Vipul Pandya
63
અમદાવાદ શહેરમાંથી ફરી એકવાર ડ્રગ્સની હેરાફેરી ઝડપાઇ છે, અમદાવાદ ક્રાઈમ બ્રાન્ચે રોપડા ગામ પાસેથી લાખો રૂપિયાની કિંમતના એમડી ડ્રગ્સ સાથે અમદાવાદના ચાર શખ્સોની ધરપકડ કરી છે. મુંબઈથી મોટી માત્રામાં MD ડ્રગ્સ લાવી અમદાવાદ શહેરમાં આપવામાં આવે તે પહેલા જ ઝડપાઈ ગયું છે..અમદાવાદ ક્રાઈમ બ્રાન્ચે ઈદ્રિશ ઉર્ફે ઇદુ શેખ, મોહમ્મદ ઈરફાન ઉર્ફે રાજા બાબુ, ધનુષ ઉર્ફે બીટ્ટુ આસોડિયા અને મનુ રબારી નામનાં શખ્સની ડ્રગ્સની હેરાફેરીના ગુનામાં ધરપકડ કરી છે..
ઘટનાની વિગતવાર વાત કરીએ તો અમદાવાદ ક્રાઈમ બ્રાન્ચને બાતમી મળી હતી કે મુંબઈ ખાતેથી ગેરકાયદેસર MD ડ્રગ્સનો જથ્થો લઈને ચાર શખ્સો ઇકો સ્પોર્ટ ગાડી લઈને વડોદરાથી એક્સપ્રેસ હાઈવે થઈને એસપી રીંગ રોડ તરફ આવી રહ્યા છે જેથી SP રીંગ રોડ પર વટવા રોપડા રોડ ઉપર વોચ ગોઠવીને ક્રાઈમ બ્રાન્ચે ગાડીમાં સવાર ચાર શખ્સોને ઝડપી 289 ગ્રામ MD ડ્રગ્સનો જથ્થો ઝડપી પાડ્યો છે.. આરોપીઓની તપાસ કરતાં તેઓની પાસેથી 28 લાખ 90 હજારની કિંમતનો ડ્રગ્સ અને વાહન સહિત કુલ 38 લાખ રૂપિયાનો મુદ્દામાલ કબજે કરવામાં આવ્યો છે. આરોપીઓની પૂછપરછ કરતા સામે આવ્યું કે ઇદ્રીશ અને મોહમ્મદ ઈરફાન છેલ્લા આઠ મહિનાથી ગેરકાયદેસર રીતે મુંબઈથી એમડી ડ્રગ્સનો જથ્થો લાવી અમદાવાદ શહેરમાં અલગ અલગ પેડલરોને વેચાણ કરે છે..
ત્યારે અમદાવાદ ક્રાઈમ બ્રાન્ચે મુંબઈમાં ડ્રગ્સ આપનાર આદિલ નામના સપ્લાયરને પકડવાની તજવીજ હાથ ધરી છે. પકડાયેલા આરોપીઓ અગાઉ બેથી ત્રણ વાર આ જ પ્રકારે 300 ગ્રામ જેટલો એમડી ડ્રગ્સનો જથ્થો અમદાવાદમાં લાવીને અલગ અલગ વિસ્તારોના પેડલરોને આપ્યો હોવાની કબુલાત કરતા ક્રાઈમ બ્રાન્ચે આરોપીઓ સાથે સંકળાયેલા અન્ય ગુનેગારોને પકડવા માટેની તજવીજ હાથ ધરી છે.. જોકે મોટી માત્રામાં એમડી ડ્રગ્સનો જથ્થો ઝડપી પાડતા ડ્રગ્સ માફિયાઓમાં ફફડાટ જોવા મળી રહ્યો છે.
