Vipul Pandya
90
ICC મહિલા વર્લ્ડ કપ 2022ની પોતાની પ્રથમ મેચમાં પાકિસ્તાનને ખરાબ રીતે હરાવનાર ટીમ ઈન્ડિયાને બીજી મેચમાં કારમી હારનો સામનો કરવો પડ્યો છે. મહિલા વર્લ્ડ કપ 2022ની આઠમી લીગ મેચમાં ન્યૂઝીલેન્ડે ભારતને 62 રનથી હરાવી ટૂર્નામેન્ટમાં તેની બીજી જીત નોંધાવી હતી.
ન્યૂઝીલેન્ડની ત્રણ મેચમાં આ બીજી જીત છે. વળી, બે મેચમાં ભારતની આ પ્રથમ હાર છે. મોટી હાર સાથે ભારતનો નેટ રન રેટમાં પણ મોટો ફટકો પડ્યો છે. અત્યાર સુધી ભારતનો નેટ રન રેટ 2થી વધુ હતો, પરંતુ આ મેચ બાદ તે નીચે આવી ગયો છે. મહિલા વર્લ્ડ કપમાં ગુરુવારે ભારત અને ન્યૂઝીલેન્ડની ટીમ આમને-સામને હતી. આ મેચ અસલમાં કેપ્ટન તરીકે મિતાલી રાજ અને સોફી ડિવાઈન વચ્ચે હતી. મિતાલી રાજે ટોસ જીતીને પ્રથમ બોલિંગ કરવાનો નિર્ણય કર્યો હતો. પ્રથમ બેટિંગ કરતા ન્યૂઝીલેન્ડે ભારતને જીતવા માટે 261 રનનો ટાર્ગેટ આપ્યો હતો. જવાબમાં ભારતીય ટીમ 198 રનમાં ઓલઆઉટ થઈ ગઈ હતી. 261 રનના લક્ષ્યનો પીછો કરવા ઉતરેલી ટીમ ઈન્ડિયાની શરૂઆત ખરાબ રહી હતી અને સ્મૃતિ મંધાના 6 રન બનાવીને જેસ કેરના બોલ પર કેચ આઉટ થઈ ગઈ હતી. આ પછી દીપ્તિ શર્મા 5 રન બનાવીને આઉટ થઈ ગઈ હતી.
કેપ્ટન મિતાલી રાજ અને યસ્તિકા ભાટિયા વચ્ચે 24 રનની ભાગીદારી થઈ હતી. ભાટિયા 28 રન બનાવીને આઉટ થઇ હતી. મિતાલી રાજ અને હરમનપ્રીત કૌરે 47 રનની મહત્વની ભાગીદારી નોંધાવી હતી, પરંતુ મિતાલી રાજ (31) આગળ જઈને શોટ રમવામાં સ્ટમ્પ આઉટ થઈ ગઈ હતી. તે પછીના જ બોલ પર રિચા ઘોષની વિકેટે ભારતને મેચમાં પાછળ ધકેલી દીધી. અંતમાં હરમનપ્રીત કૌરે મોટા શોટ રમ્યા હતા. તે 71 રન બનાવીને કેચ આઉટ થઇ હતી. ભારતની આખી ટીમ 198 રનમાં ઓલઆઉટ થઈ ગઈ હતી. ન્યૂઝીલેન્ડ માટે લેયા તાહુહુ અને એમેલિયા કેરે 3-3 વિકેટ લીધી હતી, જ્યારે હેલી જેન્સને છેલ્લી 2 વિકેટો (ઝુલન ગોસ્વામી અને રાજેશ્વરી ગાયકવાડ) લીધી હતી.
ટોસ હાર્યા બાદ પ્રથમ બેટિંગ કરવાનો નિર્ણય લેતા પૂજા વસ્ત્રાકરે ન્યૂઝીલેન્ડને પ્રથમ ઝટકો આપ્યો હતો. તેણે ઝુલન ગોસ્વામીની બોલ પર સુઝી બેટ્સને રન આઉટ કરી. આ પછી કેપ્ટન સોફી ડિવાઇન અને એમેલિયા કેર વચ્ચે 45 રનની ભાગીદારી થઈ હતી. એમેલિયા કેરે 50 રન બનાવ્યા હતા. ટીમ તરફથી એમી સેથવેટે સૌથી વધુ 75 રનની ઇનિંગ રમી હતી. અંતે, કેટી માર્ટિને નિર્ણાયક 41 રન બનાવ્યા. ભારતીય મહિલા ટીમની ફિલ્ડિંગ ઘણી વખત નબળી દેખાઇ રહી હતી અને મિતાલી રાજ, પૂજા વસ્ત્રાકર આસાન કેચ પકડી શકી ન હતી.
