ગાંધીધામમાં રૂપિયા 42 લાખની લૂંટ ચલાવનાર ત્રણ આરોપીઓને ગાંધીધામ પોલીસે ગોવાથી ઝડપી લીધા

કચ્છના આર્થિક પાટનગર ગાંધીધામના અપનાનગરમાં ફાયરિંગ કરીને આંગડિયા પેઢીના કર્મચારી પાસેથી રૂ ચાલીસ લાખ રોકડની લુંટ કરવાની  ઘટનાનો ભેદ પોલીસે ઉકેલી લીધો છે. આ કેસમાં 35 લાખની રોકડ, હથિયારો સહિતનો મુદામાલ જપ્ત કરવા સાથે ગાંધીધામમાં જ થયેલી 42 લાખ રોકડની જુની ઘટનાનો પણ ભેદ ઉકેલ્યો છે. સીસીટીવીની મદદથી પોલીસને મળેલી કડીઓ જોડવામાં આવતા  હાઈફાઈ જીવન જીવવા માટે લુંટ ચલાવનાર ત્રણ આરોપીઓેને  પોલીસે ગોવાથી ઝડપી પાડયા હતા. ગાંધીધામમાં છેલ્લા પાંચ વર્ષમાં આંગડિયા પેઢીના કર્મચારીઓને લુંટી લેવાની ઘટનાઓ વધ્યા બાદ પોલીસની પ્રતિષ્ઠા દાવ પર લાગી હતી. આ કેસમાં પણ ગુનાનો ભેદ ઉકેલાશે કે કેમ તે સવાલ હતો. આ વચ્ચે પોલીસને સીસીટીવીની એક કડી આરોપીઓ સુધી લઈ ગઈ હતી. 

ગાંધીધામના એસ પી મહેન્દ્ર બગડીયા આજે પ્રેસ કોન્ફરન્સ ના માધ્યમથી આ સમગ્ર ઘટનાની સિલસિલાબંધ વિગતો આપતા જણાવ્યું હતું કહ્યું હતું કે  લૂંટની આ ઘટનામાં ફાયરિંગ કરીને પૂર્ણિમા આંગડિયા પેઢીના કર્મચારી ઉતમ પ્રજાપતિ પાસેથી રોકડ 40 લાખ ભરેલો થેલો લૂંટી લેવાયો હતો. ઘટનાને પગલે પોલીસની તત્કાળ કામગીરી અને 98 જટેલા  સીસીટીવી ફુટેજની  કડી ને પગલે પોલીસ અંજારના વિજય નગર પહોંચી હતી. જયાંથી આરોપીઓએ લૂંટમાં ઉપયોગમાં લીધેલા વાહનો મળી આવ્યા હતા. આ પછી આરોપીની ટેકનીકલ સર્વેલન્સ ને પગલે  તેઓ ગોવામાં હોવાની માહિતી મળી હતી. સ્થાનિક પોલીસની ટીમ ગોવા પહોંચી હતી અને ગોવા પોલીસની મદદથી કેસિનોમાં જુગાર રમી રહેલા આરોપીને ઝડપી લેવાયા હતા. આરોપીઓમાં  છત્રપાલસિંહ હર્ષદસિંહ સોલંકી રે ભાવનગર, મનુસિંહ ઉર્ફે  મનોજ અજમલસિંહ ઠાકોર,  રે મહેસાણા અને સુરજસિંહ ઉર્ફે રાહુલ કરણસિંહ સોલંકી રે સામઢી પાલનપુરનો સમાવેશ થાય છે. 

પોલીસે આરોપીઓ પાસેથી રૂ. 15.55 લાખની રોકડ, 350 ગ્રામ સોનાના 7 બિસ્કીટ મળીને કુલ લૂંટમાં ગયેલા 35.85 લાખ રિકવર કર્યા હતા.આ ઉપરાંત એક કાર,  બાઈક, જેકેટ,  બે પિસ્તોલ,  9 જીવતા કારતૂસ, 3 મેગેઝીન,  વોકીટોકી, દુરબીન,  મોબાઈલ સિગ્નલ ઝામર સેટ,  શોટગન, ડિફેન્સ સ્પ્રે સહિતનો મુદામાલ કબજે લીધો હતો. 

પોલીસે જણાવ્યું હતું કે  આરોપીઓ આંગડિયા પેઢીના કર્મચારીઓને જ ટાર્ગેટ કરતા હતા. મહિનાઓ દિવસો સુધીની રેકી બાદ ખાસ મોડસ ઓપરેન્ડી અપનાવતા હતા જેમાં ભોગ બનનાર ઓફિસ કે દુકાનથી ઘર સુધી પહોંચી ત્યાં સુધી જોખમ હોય તો સાવચેત રહે છે પણ ઘરેના  દરવાજા પાસે પહોંચતા થોડા હાશકારો અનુભવે છે આ સમયે જ આરોપીઓ ફાયરિગ ધાકધમકી, શોટગન વડે શોક આપીને ડિફેન્સ સ્પ્રે મોઢા પર છાંટીને લૂંટ ચલાવે છે. 

એસપી બગડીયાએ ઉમેર્યું હતું કે આરોપીઓ વિવિધ ગુનામાં જેલમાં મળ્યા હતા. અન તેમણે એક મહિના સુધી રેકી કરીને પછી આ લુંટની ઘટનાને અંજામ આપ્યો હતો. ખાસ કરીને વેબ સિરીઝ ફિલ્મ જોઈને તેમાંથી વોકીટોકી નો ઉપયોગ કરવો, મોબાઈલ લોકેશન જામ કરવા સહિતના પગલા આરોપીઓએ ભર્યા છે.  જોકે સીસીટીવીની ખાસ ઉપયોગીતા અને ટેકનિકલ સર્વેલન્સની કામગીરીએ આ ભેદ ઉકેલવામાં સૌથી વધુ કડીઓ આપી છે. તેમણે લોકો આજના સમયમાં નિયમ મુજબ રહેણાંક અને વ્યાપારિક સ્થળો પર વધુમાં વધુ સીસીટીવી લગાવવા અનુરોધ કર્યો હતો. 

પોલીસની તપાસમાં ગાંધીધામમાં  વર્ષ 2018માં શક્તિનગર માં આંગડિયા કર્મચારીને ધમકાવીને રૂ 42 લાખની લૂંટનો ભેદ પણ ઉકેલાયો છે. આરોપી છત્રપાલસિંહ અને વિશાલ પટેલ રહે. સુરતે આ ઘટનાને અંજામ આપ્યો હતો સુરત ખાતેથી વિશાલને પણ ઝડપી લેવાયો છે.  બીજીતરફ રાજકોટ ખાતે  ખત્રીવાડ પાસેથી આંગડિયા કર્મચારીને પિસ્તોલ બતાવીને રૂ. 19.56 લાખની લૂંટ ચલાવી હતી. જેમાં બંને આરોપીઓ ફરાર હતા. 

આરોપીઓએ ઓનલાઇન વાહન ખરીદ કર્યું હતું. તો અંજારના વિજયનગર ખાતે પણ ભાડાનું મકાન રાખ્યું હતું. આ બન્નેમાં વાહન વેચનાર અને મકાન ભાડે આપનારે સ્થાનિક પોલીસને જાણકારી આપી નહોતી. પોલીસે અપીલ કરતા જણાવ્યુ હતું કે  ઓનલાઈન ખરીદી વેચાણ માં પુરતી ખાતરી કરવી જરૂરી છે. તો અજાણ્યા લોકોને  મકાન ભાડે અપાય તો પોલીસને જાણ કરવી જરૂરી છે.

આ પણ વાંચોઃ  દોઢ કરોડની છેતરપીંડીના ગુનામાં નાસતા ફરતા આરોપીને સુરત પોલીસે ઝડપી લીધો