ઈઝરાયેલ અને હમાસ વચ્ચે યુદ્ધની આગ હજુ ઓલવાઈ હોય તેવું લાગતું નથી. જ્યારે ઇઝરાયેલે હમાસને ખતમ કરવાની પ્રતિજ્ઞા લીધી છે, ત્યારે હમાસ પણ પાછળ હટવાનું નથી. 25 દિવસથી ચાલી રહેલા આ યુદ્ધમાં હજારો નિર્દોષ લોકોના જીવ ગયા છે. હુમલામાં બંને દેશોને ભારે નુકસાન થયું છે. આ દરમિયાન હમાસે ફરી યુદ્ધ ઉગ્ર બનાવવાની ધમકી આપી છે. હમાસના પ્રતિનિધિ ગાઝી હમાદે 7 ઓક્ટોબર જેવા ભયાનક હુમલાનું પુનરાવર્તન કરવાની ધમકી આપી છે.
ગાઝી હમાદે કહ્યું કે જ્યાં સુધી ઈઝરાયલ ઘૂંટણિયે નહીં પડે ત્યાં સુધી હમાસ પીછેહઠ કરશે નહીં. હમાદે કહ્યું કે અધિકારોની લડાઈમાં અમારા લડવૈયાઓ ગર્વથી શહીદ થતા રહેશે. અમારી જમીન મેળવવા અમે 7 ઓક્ટોબર જેવા હુમલાઓ એકવાર નહીં પરંતુ ઘણી વખત કરીશું. તમને જણાવી દઈએ કે 7 ઓક્ટોબરના રોજ હમાસના હુમલામાં 1400થી વધુ ઈઝરાયેલના લોકોએ જીવ ગુમાવ્યા હતા. ત્યારથી ગાઝા પટ્ટી પર બંને તરફથી મોટા પાયે હુમલાઓ ચાલુ છે.
વોશિંગ્ટન ડીસીમાં એક સંશોધન સંસ્થા મેમરી સાથે વાત કરતા ગાઝીએ કહ્યું કે ઈઝરાયેલ એક એવો દેશ છે જેને આપણી (પેલેસ્ટાઈન) જમીન પર કોઈ સ્થાન નથી. ઈઝરાયેલ આરબ અને ઈસ્લામિક દેશોની સુરક્ષા માટે લશ્કરી અને રાજકીય ખતરો છે અને તેનો નાશ થવો જોઈએ. હમાદે કહ્યું કે અમે આ વાત ભારપૂર્વક કહેવામાં શરમ અનુભવતા નથી. ઇઝરાયેલ તેના કાર્યો માટે ભોગવશે. આ માટે અમે વારંવાર હુમલો કરીશું.
હમાસે દાવો કર્યો છે કે ઇઝરાયલે ગાઝા સિટી નજીકના એક શરણાર્થી શિબિરમાં રહેણાંક મકાનોને સતત બીજા દિવસે હવાઈ હુમલાથી નિશાન બનાવ્યા હતા, જેમાં ઘણી જાનહાનિ થઈ હતી. બુધવારના હુમલામાં મૃતકોની સંખ્યા તાત્કાલિક જાણી શકાઈ નથી. અલ-જઝીરા ટેલિવિઝન ચેનલ, ઉત્તરી ગાઝાથી અહેવાલ આપે છે, વિનાશના ફૂટેજ પ્રસારિત કરે છે અને બાળકો સહિત ઘાયલ લોકોને હોસ્પિટલમાં લાવવામાં આવે છે.
બીજી તરફ, બોલિવિયાની સરકારે ગાઝા પટ્ટીમાં હમાસના આતંકવાદીઓ સામે ઇઝરાયેલના સૈન્ય હુમલાને સમાપ્ત કરવાની હાકલ કરતાં મંગળવારે ઇઝરાયેલ સાથે રાજદ્વારી સંબંધો તોડી નાખ્યા હતા. બોલિવિયાના ડેપ્યુટી ફોરેન મિનિસ્ટર ફ્રેડી મામાનીએ એક પ્રેસ કોન્ફરન્સમાં જણાવ્યું કે, ‘બોલિવિયાએ ગાઝા પટ્ટીમાં ચાલી રહેલા ભયાનક ઈઝરાયેલ સૈન્ય હુમલાની નિંદામાં ઈઝરાયેલ સાથે રાજદ્વારી સંબંધો તોડવાનો નિર્ણય લીધો છે.’ દેશના ડાબેરી પ્રમુખ લુઈસ આર્સ લાંબા સમયથી ઈઝરાયેલની ટીકા કરતા હતા અને અગાઉ ગાઝા યુદ્ધને લઈને 2009માં ઈઝરાયેલ સાથે રાજદ્વારી સંબંધો તોડી નાખ્યા હતા અને વર્ષ 2020 માં રાજદ્વારી સંબંધો ફરી સ્થાપિત થયા હતા.
આ પણ વાંચો : Coronavirus : કોરોના વાયરસને લઈને મોટો ખુલાસો, અમેરિકાએ ચીન સાથે મિલાવ્યો હાથ…?