ નથી જે બાબરી મસ્જિદ પાછી મેળવવા લડી શકે? તેણે આગળ કહ્યું કે, કાશ્મીરમાં બંદૂકો મોકલવામાં આવશે, જેનો સામનો ભારત કરી શકશે નહીં."

આતંકવાદને પ્રોત્સાહન આપતી ભાષા

મસૂદ અઝહરે પોતાના ભાષણ દરમિયાન જૈશ-એ-મોહમ્મદના આતંકવાદી સંગઠનમાં જોડાવા માટે લોકોને આહવાન કર્યું અને હાજર આતંકવાદીઓએ તેને તાળીઓ સાથે સમર્થન આપ્યું. તેણે નારો આપ્યો છે કે 'ભારત, તમારી મોત આવી રહી છે.' આ ઘટનાએ પાકિસ્તાનના જુઠ્ઠા દાવાઓનો પર્દાફાશ કર્યો છે કે તે આતંકવાદ વિરોધી પગલાં લઈ રહ્યું છે. દેશની નીતિઓ અને જૈશ-એ-મોહમ્મદ જેવા સંગઠનોને મળતો સહકાર આંતરરાષ્ટ્રીય શાંતિ માટે ગંભીર ચેતવણી આપે છે.

આ પણ વાંચો:  બાઈડેને વિદાય પહેલા ભારતને આપી મોટી ગિફ્ટ, જતા જતા દેશની તાકત વધારી ગયા