Vipul Pandya
108
પંજાબના રૂપનગરમાં રેલ્વે ટ્રેક પર રખડતા ઢોર અથડાયા બાદ માલગાડીના ડબ્બા પાટા પરથી ઉતરી ગયા હતા. તાજેતરમાં મળેલી માહિતી મુજબ રવિવારે રાત્રે લગભગ 12.35 કલાકે અચાનક આખલાઓનું ટોળું માલગાડીની સામે આવી ગયું હતું. આ દરમિયાન ડ્રાઈવરે પશુઓને બચાવવા ઈમરજન્સી બ્રેક લગાવી જેના કારણે માલગાડીના 16 ડબ્બા બેકાબૂ થઈને પાટા પરથી ઉતરી ગયા હતા.
મળી રહેલી માહિતી અનુસાર, માલગાડીના તમામ કોચ ખાલી હતા, જે થર્મલ પ્લાન્ટમાં કોલસો છોડીને પરત ફરી રહ્યા હતા. વળી, આ મામલો ગુરુદ્વારા પાઠ સાહિબ પાસે જણાવવામાં આવી રહ્યો છે. અહીંના રેલવે ટ્રેકને હવે સમારકામ માટે બ્લોક કરી દેવામાં આવ્યો છે. વળી, રેલ્વે રેસ્ક્યુ ટીમ મશીનો સાથે સ્થળ પર પહોંચી ગઈ છે, અને ટ્રેકના સમારકામનું કામ ચાલી રહ્યું છે. પઠાણકોટ-અમૃતસર રેલ રૂટની આઠ ટ્રેનો રદ કરવામાં આવી છે અને રેલ્વે વિભાગે 18 એપ્રિલે સાંજે 4 વાગ્યા સુધીમાં રેલવે ટ્રેક સાફ કરવાનો દાવો કર્યો છે. પંજાબમાં હાલમાં લગભગ 2.5 લાખ રખડતા પ્રાણીઓ છે, જેના વ્યવસ્થાપન માટે સરકાર ઘણા વર્ષોથી દાવા કરી રહી છે, જોકે આજ સુધી આ સમસ્યાનો કોઈ કાયમી ઉકેલ મળ્યો નથી. બીજી તરફ રખડતા પશુઓના કારણે માર્ગ અકસ્માતમાં સેંકડો લોકોએ જીવ ગુમાવ્યા છે.
કોંગ્રેસની અગાઉની સરકારે રખડતા પશુઓને પકડવા માટે ઈ-પોર્ટલ તૈયાર કરવાની યોજના બનાવી હતી અને તે યોજના હેઠળ નિરાધાર પશુઓની તસવીર ઈ-પોર્ટલ પર અપલોડ કરવાની હતી અને સરકાર તેમને કેટલ પાઉન્ડમાં પહોંચાડવાની હતી. જોકે, આ યોજના હજુ પણ સરકારી ફાઈલોમાં બંધ છે અને રખડતા ઢોરના કારણે અકસ્માતો થતા રહે છે. તાજેતરની માહિતી અનુસાર, રાજ્યમાં રખડતા ઢોર માટે 77 કેટલ પાઉન્ડ ઉપલબ્ધ છે. એપ્રિલના પહેલા અઠવાડિયામાં, પંજાબના ગુરદાસપુર રેલવે સ્ટેશન પર માલગાડીનો એક ડબ્બો પાટા પરથી ઉતરી ગયો હતો. આ અકસ્માતમાં કોઈને ઈજા પહોંચી ન હતી, પરંતુ કલાકો સુધી રેલ વ્યવહાર પ્રભાવિત થયો હતો. પઠાણકોટ-અમૃતસર રેલ રૂટ પર દોડતી કેટલીક ટ્રેનોને રદ કરવી પડી હતી. ત્યારબાદ ટ્રેકના સમારકામ બાદ તે જ દિવસે આ માર્ગ પર વાહન વ્યવહાર શરૂ થયો હતો.
