• લોર્ડ્સ ટેસ્ટમાં ટીમ ઈન્ડિયાની હાર
• રવિન્દ્ર જાડેજાની લડાયક ઇનિંગ છતા હાર
• શું જાડેજાએ વધુ જોખમ લેવું જોઈતું હતું? શરૂ થઇ ચર્ચા

IND vs ENG 3rd Test : લોર્ડ્સમાં રમાયેલી ભારત-ઈંગ્લેન્ડ (India-England) વચ્ચેની ત્રીજી ટેસ્ટ મેચ (Third Test Match) ખૂબ જ રોમાંચક રહી હતી. જોકે, આ મેચમાં ટીમ ઈન્ડિયા (Team India) ને હારનો સામનો કરવો પડ્યો હતો. મેચમાં રવિન્દ્ર જાડેજા (Ravindra Jadeja) એ પોતાની વિકેટ સાચવી અને શાનદાર પ્રદર્શન કર્યું હતું પણ તેઓ ટીમને જીત અપાવવામાં નિષ્ફળ રહ્યા હતા. પાંચમા દિવસે ઈંગ્લેન્ડ સામે 193 રનના લક્ષ્યાંકનો પીછો કરતી વખતે કે એલ રાહુલ અને રવિન્દ્ર જાડેજા (KL Rahul and Ravindra Jadeja) સિવાયના તમામ ખેલાડીઓનું પ્રદર્શન ખૂબ જ ખરાબ રહ્યું હતું. ત્યારે એક તરફ જ્યા રવિન્દ્ર જાડેજા (Ravindra Jadeja) ની ઇનિંગના વખાણ કરવામાં આવી રહ્યા છે તો બીજી તરફ તેના દ્વારા ઘણી ભૂલો થઇ હોવાની ચર્ચાઓ પણ થઇ રહી છે.

જાડેજાની લડાયક ઇનિંગ્સ છતાં ભારતની હાર

લોર્ડ્સ ખાતે રમાયેલી ત્રીજી ટેસ્ટ મેચના પાંચમા દિવસે ભારતીય ટીમે ઈંગ્લેન્ડ સામે 193 રનના લક્ષ્યાંકનો પીછો કરવાનો પડકાર સ્વીકાર્યો હતો. આ મેચમાં રવિન્દ્ર જાડેજાએ ભારતને હારના પંજામાંથી બહાર કાઢવા માટે શાનદાર અને લડાયક ઇનિંગ્સ રમી, પરંતુ અંતે ભારત 22 રનથી મેચ હારી ગયું. આ હાર સાથે ઈંગ્લેન્ડે શ્રેણીમાં 2-1ની સરસાઈ મેળવી લીધી છે. જણાવી દઇએ કે, ઈંગ્લેન્ડના ઝડપી બોલરો જોફ્રા આર્ચર, બેન સ્ટોક્સ અને બ્રાઇડન કાર્સની ઘાતક બોલિંગ સામે ભારતની ટોચની અને મધ્યમ ક્રમની બેટિંગ લગભગ તૂટી પડી હતી. એક તબક્કે ભારતનો સ્કોર 7 વિકેટે 82 રન અને પછી 8 વિકેટે 112 રન હતો. આ સમયે એવું લાગી રહ્યું હતું કે ઈંગ્લેન્ડ સવારના સત્રમાં જ મેચ પૂર્ણ કરી લેશે. જોકે, રવિન્દ્ર જાડેજાએ હિંમત ન હારી અને ટીમને મેચમાં જાળવી રાખવા માટે જવાબદારી સંભાળી.

જાડેજાની નિર્ણાયક ભૂમિકા

જાડેજાએ નીચલા ક્રમના બેટ્સમેનો જસપ્રીત બુમરાહ અને મોહમ્મદ સિરાજ સાથે મળીને ભારતને એકતરફી હારમાંથી બચાવવાનો પ્રયાસ કર્યો. તેની આ લડાયક ઇનિંગ્સે મેચને રોમાંચક બનાવી દીધી. છેલ્લી 2 વિકેટની ભાગીદારી 212 બોલ સુધી ટકી, જે દરમિયાન જાડેજાએ 181 બોલમાં 61 રનની અણનમ ઇનિંગ્સ રમી. આ ઇનિંગ્સમાં તેણે બુમરાહ અને સિરાજ સાથે 58 રન જોડ્યા, જેના કારણે ભારત લક્ષ્યની ખૂબ નજીક પહોંચી ગયું હતું. જાડેજાએ સાવચેતીપૂર્વક બેટિંગ કરી અને ઈંગ્લેન્ડના બોલરોને કોઈ તક આપી નહીં. 48મી ઓવરમાં તેણે ક્રિસ વોક્સના બોલ પર છગ્ગો ફટકારીને પોતાની આક્રમક રીત દર્શાવી, પરંતુ ત્યારબાદ ભારતે 107 બોલ સુધી એક પણ બાઉન્ડ્રી ફટકારી ન હતી. જાડેજાએ વોક્સ, શોએબ બશીર અને જો રૂટ જેવા બોલરો સામે સંયમથી રમવાનું પસંદ કર્યું, જેમની બોલિંગને વિકેટથી ખાસ મદદ મળી રહી ન હતી.

A determined and well fought innings

Took #TeamIndia close

Chin up, Ravindra Jadeja 👍 👍

Scorecard ▶️ https://t.co/X4xIDiSmBg#ENGvIND | @imjadeja pic.twitter.com/jGpfgHAeNM

— BCCI (@BCCI) July 14, 2025

શું જાડેજાએ વધુ જોખમ લેવું જોઈતું હતું?

ભૂતપૂર્વ ભારતીય કેપ્ટન અનિલ કુંબલેનું માનવું હતું કે જાડેજાએ થોડું વધુ જોખમ લેવું જોઈતું હતું, ખાસ કરીને ક્રિસ વોક્સ અને સ્પિનરો જો રૂટ તથા શોએબ બશીર સામે. કુંબલેના જણાવ્યા મુજબ, "જાડેજાએ રૂટ, બશીર અને વોક્સ સામે થોડું જોખમ લેવું જોઈતું હતું. રૂટ અને બશીરનો બોલ બહારની તરફ જઈ રહ્યો હતો, પરંતુ તે વધુ ટર્ન થઈ રહ્યો ન હતો. આવી સ્થિતિમાં આઉટસાઇડ એજ કે સ્પિનની ચિંતા કરવાની જરૂર ન હતી. જાડેજા જેવો ખેલાડી વધુ ખરાબ પીચો પર અને વધુ મજબૂત બોલરો સામે રમી ચૂક્યો છે. તેણે એક-બે તકો લેવી જોઈતી હતી." કુંબલેએ વધુમાં ઉમેર્યું, "જ્યારે બુમરાહ અને સિરાજ જેવા નીચલા ક્રમના બેટ્સમેન સાથે રમવું હોય, ત્યારે જોખમ લેવું જરૂરી બની જાય છે. જાડેજાએ સિંગલ્સ અને ડબલ્સ લેવામાં થોડી ચૂક કરી, જેના કારણે તે વધુ આક્રમક રીતે રમી શક્યો હોત."

ગાવસ્કર અને ગિલે કર્યો બચાવ

જાડેજાની ઇનિંગ્સ અંગે સોશિયલ મીડિયા પર અલગ-અલગ પ્રતિક્રિયાઓ જોવા મળી, પરંતુ ભૂતપૂર્વ ભારતીય બેટ્સમેન સુનીલ ગાવસ્કરે જાડેજાની રણનીતિનો બચાવ કર્યો. ગાવસ્કરે જણાવ્યું, "જાડેજા નીચલા ક્રમના બેટ્સમેન સાથે રમી રહ્યો હતો, તેથી તેણે સ્ટ્રાઈક પોતાની પાસે રાખવાનો પ્રયાસ કર્યો. આવી પીચ પર હવામાં શોટ રમવો જોખમી હોય છે. ભારતીય ટીમ સામાન્ય રીતે રમતને ઊંડાણમાં લઈ જવાનું પસંદ કરે છે, અને જાડેજાનો ઉદ્દેશ્ય પણ એ જ હતો." ભારતીય કેપ્ટન શુભમન ગિલે પણ જાડેજા અને નીચલા ક્રમની રણનીતિને સમર્થન આપ્યું. ગિલે કહ્યું, "અમારી યોજના નાની-નાની ભાગીદારી દ્વારા ઈંગ્લેન્ડ પર દબાણ બનાવવાનું હતું. અમે બીજા નવા બોલની રાહ જોવા માંગતા હતા, જે માત્ર 5.1 ઓવર દૂર હતો."

શ્રેણીની સ્થિતિ અને આગળનો રસ્તો

આ મેચમાં 22 રનથી હાર બાદ ઈંગ્લેન્ડે શ્રેણીમાં 2-1ની સરસાઈ મેળવી લીધી છે. ભારતીય ટીમ હવે 23 જુલાઈથી માન્ચેસ્ટરમાં શરૂ થનારી ચોથી ટેસ્ટ મેચમાં કમબેક કરવાનો પ્રયાસ કરશે. જાડેજાની આ લડાયક ઇનિંગ્સે ભલે મેચ જીતાડી ન હોય, પરંતુ તેની હિંમત અને નિશ્ચયે ટીમનો ઉત્સાહ જરૂરથી વધાર્યો છે.

આ પણ વાંચો :   IND vs ENG 3rd Test : લોર્ડ્સ ટેસ્ટમાં Mohammed Siraj ને ઝટકો! ICC એ ફટકાર્યો દંડ