Vipul Pandya
9
ગૃહિણીઓને વધુ એક મોંઘાવારીનો માર સહન કરવો પડી રહ્યો છે. સિંગતેલ અને કપાસિયા સહિત ખાદ્ય તેલોમાં ફરી ભાવ વધારો ઝીંકાયો છે. ખાદ્ય તેલના ભાવ વધી રહ્યા છે ત્યારે લોકોને વધુ એક મોંઘવારીનો માર સહન કરવા તૈયાર રહેવું પડશે. ગુજરાતમાં ફરી એકવાર સિંગતેલ અને કપાસિયા તેલના ભાવમાં વધારો ઝીંકાયો છે. સતત 4 દિવસથી ખાદ્યતેલના ભાવમાં વધારો થઈ રહ્યો છે. સૌરાષ્ટ્રમાં મગફળીની દૈનિક આવક વધી છે તેમ છતાં સિંગતેલના ભાવમાં વધારો થયો છે. છેલ્લા 3 દિવસમાં સિંગતેલના ભાવમાં 40 રૂપિયાનો વધારો થયો છે. 4 દિવસ પહેલા જ સિંગતેલમાં 30 રૂપિયાનો અને કપાસિયા તેલમાં 20 રૂપિયાનો ભાવ વધારો થયો હતો. તો પામ તેલમાં 20 રૂપિયાનો અને સોયાબીન તથા સનફ્લાવર તેલમાં 10 રૂપિયાનો ભાવ વધારો થયો હતો. જ્યારે મકાઈના તેલમાં 15 રૂપિયાનો ભાવ વધારો થયો હતો. ચાર દિવસ બાદ ફરી તેલના ભાવમાં ભડકો થયો છે અને ભાવ 40 રૂપિયા વધીને એક ડબ્બાનો ભાવ અઢી હજારની આસપાસ પહોંચી ગયો છે.
સિંગતેલના ડબ્બાના ભાવ 2420 રૂપિયાની આસપાસ
સૌરાષ્ટ્રની મિલોમાં સીંગતેલનું દૈનિક ઉત્પાદન 300 ટન છે. છતા હાલ સિંગતેલના ડબ્બાના ભાવ 2420 રૂ.ની આસપાસ પહોંચ્યા છે. સિંગતેલની સાથે અન્ય ખાદ્યતેલના ભાવમાં પણ વધારો થયો છે. કપાસિયા તેલના ડબ્બાનો ભાવ 2350 ની આસપાસ પહોંચ્યો છે. અન્ય તેલના ભાવ જોઈએ તો, પામતેલનો ભાવ 2200 રૂપિયા, સોયાબીન તેલના ડબ્બાનો ભાવ 2250 થી 2300 રૂપિયા, સનફ્લાવર્સ તેલનો ડબ્બો 2150 રૂપિયા અને મકાઈના તેલનો ડબ્બો 2080 રૂપિયા પર પહોંચ્યો છે. ત્યારે તેલમાં ભાવ વધારો ક્યારે અંકુશમાં આવશે તે નક્કી નથી.
