Technology News: મતદાર યાદી અપડેટ કરવાના નામે છેતરપિંડી, આ રીતે રહો સુરક્ષિત
- મતદાર યાદીઅપડેટ કરવાના નામે છેતરપિંડી
- સ્કેમર્સ વેરિફિકેશન ટીમના અધિકારીઓ તરીકે ઓળખ આપી કરે છે ફોન
- ફોન કરી વેરિફિકેશન માટે માંગે છે OTP
- એક ભૂલથી થઈ શકે છે મોટું નુકસાન
Technology News: દેશના ઘણા ભાગોમાં હાલમાં મતદાર યાદી સુધારણા (SIR) ચાલી રહી છે. જેમાં બૂથ લેવલ ઓફિસર્સ (BLOs) ઘરે ઘરે જઈને મતદારોના SIR ફોર્મ ભરી રહ્યા છે. ત્યારે સાયબર ગુનેગારો પણ આ સત્તાવાર પ્રક્રિયા પર નજર રાખી રહ્યા છે અને લોકોને તેમના જાળમાં ફસાવવાનો પ્રયાસ કરી રહ્યા છે. તેઓ વેરિફિકેશન ટીમના અધિકારીઓ તરીકેની ઓળખ આપીને લોકોને ફોન કરે છે અને વેરિફિકેશન માટે તેમનો OTP શેર કરવા કહે છે. આ એક સંપૂર્ણ સ્કેમ છે, કારણ કે SIR પ્રક્રિયામાં OTPની જરૂર હોતી નથી.
મતદાર યાદી અપડેટ કરવા માટે OTP જરૂરી નથી
નોંધનીય છે કે, ચૂંટણી પંચ દ્વારા હાથ ધરવામાં આવતી મતદાર યાદી અપડેટ કવાયત માટે OTP ની જરૂર નથી. BLO ઘરે ઘરે જઈને SIR ફોર્મ ભરી રહ્યા છે. તેમની પાસે તમારો ફોન નંબર અને આધાર વિગતો એકત્રિત કરવાનો અધિકાર છે, પરંતુ આ સમગ્ર પ્રક્રિયા માટે OTP ની જરૂર નથી. તેથી, જો કોઈ તમને ફોન કરે અને આ પ્રક્રિયા પૂર્ણ કરવા માટે OTP શેર કરવાનું કહે, તો સાવચેત રહો.
આ રીતે ચાલી રહ્યું છે સમગ્ર સ્કેમ
આ સ્કેમમાં સાયબર ગુનેગારો ફોર્મ ચકાસણી માટે ફોન કરી OTP માંગે છે. આ OTP મતદાર યાદી અપડેટ કવાયત માટે નથી. સ્કેમર્સ આ OTP નો ઉપયોગ ગેરકાયદેસર વ્યવહારો કરવા અથવા તમારો વ્યક્તિગત ડેટા ચોરી કરવા માટે કરી શકે છે. તેથી, આ સ્કેમથી સાવધાન રહેવું મહત્વપૂર્ણ છે.
આવા સ્કેમથી કેવી રીતે બચવું?
ક્યારેય પણ કોઈ અજાણ્યા કે શંકાસ્પદ વ્યક્તિ સાથે OTP અને તમારી અંગત માહિતી શેર કરશો નહીં.
સમગ્ર SIR પ્રક્રિયા ઑફલાઇન છે. BLO તમારા ઘરની મુલાકાત લે છે. તેથી, SIR હોવાનો દાવો કરતા કોઈપણ શંકાસ્પદ ઇમેઇલ અથવા સંદેશાઓથી સાવધ રહો.
આજકાલ સાયબર છેતરપિંડી વધી રહી છે. તેથી, વેબ બ્રાઉઝ કરતી વખતે સાવચેત રહો અને શંકાસ્પદ વેબસાઇટ્સ પર ક્લિક કરવાનું ટાળો.
આ પણ વાંચો: ભારતીય વૈજ્ઞાનિકોની મોટી સફળતા, ઝિંક આધારિત બેટરી માટે ‘Cathode’ વિકસાવ્યું