રાજસ્થાનના ચુરુમાં વાયુસેનાનું લડાકુ વિમાન ક્રેશ, 2025 માં આ ત્રીજી જગુઆર દુર્ઘટના
- રાજસ્થાનમાં વાયુસેનાનું લડાકુ વિમાન ક્રેશ
- દુર્ઘટના સ્થળેથી એક મૃતદેહ મળી આવ્યો
- જગુઆર લડાકુ વિમાન ક્રેશ થતાં લાગી આગ
- રતનગઢના ભાનુડા ગામ પાસે બની દુર્ઘટના
- સ્થાનિક વહીવટી તંત્ર દુર્ઘટના સ્થળે પહોંચ્યું
ભારતીય વાયુસેના માટે બુધવાર, 9 જુલાઈ 2025નો દિવસ દુઃખદ રહ્યો, જ્યારે રાજસ્થાનના ચુરુ જિલ્લામાં તેનું એક જગુઆર લડાકુ વિમાન ક્રેશ થયું. આ ઘટના રતનગઢ તાલુકાના ભાનુડા ગામ નજીક બપોરે 12:40 વાગ્યે બની. વિમાન ક્રેશ થતાંની સાથે જ તેમાં આગ લાગી, જેના કારણે સ્થાનિક વિસ્તારમાં હડકંપ મચી ગયો. સંરક્ષણ સૂત્રોના જણાવ્યા મુજબ, આ વિમાન ભારતીય વાયુસેનાનું જગુઆર ફાઇટર જેટ હતું, જે ખેતરમાં જઈને ધડાકા સાથે ક્રેશ થયું.
દુર્ઘટના સ્થળે મૃતદેહ મળ્યો
ઘટના બાદ દુર્ઘટના સ્થળની તપાસ દરમિયાન એક મૃતદેહ મળી આવ્યો છે. હજુ સુધી આ મૃતદેહની ઓળખ જાહેર કરવામાં આવી નથી, અને પોલીસ તેની તપાસ કરી રહી છે. સ્થાનિક પોલીસે જણાવ્યું કે વિમાન ખેતરમાં ક્રેશ થયું, જેના કારણે આગની લપેટો ફેલાઈ. આ ઘટનાને પગલે સ્થાનિક વહીવટી તંત્ર અને પોલીસ ટીમ તાત્કાલિક ઘટના સ્થળે પહોંચી ગઈ હતી, અને બચાવ કામગીરી શરૂ કરવામાં આવી.
A Jaguar fighter aircraft of the Indian Air Force has crashed near Churu district of Rajasthan. More details awaited: Defence Sources pic.twitter.com/CYbHIyQLPl
— ANI (@ANI) July 9, 2025
2025માં ત્રીજી જગુઆર દુર્ઘટના
આ વર્ષે ભારતીય વાયુસેનાનું આ ત્રીજું જગુઆર ફાઇટર જેટ છે, જે ક્રેશ થયું. આ પહેલાં 7 માર્ચ 2025ના રોજ હરિયાણાના અંબાલા એરબેઝ પાસે નિયમિત તાલીમ દરમિયાન એક જગુઆર વિમાન સિસ્ટમ ખામીને કારણે ક્રેશ થયું હતું. તેવી જ રીતે, 2 એપ્રિલ 2025ના રોજ ગુજરાતના જામનગર જિલ્લામાં બીજું જગુઆર વિમાન દુર્ઘટનાગ્રસ્ત થયું હતું, જેમાં ફ્લાઇટ લેફ્ટનન્ટ સિદ્ધાર્થ યાદવનું મૃત્યુ થયું હતું. આ ઘટનાઓએ વાયુસેનાના ફાઇટર જેટની સલામતી અને જાળવણી અંગે ચિંતા ઉભી કરી છે.
તપાસ અને વહીવટી પગલાં
આ દુર્ઘટનાના કારણો જાણવા માટે ભારતીય વાયુસેના અને સંરક્ષણ વિભાગ દ્વારા વિગતવાર તપાસ શરૂ કરવામાં આવી છે. પ્રાથમિક અહેવાલોમાં ટેકનિકલ ખામી કે અન્ય કોઈ બાહ્ય પરિબળોની શક્યતા તપાસવામાં આવી રહી છે. સ્થાનિક વહીવટી તંત્ર દ્વારા ઘટના સ્થળને સુરક્ષિત કરવામાં આવ્યું છે, અને નજીકના વિસ્તારોમાં સલામતીનાં પગલાં લેવામાં આવી રહ્યાં છે.
આ પણ વાંચો : લખનઉ એરપોર્ટ પર ટળી મોટી દુર્ઘટના, અચાનક વિમાનના ટાયરમાંથી નીકળ્યા ધુમાડા