મંકિપોક્સ વાયરસ ચેપી છે પરંતુ તે 21 દિવસની અંદર મટી પણ જાય છે તે વાત એટલી જ સાચી છે. ભારતમાં મંકિપોક્સના કેસ વધી રહ્યાં છે ત્યારે હવે દિલ્હીમાં મંકિપોક્સના પાંચમા કેસની વચ્ચે પહેલો દર્દી સાજા થતા તેને રજા આપવામાં આવી છે જે ભારત માટે ખૂબ રાહતની વાત છે.
દિલ્હીની આ બીજી મહિલા છે જેનો મંકિપોક્સનો ટેસ્ટ પોઝિટીવ આવ્યો હતો. આ સિવાય દિલ્હીમાં જોવા મળતા મંકીપોક્સ સંક્રમણના અન્ય ત્રણ દર્દીઓ પુરુષ છે. તે જ સમયે, સોમવારે દિલ્હીના મંકીપોક્સના પ્રથમ દર્દીને એલએનજેપી હોસ્પિટલમાંથી રજા આપવામાં આવી હતી.
આ માહિતી આપતા એલએનજેપી હોસ્પિટલના એમડી ડો.સુરેશ કુમારે જણાવ્યું હતું કે, એક દર્દીને એનએલજેપી હોસ્પિટલમાં દાખલ કરવામાં આવ્યો હતો. તેના સેમ્પલની તપાસમાં મંકીપોક્સનો ચેપ જોવા મળ્યો છે. ડોક્ટરોની ટીમ તેની સારવાર કરી રહી છે. તેમણે કહ્યું કે દિલ્હીમાં મંકીપોક્સ સંક્રમણનો આ પાંચમો કેસ છે. હાલ મંકીપોક્સના કુલ 4 દર્દીઓ એલએનજેપી હોસ્પિટલમાં દાખલ છે, જ્યારે એક વ્યક્તિ સંપૂર્ણ સ્વસ્થ થઈને ઘરે જતો રહ્યો છે.