EUની ચૂંટણીમાં જ્યોર્જિયા મેલોની બની કિંગ મેકર....!

EU ELECTION : આ વખતે 27 દેશોની યુરોપિયન યુનિયન (EU)ની ચૂંટણી (ELECTION)માં મોટી ઉથલપાથલ જોવા મળી છે. ઘણા દેશોના જમણેરી પક્ષોએ આ ચૂંટણી જીતી છે. ઈટાલીના વડાપ્રધાન જ્યોર્જિયા મેલોનીની અત્યંત જમણેરી પાર્ટી બ્રધર્સ ઓફ ઈટાલી EU ચૂંટણીમાં સૌથી મોટી પાર્ટી તરીકે ઉભરી આવી છે.

મેલોની તેમના દેશની સાથે સાથે યુરોપના મજબૂત નેતા તરીકે ઉભરી આવ્યા

ચૂંટણી પરિણામો પછી, મેલોની તેમના દેશની સાથે સાથે યુરોપના મજબૂત નેતા તરીકે ઉભરી આવ્યા છે. જીત બાદ તેમણે કહ્યું કે આ પરિણામો શાનદાર રહ્યા છે, જે રાજકીય રીતે ખૂબ જ મહત્વપૂર્ણ છે.

27 સભ્યોની EU ચૂંટણીમાં જમણેરી પક્ષોએ પ્રભુત્વ જમાવ્યું

EU ચૂંટણીના પરિણામો અનુસાર, આ વખતે 27 સભ્યોની EU ચૂંટણીમાં જમણેરી પક્ષોએ પ્રભુત્વ જમાવ્યું છે. આ ચૂંટણીમાં ઈટાલીના મેલોનીની પાર્ટી બ્રધર્સે 720 સભ્યોને ચૂંટવા માટે થયેલા મતદાનમાં 99 ટકા મતોની ગણતરી બાદ 28.81 ટકા મત મેળવ્યા છે.

બેલેટ પેપર પર જ્યોર્જિયા લખવાની પણ અપીલ કરી હતી

મેલોનીએ EU સંસદીય ચૂંટણીઓને તેમના નેતૃત્વ પર લોકમત તરીકે રજૂ કરી હતી. તેમણે મતદારોને મતદાન કરતી વખતે બેલેટ પેપર પર જ્યોર્જિયા લખવાની પણ અપીલ કરી હતી. પરિણામો પર, મેલોનીએ કહ્યું કે તેમને આ પરિણામો પર ગર્વ છે. તેમણે કહ્યું કે મને ગર્વ છે કે ઈટાલી પોતાને યુરોપની સૌથી મજબૂત સરકાર તરીકે રજૂ કરવા જઈ રહ્યું છે.

આ પરિણામોથી શું બદલાશે?

EU ચૂંટણીમાં મેલોનીની પાર્ટીની મોટી જીત બ્રસેલ્સ (EU હેડક્વાર્ટર)માં તેમનો પ્રભાવ વધારશે. EU પ્રમુખ ઉર્સુલા વોન ડેર લેયેનના આગામી કાર્યકાળ અંગેના નિર્ણયમાં પણ મેલોની મોટી ભૂમિકા ભજવશે. આ સાથે EU સંબંધિત તમામ નાના-મોટા નિર્ણયોમાં પણ મેલોનીની દખલગીરી જોવા મળશે.

ચૂંટણીમાં લગભગ 40 કરોડ લોકોએ ભાગ લીધો

તમને જણાવી દઈએ કે EU ચૂંટણી 6 થી 9 જૂન વચ્ચે યોજાઈ હતી. આ ચૂંટણીમાં લગભગ 40 કરોડ લોકોએ ભાગ લીધો હતો. નેધરલેન્ડ્સમાં 6 જૂને મતદાન સાથે ચૂંટણીની શરૂઆત થઈ હતી. આ સમયગાળા દરમિયાન, ફ્રાન્સ, ઇટાલી, જર્મની, ઓસ્ટ્રિયા, એસ્ટોનિયા, લિથુઆનિયા અને સ્વીડન જેવા ઘણા યુરોપિયન દેશોમાં મોટા પાયે મતદાન થયું હતું.

EU ચૂંટણીની અસર

EU ચૂંટણીમાં કારમી હાર બાદ ફ્રાન્સના પ્રમુખ ઈમેન્યુઅલ મેક્રોને સંસદ ભંગ કરી અને મધ્યસત્ર ચૂંટણીની જાહેરાત કરી. તે જ સમયે, EU ચૂંટણીમાં બેલ્જિયમના શાસક પક્ષની હાર પછી, વડા પ્રધાન એલેક્ઝાન્ડ્રે ડીક્રુએ તેમના પદ પરથી રાજીનામું આપી દીધું હતું.

EU સંસદ શું છે?

યુરોપિયન સંસદ વાસ્તવમાં યુરોપિયન લોકો અને યુરોપિયન યુનિયનની સંસ્થાઓ વચ્ચે સંપર્ક સ્થાપિત કરવાની સીધી કડી છે. વિશ્વની આ એકમાત્ર સીધી રીતે ચૂંટાયેલી આંતરરાષ્ટ્રીય એસેમ્બલી છે. આમાં, સંસદના સભ્યો યુરોપિયન યુનિયનના નાગરિકોના હિતોની વાત કરે છે. યુરોપિયન યુનિયન (MEPs) ના સભ્યો સભ્ય દેશોની સરકારો સાથે મળીને નવા કાયદા બનાવે છે. તેઓ આબોહવા પરિવર્તન અને શરણાર્થી નીતિ જેવા વૈશ્વિક મુદ્દાઓ પર નિર્ણયો લે છે. તેઓ EU બજેટ નક્કી કરે છે.

આ પણ વાંચો----- Malawi Vice President : માલાવીના વાઇસ પ્રેસિડેન્ટનું વિમાન ગુમ, 9 લોકો હતા સવાર…