દેશના 13 રાજ્ય અને કેન્દ્ર શાસિત પ્રદેશોમાં રાજ્યપાલ બદલાયા

મહારાષ્ટ્રના રાજ્યપાલ ભગત સિંહ કોશ્યારીએ તેમના પદ પરથી રાજીનામું આપી દીધું છે. તેમનું રાજીનામું દેશના રાષ્ટ્રપતિ દ્રૌપદી મુર્મૂ (Draupadi Murmu)એ સ્વીકારી લીધું છે. કોશ્યારીની સાથે લદ્દાખના લેફ્ટનન્ટ ગવર્નર રાધા કૃષ્ણન માથુરનું રાજીનામું પણ સ્વીકારી લેવામાં આવ્યું છે. આ સિવાય રાષ્ટ્રપતિએ 13 રાજ્યો અને કેન્દ્રશાસિત પ્રદેશોમાં મોટા ફેરફારો કર્યા છે.

રાષ્ટ્રપતિ દ્રૌપદી મુર્મૂએ નવા રાજ્યપાલોની નિમણૂક કરી છે. આ દરમિયાન રાષ્ટ્રપતિએ મહારાષ્ટ્રના રાજ્યપાલ પદેથી ભગતસિંહ કોશ્યરીનું રાજીનામું સ્વીકારી લીધું છે. તેમના સ્થાને રમેશ બૈસ મહારાષ્ટ્રના નવા રાજ્યપાલ બનશે. 

રાષ્ટ્રપતિએ આ રાજ્યોમાં નવા રાજ્યપાલોની નિમણૂક કરી છે, તેમાંથી લેફ્ટનન્ટ જનરલ કૈવલ્ય ત્રિવિક્રમ પરનાઈકને અરુણાચલ પ્રદેશના નવા રાજ્યપાલ તરીકે નિયુક્ત કરવામાં આવ્યા છે. જ્યારે લક્ષ્મણપ્રસાદ આચાર્ય સિક્કિમના રાજ્યપાલ હશે. બીજી તરફ ઝારખંડના રાજ્યપાલના નામ માટે સીપી રાધાકૃષ્ણનના નામની જાહેરાત કરવામાં આવી છે.

એ જ રીતે શિવ પ્રતાપ શુક્લાને હિમાચલ પ્રદેશના રાજ્યપાલ અને ગુલાબચંદ કટારિયાને આસામના રાજ્યપાલ તરીકે નિયુક્ત કરવામાં આવ્યા છે. બિસ્વા ભૂષણ હરિચંદન છત્તીસગઢના રાજ્યપાલ હશે. આંધ્ર પ્રદેશના રાજ્યપાલ નિવૃત્ત જસ્ટિસ એસ. અબ્દુલ નઝીર રહેશે. એ જ રીતે, સુશ્રી અનુસુયા ઉઇકેને મણિપુરના રાજ્યપાલ તરીકે નિયુક્ત કરવામાં આવ્યા છે. શ્રી ગણેશનને નાગાલેન્ડના રાજ્યપાલ બનાવવામાં આવ્યા છે, જ્યારે ફાગુ ચૌહાણને મેઘાલયના રાજ્યપાલ બનાવવામાં આવ્યા છે.

રાષ્ટ્રપતિ દ્વારા જાહેર કરાયેલા રાજ્યપાલોમાં રાજેન્દ્ર વિશ્વનાથ આર્લેકર બિહારના રાજ્યપાલ હશે. અરુણાચલ પ્રદેશના રાજ્યપાલ બીડી મિશ્રાને લદ્દાખના લેફ્ટનન્ટ ગવર્નર બનાવવામાં આવ્યા છે. આ તમામ ગવર્નરોની નિમણૂકો તેઓ પોતપોતાના હોદ્દાનો ચાર્જ સંભાળે તે તારીખથી પ્રભાવી થશે.

આ પણ વાંચો--દિલ્હીથી મુંબઈ હવે માત્ર 12 કલાકમાં પહોંચી શકાશે, દેશના સૌથી મોટા એક્સપ્રેસ વેનું PM મોદી કરશે ઉદ્ધાટન