Vipul Pandya
92
વડોદરાના (Vadodara) દરજીપુરા એરફોર્સ પાસે છકડો અને કન્ટેનર વચ્ચે આજે અકસ્માતમાં (Accident) સર્જાયો છે. કન્ટેનર ટ્રક નીચે દબાઈ જવાથી અત્યાર સુધીમાં 4 મહિલાઓ અને બે બાળકો સહિત કુલ 10 લોકોના મોત થયાં છે. અકસ્માતના બનાવને પગલે મોટી સંખ્યામાં લોકો ત્યાં એકઠાં થયા હતા અને પોલીસ કાફલો પણ ઘટના સ્થળે પહોંચી ગયો હતો.
સરકારે મદદની કરી જાહેરાત
વડોદરામાં બનેલી ઘટનામાં સરકારે મૃતકોના પરિવારજનોને રૂ. 4 લાખ અને ઈજાગ્રસ્તોને રૂ. 50 હજારની સહાયની જાહેરાત કરી છે. આ અંગે મુખ્યમંત્રીશ્રી ભુપેન્દ્ર પટેલે ટ્વીટ કરી જણાવ્યું હતું કે, વડોદરા નજીક દરજીપુરા એરફોર્સ સ્ટેશન પાસે થયેલ કરુણ અકસ્માતની ઘટનાથી વ્યથિત છું. અકસ્માતમાં જાન ગુમાવનાર મૃતકોના પરિવારજનો પ્રત્યે સંવેદનાની લાગણી વ્યક્ત કરું છું. રાજ્ય સરકાર મૃતકોના પરિવારજનોને રૂપિયા 4 લાખ અને ઈજાગ્રસ્તોને રૂપિયા 50,000ની સહાય આપશે.
મૃતકઆંક 10 થયો
અકસ્માતની જાણ થતાં જ પોલીસે ઈજાગ્રસ્તોને હોસ્પિટલ ખસેડવાની કામગીરી હાથ ધરી હતી. શરૂઆતમાં 6 લોકોના મોત થયાંની વિગત સામે આવી હતી બાદમાં ફાયર બ્રિગેડ અને એરફોર્સ ના જવાનો પણ કામે લાગ્યા અને છકડાના પતરા કાપીને મૃતકને બહાર કાઢ્યા હતા. જે બાદ મૃતક આંક વધીને 10 થયો હતો અને આ મૃતકઆંકે વધે તેવી પણ શક્યતા સેવાઈ રહી છે.
અકસ્માતમાં મૃત્યુ પામેલાની યાદી :
- રાકેશ બાકેબિહારી મિશ્રા (ઉ.વ.50, રહે. હરિભક્તિની ચાલી, સલટવાડા, વડોદરા)
- વિરપાલસિંહ ઉર્ફે સંદિપ ચાવડા (રહે. દંતેશ્વર, વડોદરા-છકડા ચાલક)
- જુવાનસિંહ બારીયા (રહે. વાંદરા, દેવગઢબરીયા)
- સવિતાબેન બારીયા (રહે. વાંદરા, દેવગઢબરીયા)
- ઇન્દ્રસિંહ ગોહિલ (રહે. જબુગામ, પાવીજેતપુર)
બાકીના પાંચ મૃતદેહોની ઓળખ બાકી છે…
.jpg?type=webp&quality=80)
અધિકારી અને પદાધિકારીઓ હોસ્પિટલ પહોંચ્યા
ઘટનાની જાણ થતાં વહીવટીતંત્ર સાબદું બન્યું હતું અને વડોદરા જિલ્લા કલેક્ટર એ.બી.ગોર, સંયુક્ત પોલીસ કમિશ્નર ચિરાગ કોરડીયા અને શહેર ભાજપ પ્રમુખ ડો.વિજય શાહ હોસ્પિટલ પહોંચ્યા હતા અને મૃતકોના પરિવારજનોને મળી શહેર પ્રમુખે સાંત્વના પાઠવી ઇજાગ્રસ્તોને ઝડપથી સારવાર મળે તે માટે સુચના અપવામાં આવી છે. મૃતકો, ઇજાગ્રસ્તોમાં મોટાભાગનાં મજુર વર્ગનાં લોકો છે અને તેઓ વડોદરાના સોમાતલાવ વિસ્તારનાં રહીશો હોવાનું સામે આવ્યું છે.
.jpg?type=webp&quality=80)
સારવાર માટે સુચના, સહાય માટે રજુઆત થશે
બનાવ અંગે જિલ્લા કલેક્ટર એ.બી.ગોરે જણાવ્યું કે, ઇજાગ્રસ્તોને ઝડપથી સારવાર મળે તે માટે સુચના આપી દેવામાં આવી છે. અન્ય વાહનને બચાવવા જતાં ટ્રક ચાલકે કાબુ ગુમાવ્યો અને આ અકસ્માત સર્જાયો છે. જ્યારે શહેર ભાજપ પ્રમુખ ડો.વિજય શાહે જણાવ્યું કે, મૃતકોનાં પરિજનો અને ઇજાગ્રસ્તોને સહાય મામલે મંત્રી રાજેન્દ્ર ત્રિવેદી મારફત મુખ્યમંત્રીને રજૂઆત કરાશે.
